Aizawl | Feb 5, 2025: MNF Legal Board Secretary David R Lalsawmtluanga chuan, vawiin khan Thuthar thehdarhtute kawmin, "Mizo mipuite duhthlanna rahbeha awm mek dolet turin VC/LC inthlan lo awm turah ZPM hnawl turin Mizoram mipui kan ngen," a ti. MNF chuan, Zirlai exam laia VC/LC inthlan leh Ration Card e-KYC tih tur an hrethiam lo!
PRESS STATEMENT OF
David R Lalsawmtluanga
Secretary, MNF Legal Board
&
General Secretary, Mizo National Front
Date: 05.02.2025
Mizo mipuite duhthlanna rahbeha awm mek dolet turin VC/LC inthlan lo awm turah ZPM hnawl turin Mizoram mipui kan ngen.
ZPM sorkarin Mizorama mipui rorelna bulthut, VC leh LC te chunga kut a thlak dante, party dang VC an nih avang ngawta VC thenkhat a thiat (dissolve leh suspend)-na High Court -in a hnawl sak mawlh mawlh han hriat hian ZPM sorkarin lalna leh thuneihna an duh huam huamzia a nemnghet zel a. Kan hriat angin tuna VC dinglai 558-a 324 hi MNF an ni a, INC 69 leh ZPM 38 anni a,LC dinglai 59-a 50 hi MNF anni a, INC in 4 leh ZPm in 1 chauh (Vanglaini nitin chanchinbu 25 Aug 2020) an ni. Heng VC 558 leh LC 59 te hi Mizoram mipuiin kumin August 2025 thlenga VC leh LC tura rilru thiang tak leh duh taka kan thlante an nih laia anmahni ZPM party an nih loh avang ringawta an namthlu te, an raphrual nawk nawkte leh an thuneihna thla 6 chuang lai mai an hnehchhuh ringawtte hi leilunga mihringte dikna chanvo inchhuhsakna sual lian tak a nih avang leh democracy rama la thleng ngai reng reng lo an ti mawlh mawlh maite hi kan ram kal chho zel tur atan a him lo tak zet a, ni 12.02.2025-a VC leh LC inthlanpui neih turah hian mipuite duhthlanna rapbettu ZPM paihthla turin Mizo mipuite kan ngen a ni.
ZPM party in sorkar an lak tirh atangin dik lo tak leh itsikna rilru kha tak nen ro an rel nghal a, anmahni inhai-vurin bul an tan a, ti ve lo tur anga an insawite lah chu a duh hlei hlei an ni a, mipui sumbawmpui a mi MLA fund leh hamthatna an lak zozaite chu a rapthlak em avanga mipuiin kan hriat loh nan kawtthler hmun hrang hrangah mipui min bum nan an au nasa em em a, Chief Minister Office atanga Unit level thlengin sum leh thuneih chaka tui hal huam huam annihzia kan hmu chho mawlh mawlh ta a, ‘Tha bik riau tura inzuar’ an nih avanga anmahni thlangtu mipuite an beidawng ta hle a ni.
Champhai leh Khawzawl District-ah ringawt VC pa 5, Ngur, Hnahlan, Thekpui, Zawlsei leh Sialhawk VC te awm tha hle hle lai an namthlu ringawt a, an sorkar tuk lawkah Ngur VC an thiat a, mipui court-ah ZPM sorkar duh dan takin ni 24.09.2024 khan Bye election hmanga fiah a ni a, itsikna nena an thiah tak MNF Party tho chuan mipui khawngaihna dawngin hnehna sang tak neiin VC kan siam tawh a. Tihsual nei pawh ni loa itsikna leh lal duhna vang ringawta namthlukte an nih avangin VC pathumte chu High Court-ah an zualko ta a. Dikna tiang hmangin Gauhati High Court, Aizawl Bench chuan ZPM sorkarin a namthluk rikngawt VC te thu leh hla te, Sorkar insawithiamna zawng zawngte uluk takiin a ngaithla a, dan kalha sorkarin a thuneihna a hman sualna a ni tih nemnghetin ni 27.01.2025 ah Hnahlan leh Thekpui VC chung chang a ngaihtuah fel a, thutlukna chu ni 30.01.2025-ah mipui hmuh theih turin a tarchhuak a, Hnahlan leh Thekpui VC thiah dan hi leilung pianken rorelna dik, Principles of Natural Justice kalh a ni tih High Court chuan sawiin, VC thiahna thupek chu a sut nghal a, a hnawl vek bakah heng VC te hian an hna pangngai an chhunzawm lehnghal theih nana hma la turin sorkar thuneitute a hriattir nghal bawk a. Hetiang High Court thupek awm reng chunga thuneihna an la hlan let duh lo hian High Court an zah lo hle tih leh lalna leh thuneihna atchilh an nihzia a tilang chiang hle bawk a, rang taka Court thupek anga VC te thuneihna hlan let vat turin kan phut a ni. Hetiang bawk hian Sialhawk VC chung chang pawh ni 04.02.2025 khan High Court in thutlukna siamin ZPM sorkarin a suspend na chu a thiat sak leh bawk a, an hnathawh chhunzawm lehnghal tura hma la turin sorkar a hriattir bawk a ni. High Court rorelna viak tha tak Mizoramin nei lo phei ila chuan Dictator sorkar hnuaia awm ang maiin Mizo mipuite hi rahbehin kan awm dawn tih a chiang em em a ni. Thuneihna an hman sual, Court lamin a thiah chhoh tak zel avangte, an intiam anga Hmunphiah leh Sawhthing leh adangte an lei theih dawn loh avangte, kawng engkimah party induhsakna nasa taka kalpui an duh avangte, an party leh an party tantu an hniam chak em avang te-in Mizoram mipuiin kan duhthlanna thiang taka kan siam VC 558 (as on 2020) leh Local Council 59 (as on 2020) te hun chu kum chanve chuang laiin a pawhtawi sak ta ringawt a, hetianga mipui rorelna suasamtu sorkar hi tuilet hnu-ah kan la hrawn lo a, India ramah pawh a la thleng awm lo ve!!
Kristian rama thleng atan pawha tuman kan duh loh nunrawnna atanga thutlukna siam tih hi a chiang em em a, hetianga mipui rorelna thiat buan buantu ZPM hi a theihna zawn zawna paihthla ve zel turin Mizoram mipuite MNF chuan kan sawm a ni. Mizorama VC member sanghnih zali chuang leh LC member zathum sawmruk chuangte hun (term) thla ruk chuang zet chhuhsak hi engti kawng maha sawi mam theih a ni lo a, Khawvela thleng ngai lo thutlukna nunrawng tak a nih avangin VC Association aiawhin an President chuan High Court ah a khing mek a, ni 30.01.2025-ah Court pawhin VC lam leh Sorkar lam thusawite a ngaithla fel tawh a, thutlukna nghah mek a ni chung hian ZPM sorkar chuan inthlang turin hma a la chho ve ngar ngar a, VC thiah takte thiah chhan nen, thutlukna siam chhan in ang, itsikna leh lalduhna atanga lo chhuak ve ve niin a lang a, Zirlai naupangte exam hun lai, chhungtin kan buai em em lai taka VC leh LC inthlan hun an han ruat tlatte hi mak kan ti a, Zirna ngaihsak miah lo sum leh thuneihna atchilh sorkar dik tak niin kan hria!
Hetih mek lai hian nimin ni 04.02.2025 khan FCS&CA Dept lamin chhungtin phek buai ngai ration Card-ah e-KYC ti vek tur leh ni 28.02.2025 ral hma ngei ngeia ti hman lote chu ration card atanga paih vek tura Mizo mipuite min vau zuite hi pawi kan ti em em bawk a, ration card-a awm tur chhungkaw member zawng zawng, mahni ngei kala Aadhaar No chhut luh bakah finger print hmeh vek tur a ni a, VC leh LC inthlan buai nen, kumtawp Exam lai lo ni bawk nen, zirlai nei chhungkua zawng zawng leh inthlanna buaipuitute tan phurrit nasa tak leh in vauna order an siam hi vanduai thlak kan ti tak zet a, a tlem thei angberin VOTE THLAK SE tih duhna a ni em aw? kan tihial a ni. Tun hnu-ah chuan hetianga zirna tibuai zawng leh chhungkua zawng zawng manganna tur lam thutlukna siam tawh lo turin sorkar kan ngen nghal a ni. ZPM sorkarin mipui rorelna bulthut zahlo taka pawngsual a, mipui rorelna langsar taka a beih chhunzawm tak zel avang hian kan hma lawka VC leh LC inthlanpui neih turah hian, mipui rorelna venghim tur leh ram danpuiin mipui thuneihna min pek democracy ngulpui tungding tur te leh sum leh thuneihna ringawt atchilhna do a, Mizoram leh a chhunga mipui chengte dikna leh duhthlanna tung ding zel tura penchhuak MNF Candidate te thlang theuh turin MNF chuan Mizoram mipui zawng zawng khawngaihna kan dil a ni.
• • • • • •
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: