Ruahmanna thar: 'Patient' 1000 chuang aṭangin 500-ah, thla 12 course aṭangin thla 6-a chawhrual...
*~ Zoa Tlau (14.05.2025) Zing dar 8:25*
Buannel Cabin
Nizana Zonet Cable TV-a chhuak, ni 12.05.2025-a 'record', Ṭawngṭai Bethel Camping Centre (ṬBCC) hotupa Pu TT Zohmingthanga (Zohminga) leh Advisory Board Member pahnih; Rev. K. Lalzuala, Synod Moderator hlui leh Er. C. Lallunghnema, PHED Chief Engineer-a 'pension' te 'interview' kha uluk takin ka lo en a. A ngaihnawmin a bengvartlak hle mai. 'Mipui Titi Siamtu ṬBCC-a Thil Thleng' tiin 'programme' hming hi vuah a ni.
YouTube lama Zonet Channel-ah an dah avangin ka ennawn ngun hlê a. Zawhna zawttu ṭhianpa Lalnunṭawma Fanai (Manuna tia kan koh) khan zawhna fing leh hrawl hreih hrawih a ngah a, a zawt thiam hle a, a ti ngaihnawmin fak a hlawh hle.
*500 chauh an la thei tawh dawn:*
'Interview' aṭanga thil pawimawh tak pakhat lo lang chu ṬBCC-ah hian Advisory Board Member te pawh hian 'patient' awm hi an tam mah mah an lo ti ru reng ṭhin a. Buaina leh harsatna an tawh ring chungin an ṭha en tawp a. Tun hi an thleng ta a ni.
Ruihhlo leh ruihtheihthilin a tihbuai mi 1,000 chuang zet te an enkawl a, an hmunhma pawhin a zo lo a ni ber a. A enkawltute pawhin an enkawl zo hek lo. Tunah chuan 500 chin chauh lâk an tum ta a, bul an ṭan ṭha dawn a ni. An hnehsawh ngeiin i beisei ang.
*ṬBCC hotupa a dik lohnaah a inpawm:*
Zawhna zawttu hian a thiam khawp a, a hriat duh 'point' zêlah a luhpui thei a. A dik tâwk lohna a inpawm em tih lam hawia a zawhna chu Pu Zohminga chuan a inpawm thuin a chhang. Hei vang hian ruahmanna thar nen an chhunzawm dawn tih an sawi. Advisory Board Member-te pawh hian an 'capacity' tlin 'patient' la tawh lo turin Pu Zohminga pawh an hmin tih an sawi a. Amah Pu Zohminga pawhin 500 chin bak chu an lâk theih tawh loh tur thu kimchang takin a sawia CYMA, Excise adt. pawhin an nawr luih a rin loh thu a sawi.
'Course' rei lutuk; drugs ngawlvei tan thla 12, zu tan thla 10 an tih pawh chu thla 6-a chawhrual vek a nih tawh tur thu an sawi bawk.
Thil thar an sawi te hi Board member tam zawk te nen an la sawiho anga an pawm tlan ve phawt erawh a ngai dawn thung. An pawm tura ngaih a ni.
*Pawisa leh Home mamawhna:*
Kan ram dinhmun en hian ṭhalai sang chuang rual ruihtheihthil vanga Home pakhata an han awm ringawt mai te hi lungchhiatthlak deuh a ni.
ṬBCC hi a inziak danin 27.01.2005-a din a ni a, tuna an awmnaa an inbenbel tak takna tur hian Congress hunlaia cheng nuai 200 an pêk kha a ni deuh ber ang. Kum tin Krismas dawnin pawisa fai cheng nuai 12-13 te an dawng niin Pu Zohminga hian a sawi bawk.
Kan 'society' hian ṬBCC te ang hi a mamawh takmeuh meuh a, tunah pawh sêlna leh hlauhthawnna nasa tak avangin Pu Zohminga hian mahni thuin a duh chu ab chhuak thei a, a duh an la awmzui thei a ti a. An chhuak nasa êm êma mi 66 chauh an awm tawh! A chhuak te chu damdawi hmansual avanga nunna chân lo turin a chah. Chhuak zinga pathum chu Drugs OD ni ngeia ngaih turin an thi tawh thung.
CYMA, Branch YMA, Police leh Excise lam pawhin ṬBCC hi an mi khawm te dah nan an hmang nasa a. Veng chhungah nu leh pa ten an fate an enkawl zo lo a, YMA te leh Police te kovin an fate ṬBCC-ah hian an dahtir ṭhin tih te kan hriat a ṭul ve bawk. Heti tak hian kan mamawh chu a ni si.
'Central' emaw, 'Foreign' aṭangin emaw ṭanpuina an dawng lo. Social Welfare Dept. chuan hmanah chuan ṭanpuina an pe ṭhina mahse an dawng ngai tawh lo. A manganthlak châng a tam dawn teh e!
*Sêlna leh anmahni:*
Pu Zohminga te phur hi a rit em em tih a lang reng a, an hnathawh hi ropui tak a ni. Chutih rualin an zawh loh mihring an la a, a enkawlna lamah 'expert' an nei lo bawk. Hei mai a ni lo a, Security aṭanga Medical i/c thlengin 'addict' tlêma ziaawm tawh deuh an hmang hian inenkawlnaa 'administration' a tichhia tih a hriat a ni. Sawi tur a tam khawp mai.
*Buhfai man kha a sawi sual/tam mah mah em:*
Zonet interview-ah khan Pu Zohminga khan an buhfai eina man zat kha a sawi uar hlek em a tih theih. An hautak turzia leh a enkawltute fakawmzia chu kan hre ṭheuh ang.
Vawi khat chaw eiah ₹ 55,080/- man te an ei niin a sawi a, a bag-in a sawi avangin a Kg zat erawh a hriat loha bag 18 te an chhum a, sa an hmehin bag 20 te a zo!
Pioneer Canteen aṭangin buhfai bag 1 ₹ 1,530-a an lei thu te, a changin BPL quota a tih mai, Welfare Institution Quota, chu thla 1-ah quintal 132 te an lak thu a sawi. Hei hi Kg 1 ₹ 6 man chauh a ni.
Pioneer Canteen-a a man to hleka buhfai bag 1 ₹ 1,530-a an lei anga a insawi ang hian vawi khat chaw eia ₹ 55,080/- man bag 18 an ei a tih hi chhût chuan ₹ 55,080/- hian bag 36 lâi a lei theih thung. Bag 18 lêta tam a lei theih, ni khat tla a nih zawk hmel, vawi khat ni lovin.
BPL quota-a thla 1 quota an lak pawh hian quintal 132 an la theiin a insawi a, hei hi Kg chuan Kg 13,200 tihna a ni a. Buhfai Kg. 13,200 into ₹ 6 chu ₹ 79,200/- tihna a nih chu. Vawi khat chaw eia buhfaia an senso a sawi kha chu a dik chiah lo a ang. Ni 2 chhungin buhfaiah ₹ 2,00,100/- a tih pawh hi a turu mah mah. In chhût thiam tawh maiin a rinawm.
*Tlangkawmna:*
Engpawh ni se, Mizoramah hian Kohhran leh NGO ten ṭan lak zual kan mamawh hle mai. Drugs la khawih ve lo ṭhalai te venthat te a pawimawh ang. Ṭhalai te an him nana nasa taka tha leh zung kan sen zual a ngai a, kan hun pawh kan hman (invest) tam a ngai takzet e. 'Awareness' nasa leh awmze nei zawka kalpui nasat kan mamawh.
Tuikual Kohhran hian Recreation Centre hi an Biak In hnuaiah an siam a, an entawntlak hle mai. Mipa 25/26 chu an 'capacity' a ni. Kohhran dang dang pawh hi pawisaah chuan kan buai lovin a lang a, Recreaton siam hi intihhmuh a va ṭha dawn ve le!q
Kan ram hian vei tur dik tak kan vei a hunzia ṬBCC boruak aṭang hian kan hmu fiahin a rinawm. Tun boruak hi kan harh thar leh nana Pathian remruat te pawh a ni thei hial ang. ṬBCC ngei pawhin insiamṭhatna atana anmahni vaw harhtu atan an pawm theih phei chuan rahṭha a thleng mêkah i ngai ang u.
• • • • • •
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: