PHE Minister-in tui putna leh Pipe thawmthat ngaite a hmunah kalin endik

Aizawl | June 26, 2025: Vawiin khan Public Health Engineering Department Minister Prof. Lalnilawma'n Assam Rifles chhuahsan tak, Lammual hmun thenkhata tui hna awmnate, Hunthar lei tla hniama tui putna leh Helen Lowry School, Seventh Day Tlang Girls Hostel-a Pipe thawmthat ngaite chu a hmunah kalin a endik.

PHE Minister Prof. Lalnilawma chuan Assam Rifles chhuahsan tak, Lammuala tui hna tha tak awm chu mumal taka hmalakna a awm loh chuan a bulhnaia in dinglai tan chhiatna a thlen theih thu sawiin, tui khawlkhawmna tur mumal tak siam a, vantlang tana hman tangkai theih tura ruahmanna kalpui a tul thu a sawi a. Lei tla hniam avanga PHED pipe kal dan siamthat ngaite pawh department thawktute nen an en hova, hmalak dan turte an sawi ho nghal bawk a ni.

PHE Minister chuan Hunthar lei tla hniam leh Helen Lowry School-a tui putna hmun a endikna hunah hian hemi avanga harsatna lian zawk a thlen loh nan leh khawtlang him nan tui luan kawr tha siam ngaih pawimawh hmasak a tul thu a sawi a. PHED pipe put (Leak) kan hria a nih chuan mobile phone atangin ‘Water Leak Reporter’ apps hmangin awlsam takin PHED-ah report a thehluh theih thu a sawi a. Report thehluh atanga hun rei loteah thawktute’n pipe leak thawmthat hna an bawhzui nghal zel thin thu a sawi a. ‘Water Leak Reporter Mobile Apps’ chu hmelhriata hmang tangkaitu nih theuh tum turin mipuite a chah a ni.

PHE Minister hi CE Er Ngentluanga, CE Er K Zohmingliana, SE Er Lalrinzuala Ralte, EE Er Lalzuimawii, EE Er J Kapkima leh Aizawl DC aiawhte bakah khawtlang hruaitute’n an tawiawm a ni.