June 28 zanah 'Darthlalang' film tlangzarh dawn

Aizawl | June 27, 2025: Mizo film ngainatute tan chanchin lawmawm hriat tur a awm leh ta - June 28, 2025 (Inrinni) zan hian 'Darthlalang' film chu Vanapa Hall-ah tlangzarh a ni dawn e. He mi zan vek hian OTT platform thar, AiduPlay-ah Rs. 200 a en theihin a awm nghal dawn a ni. 'Darthlalang' film hi BR Studio produced niin, Johny Zote ziah leh direct a ni.

'Scooty' film atanga Zoram mipuiin kan hmelhriat Zorinpuia (L) ho khan shooting an lo nei tawh a, mahse an puitlin thei ta lo. Mizo actor hmabak nei eng berte zinga mi vanduai thlak taka boral ta, Zorinpuia leh khatih hun laia social media lama lar tak Teddy Sailo te nena 70% vel zet an lo shoot hman. Zorinpuia boral tak avang an chhunzawm theih tak loh chu, a changtu mi thar hlak hmangin shoot that leh a ni a, tlangzarh turin an peih fel thei ta a ni.

'Darthlalang' film-ah hian milar inlan tur an awm nual a, en man hla tur tak a ni. Zaithiam leh lemchan thiam ni bawk Jenny Jathang kan hmu leh dawn a, model lar leh chhe lo Hlui Sailo bakah, Instagram lama hriat hlawh tak Bobita Chetri (Belle bibs) te an inlan dawn a ni.

Mizo film industry-a hriat hlawh tak Lianpuia leh Laraw Colney te bakah, Mizo mipa model zinga sawm hlawh ber pawl ni chho mek Kevin Malsawmtluanga te an inlan dawn bawk a ni.

'Darthlalang' film hi premiere-na hmuna en thei lo tan pawh Aidu Play app-ah en theihin a awm nghal dawn a, Play Store leh App Store-ah download theihin a awm a ni.