OPERATION HEROF 2.0. TUTE NGE BALOCH LIBERATION ARMY CHU?

byAdmin — 0
- Zairemthanga



Aizawl | May 14, 2025: India leh Pakistan inkara buaina a chhuah veleha thawm rawn nei lian ta vak Baloch Liberation Army-te chanchin hi sawi tura ngenna a awm leh thin a, India leh Pakistan-in boruak an neih ve reng si avangin kan sawi hman thin lo a ni. Boruak tlema a daih deuh takah chuan leh Pakistan lam ti buai rengtu an nihna laiah pawh an chanchin hian chhui chian a phu ve hrim hrimin niin a lang. A zawng zawng chu hre lo mah ila, a tlangpui zawr zawr tal tar lan kan tum dawn a ni.


Youtube video embed a ni a, a link - ah en theih a ni bawk e.

Tunah hian Baloch Liberation army te hian zalenna (independence) an puang a. Mahse, khawvelin a la pawmpui rih lem lo. Pakistan phei chuan a pawm lo lehzual. Pakistan Army chief Asim Munir phei chuan, 'engti kawng mahin zalenna an hmu lo ang a, an inla hrang hek lo ang. Pakistan ram ti mawitu, kan lal lukhum ang an ni' tiin a lo sawi tawh. Tuna Baloch-te ram hauh chin hi a zau hle a, Pakistan ram chanve dawn an hauh a ni. Zalenna an sual chhuah tak tak phei chuan Pakistan chu a te hle tawh ang.


OPERATION HEROF 2.0
Baloch Liberation Army te chuan Pakistan-a hmun 7-laia inbeihan chhuak chu Operation Herof 2.0 hnuaia an tih a nih thu an sawi a, Security post te, motor te, Intelligence agents te chu an tum bik thu an sawi bawk. Zalenna tluantling an hmuh hma chu an chhunzawm zel thu an tiam bawk.


Baloch-te hian Panjgur-a sipai hmunpui an beihnaah sipai pahnih an that a, panga an hliam a, Noshki area ah Pakistani intelligence agents pali an that bawk. An mi thahte hi Moin, Pakpattan mi, Huzaifa Pakpattan mi, Imran Ali leh Irfan Ali Raheem Yaar Khan-a mite an ni. Operation Herof 2.0 hnuaiah hian hmun 58-ah inbeihna vawi 78-lai a chhuak tawh a. Baloch thu puangtu Jeeyand Baloch chuan 'Pakistan hnuai atanga kan chhuah hma loh chuan kan tawpsan lo ang' a ti a ni. Ornach Cross highway Khuzdar District-a mi pawh an thu hnuaiah an dah tawh a, motor checking thlengin an kutah a awm vek tawh a ni. Pakistan sipaite'n Paroom jain area-a camera an vuahte pawh an laksak vek tawh a, Pakistani army bomb disposal squad-mite Garap area, Kalat-ah lo beiin sipai pahnih an thi bawk.


Baloch tana zalenna sualtu Baloch Liberation Army te hian Sibi Rail station-a sipai post pawh bomb vawm chi, hand grenade hmangin an bei a, Mathri a Pakistan sipaite post pawh beiin sipai 3-in nunna an chan. Inbeihnaah hian Automatic weapon leh rocket launcher te an hman thu an sawi. Baloch-te hian khawvel ram hrang hrangte chu Pakistan laka hma la turin an ngen a, Pakistan chu 'khawvela firfiakte inthlah punna hmun' ti-a sawiin Islamabad pawh 'firfiakte khawpui a ni' an ti a ni. Baloch-te hian beihpui an thlaknaah hian Kech, Panjgur, Mastung, Quetta, Zamuran, Tolangi, Kuluki leh Nushki area te an bei a, Pakistam sipaite leh intelligence agency te chauh ni loin Police station te, highway te, building lian deuh deuhte leh leilung hausakna lam phurtu lirthei thlengin an bitum vek a ni. Implosive explosive device (IED) leh ralsai silai (sniper rifle) te chu beih nana an hman nasat a nih thu an sawi.


Baloch-te hian South Asian ramte chu Lashkar-e-toiba leh Jaish-e-mohammed te ang state sponsored terrorist te pian chhuahna hmun niin an sawi a, keini chu 'thlir mai maitu kan ni lo a, nghet taka ding party kan ni' an ti a ni. Balochistan lam hian an sawi danin kum 1948 khan an duh reng vang ni loin Pakistan ah rin luh an ni a. Inthlannah pawh eng mah thu neihna nei ve loin an ram leilung hausakna atanga hlawkna an tel ve lo a, sawrkar tanpui firfiakte'n te'n mi tam tak an that a, sipai erawh hmuh tur an awm ngai lo niin an sawi bawk. Tuna India leh Pakistan-in inkahhai an puan chungchangah pawh, 'remna zawnga inbiaknate, inkahhaite, Pakistan nena inunauna tih velte hi chu an hlawkna tur an ngaihtuah vang leh verther tak ruahmanna an siamna vek a ni' tiin India chuan Pakistan lam thu awih lo turin an duh. Baloch Liberation Army hi Baloch mipuite'n zalenna an neih nan leh anmahni puala sawrkar hran an din theih nana silai kenga hmahruaitu ber an ni.


Balochistan hi leilung hausakna ngah tak an ni a. Mahse, Pakistan ah chuan Province rethei leh hmasawnna hmuh tur tlem berna an ni thung. Baloch Liberation Army te hian an hlawkna tur a awm dawn loh chuan leilung hausakna hai chhuah an phal tawh lo a, an dikna chanvo rah behsakah inngaiin Pakistan sawrkar hi an dem thin hle a ni. ANI, Amnesty international leh human rights watch te'n an tar lan danin Baloch activist te, Journalist te, zirlaite leh politician te chu an ru bo fo a, Pakistan sipaite pawhin an that fo tawh tih an sawi. Chung mite chu 'hel emaw, firfiak' tiin an chhuah ta thin a. An chhungte'n rorelna dik an aupui thei ngai lo.

Baloch Liberation army te hi USA, UK, IRAN, CHINA, EUROPIAN UNION leh UNITED NATIONS te chuan firfiak pawlah an puang a. India erawh chuan a puang ve lo. A chhan chu India hian a tanpui niin ngaih a ni a, India erawh chuan a pha thung. Tuna an Leader hi Bashir Zeb a ni a, Baloch hian Pakistan leh China chu an do leh an huat ber a ni. Tunah hian Baloch te hian an ram hauh chin hmun thuma thena hmun khat chu an thunun fel tawh niin an sawi a, an hnam puanzarte pawh an zar tawh a ni. An hmunpui ber, an ralrelna ber an Hqrs erawh Afghanistan-a Kandahar khawpuiah a awm thung. Tin, Taliban pawhin an pui reng niin sawi a ni. 

A dintu tak hi Misha leh Sasha an ni a. Hei hi an hming tak ni loin an code name a ni. 10th February kum 1973 Pakistan khawpui Islamabad ah Iraq embassy chu Police leh sipaite'n an dap thut a, hemi tum hian Iraq sawrkar pawh an hriattir lo. Chutah chuan 'Foreign Ministry, Iraq' tih chuanna silai leh a mu thahnem tak bakah bomb eng emaw zat an man tel a, Baloch helte ta tur ni ngeiin an hria a ni. Tichuan, Iraqi ambassador Hikmat Suleiman chu 'kan mikhual thei tawh lo e (persona non grata)' tiin a thawktu dangte nen an hnawtchhuak zui a. Pakistan President Zulfikar Ali Bhutto chuan US President hnenah lehkha thawnin India leh Afghanistan an inrawlh ngeia a hriat thu a hrilh a ni. Iraq sawrkar leh Soviet Union pawh a ringhlel tel bawk a.


Kum 2004 khan Baloch Liberation Army te hian an province-a Baloch hnam ni lote chu thah mang vek an tum ta a, Baloch ni lo hnam tlem zawkte tam tak an that a ni. 7th April 2006-ah Pakistan chuan BLA te chu firfiak dik tak tiin Dan pawnah a hnawl zui ta nghe nghe a, hemi hnu hian ram hrang hrangin an hnawlin an puang zui ve nghal bawk. Ni 15th April 2009 khan khatih laia Boloch hotupa Brahamdagh Khan Bugti chuan Balochistan huam chhunga Baloch ni lo reng reng chu thah vek turin thu a chhuah leh a, hemi tum hian Punjabi te, Pashtuni te leh Sindhi hnam te bitumin mi 500-chuang an that a, anmahni tih ngei a ni tih an puang zui bawk. 

Kum 2010 a ni a, zirna In leh college bakah zirtirtu leh zirlaite an bei leh chiam a, kum 2019 khan Chinese mite an bei leh chiam bawk. US phei chuan an thil neih eng mah khawih chet theih lohin a hrensak nghal vek a ni. 26th April 2022 khan Shari Baloch, kum 30-mi Science zirtirtu fa pawm lai pahnih nei chuan University of Karachi-ah a bomb pai a ti puak a, Chinese zirtirtu pathum a thih chilh a. Hei hi Baloch te chuan anmahni lam atanga hmeichhe thih chilh bomb ti puak hmasa bertu tiin an sawi. 9th October 2024-khan Quetta a Rail station an bomb leh a, mi 32-lai thiin mi 63-in hliam an tuar leh a ni.

Heng bakah hian hmun hrang hrangah nasa takin pawi an lo khawih tawh thin a, an pawi khawina zawng zawng phei chu record-a chuang chin record pawh sawi sen a ni lo. Record-a awm lo nen phei chuan a tam turu lutuk. 

14th December 2006 khan Kohlu District ah khatih laia Pakistan President General Parvez Musharraf in a tlawm tumin Paramilitary Camp-ah rocket paruk ngawt an kap a, Musharraf hi a him hlauh a ni.

14th June 2009 khan Baloch hnam hla sak a duh loh avangin Zirtirtu pakhat Anwar Baig chu Kalat-ah hmai tuamin a kap hlum. Hetia an chet chhaan hi Pakistan lam awn reng reng chu an duh lohzia lantir nan a ni. 30th July ah Pakistan police 19 lai mai an ru bo a, pakhat thatin 16 in hliam an tuar.

21st November 2011 ah BLA te hian Sawrkar hnuaia thawk veng himtute chu Musakhel District ah an bei a, mi 14 thatin mi 10-in hliam an tuar a, BLA lam chuan mi 40-thatin an insawi thung. 31st December-ah Baloch Politician pakhat chenna In chu thih chilh bomb hmangin an bei a, mi 13-thiin mi 30- laiin hliam an tuar. Sawi tur a tam turu lutuk a, duh tawk dawn mai teh ang. Pawi khawihna za telah Baloch te hi an inrawlh tawh a ni.

India in pakistan nena insumdawn tawnna leh bungrua inthawn hrim hrim pawh a tih tawp leh Indus ater Treaty a suspend avang ringawt pawh hian Pakistan hi tal buai hle tura ngaih a ni a, Paracetamol mum khat pawh la siam thiam loa an sawi Pakistan hi damdawi lamah pawh a buai viau tawh a ni.  India siam chhuah thil tam tak ei leh in lam thlenga la lut thin a ni bawk nen, China, US leh Turkey auh ruai bak chu tih theih a nei rih lo a ni.

Ngaihtuah zui ngai awm ta chu hei hi a ni. India leh Pakistan kan buai a, Pakistan lamin inkahhai an rawt a, US phei chu langsar takin a inrawlh bawk a. Donald Trump phei chuan amah vang liau liaua inkahhai puang an nih thu a sawi chamchi reng a ni. Nuam a ti ham ham khawp mai. India leh Pakistan chuan inkahhai chu an han puang ta ngei a, US leh China te puihna avangin International Monetary Fund atangin billion khat zet a puk sauh sauh bawk a. He laiah hian Mizo zingah pawh sap ngaihsanna reh thei lo ti mai ila, a bikin US ngaisang em emte chuan US hian inrawlhna a neih an ring duh lo lui tlat a. Mahse, US hian voting share hi International Monetary Fund-ah hian a ngah lawtlak a, za zelah 16 chuang a nei a ni. Chumi vang chauh chuan Pakistan hian Loan billion khat hi a la thei tih rinhlelh rual lohin a ti chiang a ni. 'ka duh lo' tiin vote a thlak theih loh a, duh chuan an vote a, duh lo chuan vote thlak loh tawp a ni mai.

Eng nge ngaihtuah ngai chu kan tih chuan hetianga thil a kal chhoh danah hian Pakistan hian Balochistan lam hawi rih deuh a duh niin a ngaih theih a, India nen a do kawp chuan a chan chau nasa dawn si a, an ram hawlh phel tumtu Baloch Liberation Army-te hi ralthuam tha zawk leh sipai tam zawk nen a beih a rinawm ta hle. India-in Pakistan laka chet a lak rih loh chuan Pakistan tan chuan chet lakna hun remchang tak a ni ngei ang. Mahse, Pakistan tan pawh a hautak dawn. Taliban-in Baloch Liberation Army-te hi an thlawp tlat si a, kan sawi tawh angin pha mah se, India hian a tanpui ru ve reng thei tho bawk si a, Pakistan tan pawh zuam em em chi chu an ni bik lo ang. Chutah a ram chhung a nih miau avangin Bomb han thlak ulh ulh leh Laipui hmanga han sai dup dupte kha a rem lohna chin a awm dawn bawk si! 

Pagla hisap deuha ngaihtuah chuan India hian kap reng sela, PoK lak tumin bei reng sela, Baloch lam hi a siruk lain thawk bawk sela, Talibante'n pui bawk sela, Pakistan chu chiang takin a phel sawm ngei ang. Nuclear hman han tum ngawt dawn se, tu ram mahin an rem ti dawn si lo a, khawvel MAP atangin Pakistan chu nuai boin a awm mai dawn dawn bawk si! chuvangin Pakistan hian a pu US chu a tlawn ang a, inkahhai chungchangah India nawr turin a lo ti vek a ni ang tih a rin theih viau a ni. US hian a nihna takah chuan a kaw tawpa trang mek a tupa Pakistan tan theihtawp a chhuah dawn tih hi a hriat reng. A ram siam leh a chhuan em em F-16 jet fighter pali vel India hian han kap thla phei se chuan US chu a satin a sa hut hut thei ang. 

India leh Pakistan inkar buaina hian ziaawm lam panin inkahna chu lo reh pawh ni se, Pakistan erawh chuan a ram chhung ngeiah kaptu a la neih reng dawn avangin a buai hun chhung a la rei hle lo ang tih a sawi a theih loh. Mahse, US leh China bawk hi Baloch tan pawh an chimawm lehin a rinawm. An sipai thate pawh an tir lut loang tih a sawi theih loh. Firfiak Pawl (Global terrorist Organisation) ah Baloch-te hi puan an ni bawk si a, US leh China te hi an inthlahrung lo mai thei.

Eng pawh ni se, kan Pathian thuin a sawi angin Ni hnuhnungah chuan ram leh ram, hnam leh hnam indo tur thute a lo sawi diam tawh a, a pawimawh ber chu 'kan chatuan hmun tur khawiah nge?' tih hi a ni mai. Khawvel hi tawp rih lo mah se, keimahni hi tawp thut thei vek kan nih avangin kan inbuatsaih lawk kha a pawimawh ber awm e.


(Thangchhuahdiar Youtube channel hi i lo subscribe ve dawn nia. - Editor )








• • • • • • 


[Subscribe telegram channel for updates- https://t.me/exploremizoramchannel ]

(Feedback at: admin@exploremizoram.com )

[For Ads - Contact +919402125273 ]


Tags:

Post a Comment

He post chungchanga i ngaihdan lo sawi ve rawh:

Post a Comment

He post chungchanga i ngaihdan lo sawi ve rawh:

Previous Post Next Post