MSU-in sikulah kalchilhin zirlaite hriselna endik theih nana hmalakpui turin Health Minister an ngen

Aizawl | Feb 5, 2025: Vawiin ni 5.02.2025 (Nilaini) zing dar 9:00 khan MSU hruaitute chuan Minister Pi Lalrinpuii Health & Social Welfare Department changtu chu a Pisaah an kawm a. MSU hmalakna hrang hrang lo awm turah thawhhopui turin an sawm a ni.

MSU hruaitute chuan Minister Pi Lalrinpuii hnenah hian, Mizoram Sawrkarin Mizoram quata a MBBS zir tura a sponsor ten an intiamna anga sawrkar hnuaia an thawh tur hun chhung an thawkṭha leh duhlo ṭhin chu pawi an tih thu an thlen a. Hetianga mahni thutiam hlen ṭha duhlo an awm ṭhin hi pawi an tih thu leh na taka action la turin an ngen a ni.

Tin, naupangten aganwadi a ei tur an dawn ṭhin chu hun kal tawhah sawisel a hlawh ṭhin avangin, a hrisel leh eitlak chauh naupangten an dawn theih nan supplier thlan kawngah fimkhur turin an ngen a. PHC leh CHC ten an area huam chinah, a theih anga school kalchilh a, naupangte hriselna endik sak an nih theih nana ruahmanna siampui turin an ngen a ni.

MSU hruaitute chuan ruihhlo do kawnga social welfare hnathawh te chu ṭha an tih avangin Minister hi lawmthu an hrilh a. Mizo ṭhalai te tichhetu ruihhlo do kawnga awareness MSU in a neih turah thawhhopuiah an sawm bawk a ni.