". . Research base veka hmala nghal tura intiam ten Kuthnathawktute leh Mizoram min Arkhawthim-dai pui mek...." - Lalnunmawia Chuaungo

". . Research base veka hmala nghal tura intiam ten Kuthnathawktute leh Mizoram min Arkhawthim-dai pui mek...." - Lalnunmawia Chuaungo

Vawiin March 1.2025 (Inrinni) khan Hrangturzo West Block huam chhunga kum 2025-a Village Council inthlan zawh fel taka VC thlan thar te leh Candidate te chawimawina hun VC House Lungchhuan-ah hman a ni a, he hun hi Pu Lalnunmawia Chuaungo, Senior Vice President, MPCC in a hman pui. 

Pu Lalnunmawia Chuaungo chuan, India zahawmna, kan ram, kan hnam leh kan sakhaw humhim kawngah Mizoram mipui harh a ngai tih sawiin, tunhnai ah Missionary te rik rapna a thleng nasa leh hle a. Hemi kawngah hian Mizoram in MP kan neih ten thlavang hauhna engmah an nei ngam lo. Kan state thenawmten an hnam leh an sakhua humhim turin an chiang, Central-a au ngam MP an thlang a, keini chuan kan ram leh hnam, kan sakhaw tana au ngam MP kan thlang ngam ve lo, a ti. 

Kan ti ve lo ang tih zawng zawng ti vek, an sawisel ang zawng zawng a taka ti ve leh vekah hian kalphung Thar hmuh tur a awm lo. Kalphung hlui aia chhe zawk kan hmu mek a. Kum khat em pawh an sorkar hma chuan an thil tih dan tha lo leh dik lo pawh hrethiamin a la hma a lawm, an tha ve leh mai ang, kan ti a. Kum khat a liam a, nikum aia fel lo leh dik lo zawkin mipui an kaihhruai a. Engkim Research base veka hma la nghal tura in zuar khan engkim an arkhawthim-dai vek a, an sorkar theihna kuthnathawktute hnena an intiamna in kawt-kaiah in thlai thar kan lei sak ang che u tih pawh, in khaw thenawmah rawn phur ula, kan lo lei ang tihna a lo ni. Hei vang hian Mizoram mipui, kuthnathawktute tan Congress party kan au chhuak a ni, a ti. ZPM sorkar dinhmun hi Mizoram mipuiin an hmuh dan a tleu laklawh tawh. ZPM party sorkarna tura a kul a taia tang te khan rilru in Congress hotute hnenah manganna an thlen chamchi tawh a. Local Council leh Village Council inthlan inbuatsaih lai khan Congress boruak a tha ber a. Campaign hlimawm takin a tawp kan khar a. Kan beisei phakbak result hmuin MP leh MLA inthlan aiin Local Council leh Village Council inthlanah Congress Vote share nasa takin a sang hial tawh a ni. 

Congress party chuan mi zawng zawng a huap a, a huam vek. Tuna party pakhat VCP thar chuan dinhmun pangngaia chhungkua an din theihna chhan chu NLUP a nih thu zep lovin a sawi. Hei hian Congress Party in thlei bik leh tih bik a neih loh zia a tichiang a ni. Heng hi Hruaitu tha, an thusawia dingnghet Congress in a neih vang a ni a, tunah pawh heti taka Congress party mipuiin rinna an nghah leh mek chhan chu hruaitu zui tlak Pathianin min pek vang a ni a, Hruaitu tha kan neih te thatna lantir turin zui tu tha Mipui kan nei a ni, a ti. 

Pu Lalnunmawia chuan, Sorkar meuh pawhin a intiamna a mangan pui sawhthing thehthang na a hriat loh chu Chief Minister-in home-ah te kan pe ang a, annin a tihral dan an lo ngaihtuah ang,  tih a sawi hian kum 20 chuang Sawhthing lo au pui tawh leh Research base veka hma la nghal tura in zuar khan engmah ruahmanna an neih loh zia a tichiang a, Sawhthing lei leh in chin tir kawngah kuthnathawktute ngaih a tha lo takzet a ni. Hetianga Mizoram mipui leh Kuthnathawktute rilru mumal pawh put tir thei lo, ram hruaitute chunga Rinna nghah ngam harsa khawpa thil a thlen chhan chu tihtur hlen chhuah aia thubelhchian dawl lo mipui hrilhtu te vang a ni, a ti. Heng zawng zawng hi NLUP changtlung zawk leh ruahmanna fel zawk nen kan nuai bo vek ang a. Mizoram mipui beisei sorkar tha hi mipui kan pe leh dawn a ni, a ti bawk. 

He hunah hian Congress party hminga Village Council Candidate-te leh thlan tlinte chawimawina thuziak leh pangpar ṭhi hlan an ni a. Pu Lalroenga, General Secretary MPCC, Pu C. Zodinliana, Chairman, Transport Department, MPCC, Pu T. Lalbiakchhunga, General Secretary, ADCC, Pu K. Lalnghinglova, Secretary ADCC, Pu Vanlalnghaka, Vice Chairman, Transport Department MPCC, Pu PC Malsawma, Vice Chairman, Transport Department MPCC, Pu Lalnuntluanga Tlomte, General Secretary, Transport Department, Pu Laltanpuia, General Secretary Transport Department MPCC, Pu R. Vanlalvena, General Secretary MPCC, Pu Lalnunsanga Ngente, Secretary Transport Department MPCC, Pu Ch. Vanlalpeka Secretary, Transport Department MPCC te leh Hrangturzo West Block huam chhunga Congress party worker thahnem tak an tel a ni.

.