Ruihhlo hman khawloh leh tawlh ruk dona ni pualin Champhaiah kawng zawh

Champhai | June 26, 2025: Vawiin khan Champhaiah International Day Against Drug Abuse and Illicit Trafficking puala Ruihhlodo kawngzawh niin Vengsang biak in kawtah hemi pual inkhawm tawi neih ani a, SDO (Sadar) Ngulzathuama'n kawngzawh turte a vailiam.

Kawng zawh hi Vengsang Presbyterian Kohhran Biak In bulah tan niin he hmunah hian Superintendent of Police R Lokeshwaran chuan thu sawiin ruihhlo do kawng zawhnaa mi tam tak an kalkhawm thei chu lawmawm a tih thu a sawi a, Myanmar ramri a awm kan nih avangin ruihhlo in min chiah hneh hle a, heng ruihhlo kan rama rawn lutte hi dan leh thupek kengkawhtute mawhphurhna chauh ni lovin mipuite mawhphurhna pawh a nih ve thu a sawi a. Ruihhlo do kawngah mipuite tanho tlat kan mamawh thu sawiin vawiina kawng zawh chu a bul tanna niin an haw darh hunah anmahni chhungkua theuhah ruihhlo that lohna leh do a tul zia inzirtir chhunzawm turun kalkhawm te a chah a ni.

District Education Officer K Lalsiamliani pawhin thusawiin ruihhlo ti kan ramah tam tak an awm tih hi sawi uar hle thin mah ila, ruihhlo ti te aiin ruihhlo la ti ve ngai lo kan tam zawk tih sawiin ruihhlo la ti ve ngai lote hian ruihhlo do kawngah kan inthurual tlat chuan ruihhlo hluar zel tur kan veng thei dawn tih a sawi a, zirlai ni mek te pawhin tun atanga ruihhlo laka inthiar fihlim a, a dotu nih tum tlat turin a sawm a ni.

Kawng zawh chhung hian ruihhlo dona thu hrang hrang hmangin au rual a ni a, ruihhloin nghawng thalo a neih hrang hrang te sawi lan ani bawk. Upa Darthangvunga Traffic Point-ah hun tawi hman niin MHIP leh MZP aiawh te hnen atangin thusawi ngaihthlak a ni a, DK Traffic Point ah MUP leh SYMA aiawhte hnen atangin thusawi ngaihthlak a ni a, Bethel kawnah District Bawrhsap Pu Mohammad Aaquib chuan thu sawiin ruihhlo ngaihnain khawvel pumpui a tih buai thu sawiin, mimal, khawtlang leh ram nun, sum leh pai leh himna thlenga a nghawng thu a sawi a. Champhai District-ah ruihhlo hluar zel tur do kawngah lungrual taka tanho angaih thu sawiin, hemi kawngah hian thalai lehkha thiam rualte nena do tlan a tul thu a sawi. Hmabak eng tak nei zirlaite chu ruihhloin a tihbuai hman loha an zirna hmasawnna tura ngaihtuahna seng tura fuihin, hlawhtling tura tumruhna, taimakna leh rinawmna nei turin a chah a. International Day Against Drug Abuse and Illicit Trafficking puala thutiam te thinlunga vawng reng a ruihhlo leh a kaihhnawih do let thei tura tanrual a pawimawh takzet thu sawiin, kan zavaia kan tanrual chuan kan hneh thei dawn a ni tih a sawi bawk. Bethel kawna hun hmannah hian Excise & Narcotics Department, Social Welfare & Tribal Affairs Department aiawh ten thu an sawi bawk a ni.

International Day Against Drug Abuse and Illicit Trafficking puala kawngzawhah hian Sawrkar Department, SYMA, YMA Branch sawmhnih aiawh, MUP, MHIP, College Zirlai High School leh Higher Secondary zirlai thahnem tak an tel a ni.