"chhan hrang hrang avanga an mawhphurhna hlen chhuak thei lo harsatna neite chu 'Voluntary Retirement' hmanga chawlh tir mai a tul,"

Aizawl | June 27, 2025: Vawiin chawhnu khan DGP Conference Hall, Police Headquarters (PHQ), Khatlaah Mizoram Police hnathawh dan thlirletna hun Home Minister K Sapdanga, hovin neih a ni a. Director General of Police Anil Shukla, chuan kalkhawmte lawmna thu a sawi a. Chief Secretary mawhphurhna la mektu H Lalengmawia pawhin thusawiin Home Secretary Vanlalmawia chuan Mizoram Police dinhmun leh hmachhawpte a tarlang a ni.

Home Minister K Sapdanga chuan mipui vantlang venghim tura mawhphurhna pawimawh tak chelhtu Police department hna lo thawh tawh dan chu lawmawm a tih thu sawiin hmasawnna nasa zawk a awm theih nan dan leh thupek kenkawh hnathawktuten taksa leh rilru hrisel nei zel tura an inenkawl that a pawimawh thu a sawi a. Thawktu tha an awm belh deuh deuh theih nan dik leh langtlang takin, a tling leh phute chauh lak an nih theih nan Constable 259 lakna pawh kalpui a nih thu a tarlang a. Heti chung hian Police department-ah post hnawkhat loh awm zat chu za zelah 38.9 a nih thu a sawi.

Home Minister chuan Police department hnuai a thawktute, chhan hrang hrang avanga an mawhphurhna hlen chhuak thei lo harsatna neite chu 'Voluntary Retirement' hmanga chawlh tir mai a tul tur thu a sawi a, a hun tak a, a hmun takah thawktu kan mamawh ang tak an awm theih nan insawnkual kawngah 'Zero based Posting' kalpui a pawimawh thu a sawi.

K Sapdanga chuan, Mizoram Police-te chu tha taka chher leh tuaihriam an nih theih nan Police training-na hmun kan neihte tihchangtlun a pawimawh thu sawiin Police hna thawk tura lak tharte bakah a thawklaite pawh hunbi neia intuaitharna hun an neih reng a tul thu a sawi.

Home Minister chuan khawvel changkanna ina a ken tel thiamna avangin inbiakpawhna kawngahte hmasawnna nasa tak a awm tawh thu a sawi a, hemi avang hian MPRO a thawktute pawh mipui tan tangkai zawka chhawr an nih theih nan a tul anga duty pek tura ruahmanna siam a tul thu a sawi a, venhimna leh dan leh thupek kenkawh hna tha taka thawk tur chuan khawtlang leh tlawmngai pawl hrang hrangte nen thawhhona tha neih a pawimawh thu a sawi.

K Sapdanga chuan Mizoram hmun hrang hrangah raltlan sulhnu anga ngaih thei tur, dan leh thupek bawhchhiahna te, khawtlang boruak ralmuanna tichhe zawnga chetna thleng thin te chu zirchiang a, a tihremna tur a ruahmanna siam vat a tul thu vawiin thutkhawmnaah hian a sawi bawk a ni.

Vawiin thlirletna hun a tarlang danin Mizorama Police Station hmasa ber chu kum 1895 khan din a ni a, kum 1947 ah Police station 6, Aizawl, Lunglei, Siaha, Kolasib, Champhai leh Tlabungah din phalna hmuh leh a ni. Kum 1973 khan 1st Mizoram Battalion Armed Police din a ni leh ta a. Tun dinhmunah Police District 11, Armed Battalion 3, India Reserved Battalion 5, Police Traning School 1, Traffic Unit 1, Security Unit 1, Intelligent Unit 3 leh Mizoram Police Radio Organisation (MPRO) 1 a awm mek a ni. Mizoram Police hnuaiah hian Sanctioned Post 12,189 zinga 7,685 chu hnawhkhat a ni a, heng zinga 158 chu Gazetted Officer an ni a, 2,409 Un-armed, 4,424 Armed, 179 Ministerial Staff, 23 Stenographer, 8 Computer Operator leh 484 MPRO an awm mek a ni.

Vawiin Mizoram Police hnathawh dan thlirletna hun ah hian Mizoram Police tihchangtlun leh thawmthatna tura rawtna hrang hrang lutte ngaihthlak a ni a. Chung zingah chuan Police Sub Division, Police Station, Police Outpost leh Police Beat Post thar siam rawtna te, ramria Border Police Station siam belh tura rawtna leh Border Outpost awmsa thawmthat dan turte sawi ho a ni a. Police hmunhma hrang hrang thawmthat dan tur leh Police-te taksa hriselna vawngtha tura ruahmanna kalpui dan turte sawi ho a ni.

He hunah hian Addl. DGP, Meenu Choudhary, PHQ-a senior Police Officer-te leh Home Secretariat-a senior Officer-te an tel a ni.