Aizawl | June 20, 2025: Vawiin ni 20.06.2025(Zirtawpni) Dar 2:00pm khan Central YMA chuan Central YMA Hall ah Myanmar Raltlan hruaitute kokhawmin infuihtharna hun an hmang a; Mizoram hmun hrang hranga Myanmar raltlan hruaitute an kalkhawm.
He hun hi CYMA Vice President Prof. Lalnuntluanga, in a kaihruai a, Pu Fabian Lalfakawma, Asst. Secretary in inhmelhriattirna hun a hmang.
He huna thusawitu CYMA Gen. Secretary Prof. Malsawmliana chuan tun dinhmunah Myanmar atanga sahimna zawnga awm mek te hi mi 27,751 an nih thu sawiin “raltlante chu an awmna khua leh veng in inkaihhruaina an siam te leh Sawrkar thuchhuah te ngaipawimawh a zawm theuh turin a chah a. Raltlante zingah ruihtheih thil leh sualna danga inhnamhnawih te dim an nih dawn loh thu leh dan hmanga hrem zel an nih tur thu te, Sawrkar ruahman anga Temporary ID Card nei vek tur te leh India khua leh tuite chauhin an neih theih Adhaar Card, EPIC, Driving Licence etc.te neih tum talh lo turin a chah bawk.
Raltlante chu kan unaute an nih angin harsatna an tawh leh puih an ngaihnaah YMA chuan a puih zel tur thu leh a thlahthlam dawn loh thu a sawi bawk.
CYMA President Lalhmachhuana pawhin thusawiin, Mizorama raltlan te dinhmun chungchangah infuihthar tulin kan hria a; boruak muanawm tak hnuaia kan awm theihnan mahni camp-ah theuh lo infuih thar turin a chah a, hnam bil leh chi bil boruak siam lo turin a chah bawk.
He hunah hian Aizawl District Bawrhsap Er. Lalhriatpuia'n Sawrkar inkaihhruaina hrang hrangte a sawi a, Pu Stephen Lalrinawma, Sr. SP CID (SB) in India citizen te chauhin an neih theih Adhaar Card, Driving Licence etc. te neih tum lo tur in a chah a, ruihhlo a sumdawnna a inhnamhnawih lo turin a chah bawk. Pu VL Vura Ralte Asst. Commissioner, Excise & Narcotics Dept. pawhin raltlante chu ruihhlo a inhnamhnawih lo tur leh ruihhlo do kawnga thawhpui turin a sawm a ni.
Raltlan hruaitute pawhin thusawina hun an hmang bawk.
He hunah hian Aizawl leh Mizoram hmun hrang hranga Raltlan Camp- a awm hruaitute, Raltlan pawl hrang hranga hruaitu leh Chin Hills- a MP leh MLA te engemaw zat an tel a, an vaiin mi 60 chuang an tel.
Post a Comment
He post chungchanga i ngaihdan lo sawi ve rawh: