October 21 - 23 chhungin YMA Inkhawmpui Lian nei dawn

Aizawl | June 24, 2025: Nizana Central YMA Executive Committee thukhawm chuan kumina YMA Inkhawmpui Lian vawi 75-na neih hun atan October 21 - 23, 2025 a ruat fel.

CEC meeting hi CYMA President Lalhmachhuana'n a kaihruai a, General Secretary Prof Malsawmliana'n tunhnaia pawl hmalakna Report a pe.

Meeting ah hian Sakawrdai-a YMA Inkhawmpui Lian vawi 75-na neih hun atan October 21-23,2025 ruat a ni a. Inkhawmpui Programme Committee din nghal a ni bawk a, Chairman ah CYMA Vice President Prof. Lalnuntluanga ruat a ni a, kumpuan thupui sawi turin Prof. Malsawmliana ruat a ni bawk.

Heng bakah hian kum tina Group leh Branch inelna neih thin - Kumpuan bawhzui tha, Ramngaw leh nungcha humhalh tha, luidung humhalh tha, Branch chanchinbu tha leh YMA Chanchinbu la tha te buatsaih leh tum a ni.

Meeting ah hian July 19, 2025 ah OKM Home, Phunchawngah Free Health Clinic buatsaih an rel a; Assam-a Barak Valley huamchhunga YMA Branch ding thar 4 pawm a ni bawk a Central YMA in Direct in a awp dawn a ni.

Heng bakah hian pawl chhung inkaihhruaina thil chi hrang hrang an rel bawk.