HARSATNA KARA KE PEN DAN PATHUMNA: PATHIAN HNENAH INBUNRUAK RAWH

_Sawinghin rual loh_

By Rick Warren 

— Nov 12, 2024

“... ṭawngṭai leh dilna zawng zawngin Lalpa Pathian lam chu ka hawi a.” Daniela 9:3

Tunlai chu Danielan harsatna a tawh leh Israel miten harsatna an tawh laia a ṭawngṭai dan kan zir a. A ṭawngṭai dan atang chuan keini pawh Pathian chhan tlaka ṭawngṭai dan min zirtir a ni.

Kan zirtak aṭang khan amah kan biak hmain Pathian aw kan ngaichang tur a ni, Pathian lam hawiin amah kan zawng tur a ni.

Chutichuan, ka duhna chu phur takin kan sawi chhuak tur a ni.

Kan ṭawngṭaina tam zawk hi chu dan ang maiin, kan thu chham pawh ngaihtuah chiang mang lo vin kan tawngtai mai thin. Thuchham dan vawn sa kan nei a. Phurna leh takna a awm lo a ni.

Diktak chuan, Pathian chuan i ṭawngkam hman aiin i tihtakna kha a ngai thutak zawk a ni. Ṭawngkam dik tak hmang mah la i rilru a dikloh chuan i kawppui emaw i ṭhiante emaw ah a tla na lo ang. Pathian ah pawh a tla na thei lo a ni.

Mihringte hi Pathian anpuia siamte an ni a, Pathianin rilru a hmu tlang vek a ni. Thinrim a hrethiam a. Lungngaihna a hrethiam a. Lawmna pawh a hrethiam a ni.

Pathianin a hmangaih ringawt lo che a. A thinlung leh ngaihtuahna zawng zawng nen a hmangaih che a ni.

Chu chiah chu Danielan a ṭawngṭaina a sawifiah dan a ni, “... ṭawngṭai leh dilna zawng zawngin Lalpa Pathian lam chu ka hawi a.” Daniela 9:3

Hebrai ṭawnga “dilna” tih awmzia chu rilru zawng zawnga dilna tihna a ni. Tihtakzeta dilna a ni.  Thinlung zawng zawnga dilna a ni a. Thuhnuairawlh taka dilna a ni.

Chutiang ṭawngṭaina chu Pathianin a ngaithlaa a chhang ṭhin.

Chutianga ṭawngṭaina chu Daniela 9:3 ah kan hmu, “... ṭawngṭai leh dilna zawng zawngin Lalpa Pathian lam chu ka hawi a.” 

I chhungkaw tana chutianga ṭawngṭai chu i duh maithei e. An aiawhin Pathian hnenah i ṭawngṭaia i inbunruah a ngai a ni. Chutiang zelin in inlaichinnaah emaw i sumdawnna chungchangah pawh a ngai maithei a ni.

Kan khawvel boruak han thlir hian kan mamawh a ni. Tute pawh hian harsatna kan tawk vek hian a lang a ni. Ei leh bar chungchang te, indona te, tamna leh khawvela sualna lo thleng hrang hrang hian harsatnaah min hnuklut mek a ni.

Chung zawng zawngte chu Pathian hnenah kan bunruah a ngai a ni. 

Ngaihtuah zui atan

* I tawngtainaah phurna i nei ṭhin em? Engte nge i dil ṭhin?

* Engtia zingin nge kan thuchham ngai kan vawnsa hmangin kan ṭawngṭai thin le?

* Engtin nge phur takin Pathian hnenah kan ṭawngṭai theih ang? 

*[Lettu: Sangpuia]*