Aizawl | June 4, 2025: Vawiin khan School Education Minister Dr Vanlalthlana'n Rangvamual-a Govt. Nepali Primary School Building sak thar chu a hawng.
Hawnna thu a sawiah Minister chuan School building thar tha tak hawn a ni ta chu lawmawm a tih thu leh bialtu MLA TBC Lalvenchhunga thahnemngaihnaah lawmawm a tih thu a sawi. Minister chuan UPSC Exam-ah Mizo kan lang hlei thei ta lo chu tan lak a ngaih thu sawiin Mizoram Education Reforms Committee-in zirna siamthat dan tur kawng a ngaihtuah chho mek a, Mizoram pumah term exam-ah Question paper in ang tlang hman te, lesson plan-ah term tina zirtirtuten an zawhpui tur chin siam te chu hma chhawp a ni mek tih a sawi. Minister chuan National Curriculum Framework thar a chhuak tawh a, hemi mil hian NCERT chuan text book pawh Class I, II, III & VI a tichhuak tawh a, thil thar zir a ni dawn a, zirna pawh a danglam dawn a ni a ti. Zirna kawnga hmasawn zel turin zirlaiten an zirlaiah thil chikna leh thil thar ngaihtuah chhuah theihna an neih a pawimawh hle a ni a ti bawk.
Dr Vanlalthlana chuan khawtlang hruaitute leh zirna school thawhho thatna hmun apiangah zirna kawnga hmasawnna a awm thin a, tlawmngai pawl leh khawtlang hruaituten zirna an ngaihsak chuan zirtirtu leh zirlai an tang a, an inthlahdah thei lova, tanho a ngai hle a ni a ti a. Rangvamualah pawh khawtlangin zirna a ngaihsak chuan zirna a thang zel dawn a ni a ti bawk.
Bialtu MLA leh Adviser to CM ni bawk TBC Lalvenchhunga pawhin he building thar hawnna hunah hian thu a sawi a, sorkar thar a pian hnu lawkah Govt Nepali Primary School-in pawna class an la a hmuhin school building sak dan tur kawng a zawn nghal thu te, Samagra Shiksha leh hmun dang atanga sum an dap thu a sawi. Bialtu MLA chuan khawtlang hmasawnna leh changkannaa kawnga ke pentir theitu chu zirna hi a ni tih sawiin kalkhawmte chu tan la zel turin a chah a ni. Rangvamual Local Council pawhin sorkar hmalaknaah an lawmthu an sawi a, naupang an pung zel a, zirtirtu pawh an tang hle tih an sawi bawk.
Govt. Nepali Primary School Building thar hi chhawng hnih a ni a, class room 6, Teachers common room 1, mipa leh hmeichhe inthiarna bakah chaw chhun siamna tur kitchen te a awm a ni. He school-ah hian zirlai naupang 122 leh zirtirtu 6 an awm mek a ni.
School building thar hawnna inkhawm hi Special secretary David Lalthantluanga chuan a kaihruai a, School Education Director Angela Zothanpuii chuan lawmthu a sawi. He School building thar hawnnaah hian Minister leh Bialtu MLA bakah School Education Department-a Officer te, Aizawl DEO leh SDEO te, Samagra Shiksha Officer te, Rangvamual khawtlang hruaitute, he school a thawk zirtirtu leh zirlaite an kalkhawm a ni.
• • • • • •
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: