Tennis Court chhehvela thlai zuar thin te'n AMC-in a dahnaah an hlawk loh thu an sawi

Aizawl | June 25, 2025: Aizawl Tennis Court chhehvela thlai zuar thin te chuan vawiin khan Aizawl Press Club-ah thuthar thehdarhtute kawmin, Aizawl Municipal Corporation (AMC)-in an sawn chungchang an sawi a, tuna AMC-in an dahna chu a hlawk loh thu an sawi.

Kawng kamna an thutna atanga AMC-in an sawnna AMC Multi Complex Building chhawng sang hmun chep taka thutin an tan awmzia a neih loh thu an sawi a, hemi avang khan inrinni liam ta khan an thu lui leh a, AMC lamin an thlai zawrhte an khawmsak a, lungawi lohna lantirin an innawr tak thu an sawi a, mipui an tihbuainaah hriatthiam an ngen bawk. Chutihrualin, AMC chu kum tam tak an lo thut tawhna hmun ngaia thut tir leh turin an ngen bawk.

Tennis Court chhehvela thu thinte chairman Lalruatkimi chuan Tennis court chhehvelah chuan kum 2000 hmalam atangin Inrinniah chauh an thut thin thu a sawi.

Lalruatkimi chuan, AMC Multi complex chu Treasury bazara kar tluana thu thin te sawn luhna tura ruahman a nih thu sawiin tun dinhmunah mi 80 vel thut theihna turah mi 200 dawn an hnawh luh thu leh a then chu ke a kalna step-ah te thuttir an nih thu sawiin nidanga an lei chhuah thin zatve pawh an lei theih tawh loh thu a sawi.

Tennis Court Bazar-ah hian ni tina thu an nih loh thu leh, inrinni-ah chauh thu an nih thute, AMC Multi complex-ah chuan mipuiin an pan tam loh avangin an hlawk loh thu an sawi a. Heng bakah hian, Treasury bazar-a thu thinte sawn an duh luata anni, inrinni chauh-a thil zuar thinte an vai hma tel chu hriatthiam har an tih thu sawiin, Thuneitute chu an dinhmun hrethiam turin an ngen bawk.

[Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]