INNGAIHTLAWMNA CHUAN INLAICHINNA ṬHA A SIAM

_Hringnuna Damna Rahbi_

- Rick Warren

- Mar 4, 2025

“Elrel leh inngaihhlut avanga engmah ti lovin, mi tinin inngaitlawm takin mahni aiin mi dang tha zawkah ruat theuh rawh se … He rilru, Krista Isua pawha awm bawk kha, nangmahniah awm rawh se; ani zawngin Pathian anga awma Pathian tluka awm chu thil thlakhlelh hleih theihah a ruat lo va.” Philippi 2:3, 5-6.

Inngaihtlawmna hian inlaichinna a siam. Eng nge inngaihtlawmna chu? Mi dang i chawimawina, nangma tana tha tur pawh ngaihtuah lohna hi a ni.

Kawng lemah chuan, chapona, hian inlaichinna a tichhia a – kawng hrang hrangin a inpho lang thin a ni. Chapona chuan rilru khermei, mi dang chunga ngaihdan siamna, inelna rilru leh mi dang ngaihdam theih lohnaah min siam thei a ni. Thufingte 16:18 chuan, “Chapona chu boralna hmaah a kal a, rilru intivei chu tlukna hmaah,” a ti.

Chapona hi mahni inbumna a ni. I nun a lo chapo viau chuan, mahni inhmuh a harsa a. Nimahsela, mi tu pawhin an hmu thei thung che a ni!

Inlaichinnaah chuan chapona chu eng nge ni? Mi dang thurawn i pe fo thin a, nang erawh chuan i hnar thung si. Nunah harsatna a thlen phei chuan pawm harsa i ti lehzual a ni. Mi tu pawhin, “Tunkar chu a harsa khawp mai,” an tih pawhin, harsatna hrang hrang i nei a ni tih hi i pawm thei lo zawk a ni.

Inngaihtlawmna chu inlaichinnaah chuan engtin nge a thawh chiah? 1 Petera 3:8 – ah inlaichinna siamtu kawng nga a awm a, “In zain rilru hmunkhatin awm ula, inlainat tawn ula, unau angin inhmangaih ula, khawngaihna nei ula, thuhnuairawlhin awm rawh u.” A hmasa palite hi a panganaah hian a innghat vek a ni: Thuhnuairawlh ula. Hei hi inlaichinnaah chuan kan entawn ber tur a ni.

Engtin nge inngaihtlawmna chu i nunah a thlen ang? Isua’n i ngaihtuahna, i rilru, i ngaihdan leh thiltihte a thunun chuan a thleng ang. Inngaihtlawmnaa than zel hi Isua duh dan a ni.

Inlaichinna kawnga kan hriat tur chu: I hun hman tamna mite ang zelin i khawsa tih hi. Mi thinchhe deuh bula i khawsak chuan i thinchhe ve ang. Mi hlim thei tak bula i khawsak chuan i hlim ve zel ang. Inngaihtlawmna nun neih i duh chuan, tawngtai leh a thu chhiarin Isua bulah awm thin ang che. Amah chu bia la. Inlaichinna neihpui che a duh a, he khawvelah inngaihtlawmna hmanga zir tur a hnutchhiah chu zirtir che a duh a ni. 

Inngaihtlawmna nun neih chu thil harsa tak angin lang mahse, Isua nen chuan tih theih a ni. Isua hrechiang turin rahbi hmasaber atan inngaihtlawm zir la, tichuan, inlaichinna tha siamtuah a chhuah ang che.

 

Ngaihtuah zui atan

* Chapona chu i nunah, te tak te, lang tham si loin engtin nge a lo lan thin?

* Nangma nunah, inngaihtlawmna nena nung thin leh Isua nena nung thinte inzawmna engtin nge i hmuh? (Isua nena in inzawm hnuah engtin nge i khawsak han ngaihtuah teh)

* Inngaihtlawmna nun nei tlat thin han ngaihtuah teh. Engtin nge thuhnuairawlhna nen an din tlat thin?

[Lettu: Sangpuia]