Aizawl | Feb 5, 2025: MoS Lalnghinglova Hmar hnathawh tur puan SEC-in 'MCC bawhchhiatna a ni lo' a tih-ah ZPM Aizawl West II Block an lawm tih thuchhuah siamin an tarlang.
ZPM Aizawl West II Block chuan, "Pu Lalnghinglova Hmar, Aizawl West-II Bialtu MLA in a bial chhunga hmasawnna hnathawh tur a puan vanga MNF General Headquarters in an hêkna, State Election Commission in "Model Code of Conduct bawhchhiatna a ni lo" ti a thutlûkna a siam hi lawmawm kan ti takzet a ni." an ti a.
"Aizawl West-II Bialtu Pu Lalnghinglova Hmar hian a tlin tirh atangin a bial tan thahnemngai tak leh chak taka ke pênin, bial chhung leh ram pum hmasawn nan theih tâwpin a thawk a. Sawrkar chhung la reilo tak chunga bial tana a hnathawhte leh hmachhawp a neih mêk te hi a chhuanawm kan ti hle a ni." an ti bawk.
ZPM Aizawl West II Block thuchhuahah chuan hetiang hian an tarlang, "Tuna Aizawl West-II Bialtu MLA in hmasawnna hnathawh tur a sawifiah pahnih, Tuikual lui kama Cheng Nuai 2,000(20 Crores) sênga kawngpui siam tur leh, Cheng Nuai 2,535(25.35 Crores) sênga Vaivakawn Bazar sak that tur te pawh hi bial mipuite'n an engto em em thin, Aizawl West-II mai bâkah Aizawl tlâklam leh Mizoram mipui tan pawh thil lawmawm tak a ni."
"Heng hnathawh tur te hi 'Model Code of Conduct' puan hma daih; January ni 7 a Sawrkar in a rêl fel tawh, DIPR Website leh Media dangah pawh tarlan tawh a ni nghe nghe.
Hetiang anih laia MNF General Hqrs. in State Election Commission a kan Bialtu MLA an hêk hi hriatthiam har kan ti a. Aizawl West(Aizawl Tlâklam) hmasâwnna hi MNF General Hqrs. hian min lawmpui lovah kan ngai. Heng hmasâwnna hi Party bil hmasâwnna tur a ni lova, Aizawl leh Mizoram pum hmasâwnna a nih tel avangin Party Politics khelhna atana lo hmang lo turin kan ngên nghal bawk a ni. Inthlan dâwna mipui rilru hruai kawi thei tura Political Party zawnga inhêk hi tûn hnuah chuan awm tawh lo se tha kan ti a; heng Project-te hi tihpuitlin a nih hunah Party thil a ni tawh lo a, kan Bial chhunga chêng zawng zawngin kan zavaia chhawr tur a ni si a."
• • • • • •
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: