Aizawl | June 21, 2025: MZP chuan Mizoram-in a remna leh muanna kan neih champhaphak vawi 39-na, 'Remna Ni 2025' lawm leh turin a inbuatsaihna a kalpui mek a. June ni 30 (Thawhtanni) hian Lammual-ah a hmang leh dawn.
MZP chuan Zoram mipuite Remna Ni puala, Pathian hnena remna avanga lawmthu sawi tawngtaina nei theuh turin a ngen a. Hun hmanna Lammual-ah tel vek turin a sawm nghal bawk a ni.
He hunah hian Mizoram Chief Minister Lalduhoma chu khuallian a ni ang a, Sikul hrang hrangin cheraw kanin, zai leh lam leh thusawina bakah lemchan te a awm ang. Council of Churches in Mizoram General Secretary Rev. Dr. Lalhmangaiha'n hunserh a hmang dawn a ni.
MZP chuan Mizo mipui zawng zawng he hun hmang tur hian a sawm a, sawrkar mi pawimawh, NGO hrang hrang, kohhran hrang hrang, zirna in zawng zawng leh Politicial Party tinte he hun hmang tur hian a sawm a ni.
Remna kan neih hi kum 39 lai ral tawh mahse a hlutna a la ngai renga, kum 20 teh meuh hreawm leh harsa taka Mizo mipuite kan awm hnuah Mizo mipuite tawngtai chhuah a nih avangin, theih ang tawka lawm hi a phu a. Zirlaite phei chu a hlut zia leh Mizote hun pawimawh a nih zia kan inhrilh thar zel a tul takzet a ni.
Remna Ni hi Mizo mipuite tana hun pawimawh em em, lungrual taka lawm ho tur ni mahse; a bik takin political party-te ngaihdan a inang lo fo a. Remna Ni-ah kan inhnial nasa thin hle a. Hun pawh kan hmang ho hlei thei lo a ni ber. Chuvangin MZP chuan hei hi a vei hle a, political party awn lam nei lo Zirlai pawl chuan kum 2018 atangin kumtin Remna Ni hi a buatsaih ta ziah mai a ni.
MZP buatsaihna hnuaiah Party hrang hrangte pawhin lungrual takin hun kan hmang ho thei ta zel a. A hun laia Sawrkarna fawng chelhtu apiang an in ti neitu lo thei lo a. MZP chuan lawmawm a ti hle a. Hun lo kal zelah pawh Remna Ni hi Mizo mipuiten lungrual takin hmang ho zel thei ila tih hi a duhthusam a ni.
MZP chuan Remna Ni-ah hian, Remna atana thawhhlawk mi hrang hrang a lo chawimawi tawh.
Chungte chu:-
2018: Lal Thanhawla, Laldenga, Lalkhama (IAS Retd.)
2019: Rev Dr HS Luaia, Rev Dr Zairema, Rev Dr Lalngurauva Ralte, Lalduhoma (tuna CM nilai hi)
2022: Rev Dr Lalsawma
2023: Mizoram Kohhran Hruaitute Committee
2024: JH Rothuama, P Lalupa, Lalthanzauva, Ngurchhina
Kuminah erawh chuan chawimawina a pe chhuak dawn ta rih lo a. Hun lo kal zel turah erawh chuan la sem zel tura ruahman a ni.
MZP chuan Remna Ni hi hetiang hian a lo hmang tawh:-
2018- PUC Multipurpose Hall
2019- Lammual
2020- Ignite Studio, Khatla
2021- Covid avangin hman ani lo
2022- Aijal Club
2023- Vanapa Hall
2024- LPS Arena
2025- Lammual
• • • • • •
[Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: