Ngopa-ah leiminin in a hnawl, kawngpui a ping!

Aizawl | June 25, 2025: Nimin chawhnu Dar 2:00 vel khan Ngopa kawtchhuah pelh thlak Zero Point kawng chhak chu a min a, T Samuel Zothanmawia In leh a thingzaina Khawl In chu bungrua engmah chuh hman lovin leimin hian a hnawl.

Leimin avang hian chhiatna thleng mahse, Vanneihthlak takin leimin avang hian thi leh hliam an awm lo.

Lei minna ko chung hi Ngopa Damdawi In a ni a, damdawi in pawh hi him lova hriain bungrua a theih ang ang thiar chhuah ve nghal a ni.

Chanchin buatsah lai hian lirthei eng chi mah kaltlang theih lovin kawng hi a ping hneh hle a, lirthei 407 chin hnuai lam kal theih turin leimin helna buaipui nghal a ni a, tlai lam hian lirthei te By pass lamah a kaltlang hman beisei niin, Motor lian erawh a tlang hun tur sawi theih a la ani lo.

He kawng hi Manipur paltang tur kawng NHIDCL hnuaia contractor ten an laih lai niin Aizawl lam pan tur leh Manipur lam pan tur lirthei tangkhangte ei leh in buaipuiin Ngopa YMA leh khawtlang hnuaitute zanin hian chet chhuah an tum bawk a ni.

- AIR

[Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]