Aizawl | Jan 31, 2025: Mizo Hnam Runah chhung inkhawm chu Vawiin January ni 30, 2025 (Zirtawpni) khan neih a ni a, hun hnihnaah MNF Publicity Board Vice Chairman leh MNF General Secretary ni bawk J Sawma Vanchhawng chuan ZPM sorkarin Zoram mipuite laka thuneihna a lek dan a him loh thu te, Dan rorelna Judiciary rintlak leh viak tha tak awm lo phei se chuan ZPM sorkah Myanmar mipui ang maia rahbehin mipui kan awm theih thu a sawi.
J Sawma chuan, "ZPM sorkarin kum khat leh thla hnihah a thuneihna hmanga mipui min palzutna leh min rahbehna a thleng tam ta hle. ZPM sorkar hnuaiah ZPM ni ve lo, pawl dang reng reng ngaihtheih lohna leh ngaihdan dang neite rahbeh leh nuaibo vek tuma hmalakna hmuh tur a awm chho mawlh mawlh hi a vanduaithlak tak zet a. Mipui rorelna, Democracy pawng nekna langsar tak tak thleng mek karah hian Zoram mipuiten ngaihtuahna fim tak kan hman a tul ta hle," a ti.
Mipui rorelna ti nghettu leh ti mawitu chu ngaihdan inang lo neite inzah tawn thiamna hi a ni. ZPM sorkar erawh chuan an rilru ang pu mi ni ve lote reng reng nuaibo leh rah beh an tum ta zel tih a lang thei a. Nimin maiah pawh ZPM sorkarin a thuneihna hmang suala Hnahlan leh Thekpui Village Council-te a thiahna thupek chu Gauhati High Court Aizawl Bench-in a paihsak tawl mai a. Dan rorelna, Judiciary hmanga khalh ngil ngai khawpa ZPM sorkarin a thuneihna a hmangsual nasa nghal ta mai hi mipui rorelna, democracy ramah chuan thil zahthlak tawp a tling, a ti a.
MNF General Secretary chuan, "Tunah hian VC Association ten an president Pu K Lalngaizuala, East Lungdar VCP hminga High Court-a VC term pawh tawina thupek an khinna pawh ngaihtuah mek a la ni a. Nimin (30.10.2025) khan hearing zawhfel a ni a, Thawhtanni khian court thulukna hriat theih beisei a ni. Sorkarin thupek lian tham a siam reng rengin, chutiang thupek siam anih chhan chu tarlan tel a ni thin a, VC term pawh tawina thupekah khan a chhan leh vang tarlan a ni miah lo a, sorkarin a thuneihna lek khumin, a pawt tawi tawp mai a ni. VC te hi kum 5 term atana mipuiten an thlan an ni a, kum 5 chhung VC tura inngai an nih laia, chhan leh vang sawi awm lo, anmahni rawn bawk si lo, sawi ve tur an neihte sawina hun pawh siamsak miah lo, political party dangte biak rawnna em pawh awm chuang bawk si lova, sorkarin a thuneihna lek khuma, an term thla 6 chuanga a pawh tawi sak tawp mai hi Mipui rorelna beihna langsar tak a ni a, hun lo kal leh zel turah pawh sulhnu pawr leh zahpuiawm tak a ni reng tawh dawn a ni," a ti bawk.
"Mipui rorelna bulthut (grassroot democracy) VC-te hi mipui thlan an nih ang taka an zahawmna humhimsak te, duat taka enkawl leh tih chak deuh deuhte hi sorkar mawhphurhna a nih thu a sawi a. A leh a linga Sorkar berin VC te a thuneihna lek khum a, chhan leh vang pawh sawi si lova an term dinglai a pawh tawi sak ta hlauh zawk mai hi thil mak tak, democracy rorelna chawisan duhtu apiangin tha lo an tih em em a ni. Anmahni venghimtu tur berin diriam taka hriam a lek khum takah chuan VC Association te hian zual kona tur dang an nei tawh lo a. An dikna chanvo leh an zahawmna humhim tumin High Court an pun a ngai ta hial a. Hetiang thil hi tun hma zawnga la thleng ngai lo, sorkar pangngai tan chuan thil zahthlak a ni"
"VC leh LC term dinglai pawh tawi chhan nikum lama Cabinet Minister pahnihin an lo puan lawk tawh dan leh a hnu zela chhuanlam dawrawm te te sorkar hotu lamin an siam chhunzawm dante enin, mipui thlan ngei, VC leh LC te term pawh tawi thut anih chhan hi ZPM sorkarin 'mipui sorkar' letling chiah, 'Party sorkar' sawhngheh a tumna a ni tih hi a chiang em em a, phat theih a ni lo. Inthlan hmaa an intiamna ang ni lo zawng zela hma an lak tak zel avangin,a ni telin mipui rilruah an tlahniam zel a, hun remchang deuh zawk pawh an nghak thleng ngam tawh lova, HSLC leh HSSLC exam hun nen a in ti buai dawn tih hre reng chung pawhin, VC leh LC hmanga party sorkar sawhngheh tumin, tunah hian hnawhsarum takin min inthlan luihpui an tum ta a ni. Tuna an campaign au hla ber, CM ber pawhin Thenzawla a va sawi, ‘Sorkar lai thawhpui thei tur VC leh LC neih a tul’ tih hi ‘ZPM VC leh LC ni lote chu thawhpui kan tum lo’ tihna emaw, ‘Thawhpui harsa kan ti’ tih emaw nen a intluk a. Hei hi mipui rorelna kalphung kalh, a lang a pauva democracy beihna dik tak a nih avangin Zoram mipuite hian VC leh LC inthlanna neih tur hmang hian Democracy vawnghim turin MNF candidate te an vote a tul hle.," J Sawma chuan a ti.
"Lengpui Airport chungchangah IAF kuta hlan turin thutlukna an lo siam fel ti tih der mai a. ZPM sorkar lo din tirh, December ni 14, 2023 khan Council of ministers thukhawm chuan zirchianna mumal nei hmasa lovin "Lengpui Airport chu AAI hnena hlan turin hmalak a ni ang a. ZMC pawh central sorkar kuta hlan tura hmalak a ni ang" tih an pass nghal tawp mai.
14. 6th Jan 2024-a CM Delhi leh Kolkata a tlawh hnua a lo haw khan chanchinbumite hmaah Lengpui Airport chu 'AAI emaw, Adani group kutah emaw kan pe dawn a, Civil Aviation Ministry in min buaipui dawn a, a tu hnenah nge pe ila tha zawk ang tih kan zir chiang dawn a, Adani Group phei chuan ka hnenah DO letter an rawn ziak tawh a. A rang thei ang berin hlan kan duh' tih a puang a. February 2024 ah Working Committee an din zui a, a tirah CM berin AAI emaw Adani Group kutah emaw kan pe dawn a tih laiin, Working Committee chuan IAF kuta hlan an lo rawt ta mauh mai a ni"
"Lengpui Airport hi kan hruaitu hmasaten hmathlir thui tak nei chunga harsatna tinreng paltlanga an lo tihpuitlin a ni a. Chief Minister lo ni tawh palite kut lo thlak tawhna a ni a. Hruaitu hmasaten harsatna tinreng paltlangin an lo enkawl a, hmarchhak biala Airport thang duang leh khualzin lut leh chhuak pun chakna ber a lo ni chho ta hial a ni," J Sawma chuan a ti bawk.
MNF Secretary C Lalmuana'n Tuichang bial fan leh MNF Dy.CO PC Biakchungnunga'n Chalfilh bial fan report an pe bawk.
MNF Chhung inkhawm hi MNF General Secretary VL Krosshnehzova chuan kaihruaiin, Pu Ramzauva Adviser chuan hunserh a hmang.
• • • • • •
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: