RIPANS-ah Continuing Nursing Education program hmang

Aizawl | May 14, 2025: Regional Institute of Paramedical and Nursing Sciences (RIPANS) a Final year M.Sc Nursing zirlaite chuan vawiin khan RIPANS Conference Hall-ah ni hnih awh tur, Continuing Nursing Education program khuhhawnna an nei.

He program thupuiah ‘Investing in Nurses, Investing in Health: Empowering the future of healthcare’ hman a ni a, Health Minister Lalrinpuii chu khuallian niin, RIPANS Director Prof Dr Sanjay D Sawanta-in a kaihruai a. RIPANS College of Nursing Principal incharge C Lalramdini'n inlawmna thu a sawi.

Khuallian Lalrinpuii chuan RIPANS chu Hmarchhak Nursing zirna changtlung ber anih thu sawiin, Nurse te chu mipui te hriselna enkawlna kawnga pawimawh ber an nih thu a sawi. He program hi Nurse te intuaitharna leh than zelna atana duan a ni. Nursing zirna in leh Damdawiin hrang hrang atangin, Nursing zirtirtu, Senior Nursing Officers leh Nursing Officers 30 ten ni hnih chhung training hi an nei ang.He training program ah hian topic hrang hrang zirtirna nei turin mi thiam bik pangate sawm an ni.

INTERNATIONAL NURSES WEEK (May 6 - 12) pualin College of Nursing, Regional Institute of Paramedical and Nursing sciences, leh Millenium Development Authority tang kawpin, May 9 khan Millenium Centre-ah mipui te tan hriselna kawnga inzirtirna te, San zawng leh rih zawng teh te, Blood pressure leh Zunthlum checkna hun an lo hmang tawh bawk a ni.

RIPANS hi Ministry of Health & Family Welfare, Govt of India hnuaiah 1996-ah din a ni a. North east state hrang hrang atangin Zirlai 800 chuang awmin, Bachelors programme 5 a awm a, Master programme 3 leh PhD zirna programme 1 a awm mek a ni. Physiotherapy leh Nutrition & dietetics programme hawn belh tura hmalak mek a ni a. Khum 100 awmna damdawiin hawn thuai tum a ni bawk.