HLAUHTHAWNNAIN INLAICHINNA A TICHHIA A. PATHIAN HMANGAIHNA CHUAN A TINGHET

Hringnuna Damna Rahbi

- Rick Warren

- Mar 5, 2025

“Hmangaihnaah hian hlauhna reng a awm lo va, hmangaihna famkim chuan hlauhna zawng zawng a hnawt bo zawk ṭhin… Hlauva awm chu hmangaihnaah a la famkim lo a ni.” [I Johana 4:18]

Hlauhthawnna chuan inlaichinna a tichhia. Mahse midang bula i nun i bunruah chuan, an tina mai thei che a, tun hmaa i lo tawnhriat ngai reng reng loh dan chuan nun thar i nei hlauh thei. 

Hlauhthawnna chuan engangin nge inlaichinna a tihchhiat theih? A chhan chu Inlaichinna thuk a neih theih loh. Inpawh taka khawsak i duh a, mahse inpawh leh lutuk chu i hlau bawk si, tihtak zetin i hlau thei hial awm e. 

Mite nena inlaichinnaah chuan hlauh eng emaw a awm chhung chuan in inzawm tak tak thei lo vang. I bialpa emaw bialnu emaw nena chen dun chu khua rei thlir chuan a fuh hauh lo. Dam chhung daih inpekna a ni lo tlat. Engtikah nge an kalsan dawn che i hre thei lo. 

Mahse hlauhna a bo theihna tur leh inzawmna – inzawmna nghet – chu mi pahnihin, “Eng thil pawh lo thleng se, kan inpumpek a ni. He inlaichinna hi vawn nun tlat kan tum a ni” an tih chiah chuan a inṭan ṭhin. 

In inlaichinnaah chuan engnge in hlauh? Miten i nihna dik tak an hriat chu i duh lo va, chuvang chuan i biru a ni thei. Chu chu hlauhna hmanlai aṭang tawha awm, Adama huna chhui let theih a ni, mihring hmasa ber kha. Ani chuan, “Saruak ka nih avangin ka hlau che, ka biru a ni” tiin [Genesis 3: 10] 

Hlauh i neih chuan him lova inhriatna i nei a, i nihna chu i bihruksan ṭhin. Thil engemawin i inkhuh a, i taksa mai ni lovin i rilru put hmang pawh i bihrukna tur bang i sa a, awm lo angin i lo inthukru ṭhin. 

Him lova inhriatnain inlaichinna a tihchhiat laiin hmangaihna chuan a tuam dam ṭhin. Hmangaihna chuan nangmah inthlir mai lovin midang a thlirtir che. Bible chuan I Johana 4: 18 ah hetiang hian a sawi, “Hmangaihnaah hian hlauhna reng a awm lo va, hmangaihna famkim chuan hlauhna zawng zawng a hnawt bo zawk ṭhin… Hlauva awm chu hmangaihnaah a la famkim lo a ni,” tiin.  

Midangte dik taka hmangaih dan chu Pathian chuan i suangtuah phak baka nasain a hmangaih che a ni tih hriat chu a ni. Chuvang chuan midangte hnena in intarlan chiam a ngai tawh lo. Midangten an hmuh dan che chu vei tehchiam a ngai lo, a chhan chu Isua nen inlaichinna in nei tawh a, Pathian zahngaihnaah chuan i him em em a ni. 

Midang nena inlaichinna rapthlak khawpa ṭha lo i lo nei tawh thei. Midangte laka inhawng a hlauhna bei let tur chuan, Pathian chuan Isua hmaa inbunruak turin a duh che. A hmangaihna chuan chhung khat phawt che sela, chu chu midangte hnenah i pe chhuak thei ang. 

 

Ngaihtuah zui atan. 

* Hlauhnain inlaichinna a tihchhiat dan chu engtin nge i lo hmuh ve tawh? 

* Midangte hmuh dan ni lovin Pathianin a hmuh danah che chuan i lungawi mai em? Eng vangin? 

* Pathian hmangaihnaa inhawn tih chu a tak taka chet chhuahpui dan i hria em? 

*Pathian hmangaihna thua inhawnna kawnga rahbi hmasa ber chu a chhandamna pawm a ni.* 

Eng thil pawh lo ti tawhin khawi hmunah pawh lo awm tawh la, Pathian chatuan chhungte zingah chuan hmun i nei a, lo nghak ngar ngartu i nei. Sawmna chu zau taka hawn a ni a. Ring la chang mai rawh. 

I inpeih tawh em? He ṭawngṭaina hmang hian bul i ṭan thei ang: “Lalpa duhtak, ka thih hun chuan keimah chanchin ngei hi ka lo sawi dawn a ni tih ka hria a. I lakah thil ka tisual a ni tih ka hria a, ka duh dan anga nungin, i duh dan nilo zawngin ka nung ṭhin. Tun aṭang ngei hian chu chu thlak danglam ka duh e. Ka sual kalsan a, i lam lo pan ka duh e. 

“Ka sual zawng zawng aia Isua thi tura i rawn tirh avang khan hremna ka pumpelh ta a, lawmthu ka rawn sawi e. I ngaihdamna chu ka phu lo tih ka pawm a. I khawngaihna chauh chuan min chhandam thei tih ka hria e, Lalpa. Hmun famkima lut tur chuan ka ṭha tawk ngai dawn lo tih pawh ka hria. 

“Isu, min hmangaih em avangin ka sualte i phur a, lawmthu ka hrilh a che. Vanram kai tlaka min siam a, min chhandam turin i khawngaihna ka rawn ngen e. Ka ring che, Isu. I thutiam ang takin min chhandam nghal dawn tih ka hria, chiang takin, ka pumin, chatuan atan. Isua hmingin ka dil e. Amen.”

Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zinkawng atana thuziak pawimawh tak tak lo thawn che ka duh e. 

[Lettu: Sangpuia]