Aizawl | Sept 13, 2024: Tlabung kawng chhiat vangin West Tuipui MLA Prova Chakma leh NHIDCL Executive Director te chu nimin khan an inkawm.
Nimin dar 3.30 PM khan Pi Prova Chakma, MLA, West Tuipui Constituency chuan NH 302 (Lunglei to Tlabung) kawng siam mek avanga mipui ten harsatna an tawh chungchangah NHIDCL Executive Director Virendra Jhakhar chu Legislator House-ah a ko a, inkawmna hun hman a ni.
He inkawmnaah hian Pi Prova-i sawm angin Pu Lalhmunsiama Pautu, Secretary (Information), NH 302 Ngaihven Pawl & Asst Secretary, Tlabung Welfare Aizawl, Pu Lalhuthanga, Secretary, Tlabung Group YMA leh Lalruatfela, Secretary, Tlabung Branch YMA te an tel a ni.
West Tuipui MLA chuan, NHIDCL Director hnenah hian hetiang hian ngenna siam a ni.
1. Fur lai hian Mizoramah kawng siam a harsa tih an hrethiam a, chutih laiin kawngchhiat avanga lirthei tangkhang pui tura contractor lamin Excavator Operator number an puanzar biak pawh an harsat thu te, call an pick ṭhat duh ṭhin loh vanga rei tak tak mipui tangkhang ṭhin pumpelh tura hma lak thuai ni se.
2. Tlabung leh Lunglei inkara Phairuangkai Lei (Bridge) chu a chhiat tawh avanga lirthei bungraw phurte zawh phal an nih loh avanga bungraw inhlanchhawn ngai ṭhin chuan thil man a ti to ṭhin a, hei hian mi retheite harsatna a siam belh nasa hle a, lei thar dawh hun chhung tura ruahman kum khat leh a chanve chhung chu a rei em avangin lei hman mek chu thawmṭhat a, lirthei bungraw phurten an bungraw phurh zawng zawng unload kher lova an zawh theih tura siamṭhat ni se.
3. Kawng siam mek quality leh material pawh duthusam lo a tam zawk a nih avangin quality control chungchangah inrawlh tur leh quality control tura rawih mek CMEC Engineering & Consultancy hmel hmuh tur a awm ngai loh avanga an lungawi loh thu leh rawih an nih ang ngeia quality control tura beisei an ni. Executive Director-in kawngpui siamzawh anih aṭanga kum 5 chhung NHIDCL in repair hna a enkawl zui tur thu a sawi chu repair leh vat tura siam ai chuan tuna an siam chin apiang quality ṭha thei ang bera siam tura ngen nghal a ni.
4. Leivung paihna tur bika ruahmanah leivung paih lova a remchanna hmun apiang a leivung paih ṭhin tihtawp vat ni se. Leivung in Lui leh nungchate tana harsatna tam tak a thlen mek leh khawthlang tuipui thleng a harsatna a thlen hi titawp vat tura hmalak ni se.
Heng an thu thlente hi NHIDCL hotupa hian amah ngeiin a lo bawhzui tur thu leh October thla tawp lamah Tlabung thlenga kawng siam endik a tum thu te, December thlaah Central YMA hruaitute nen a hmun ngeia endik an tum thu a tarlang a. Phairuangkai lei hi a foundation lam a ṭhat tawh loh avanga repair awmzia a awm tawh loh avangin a thar siam hun nghah mai a ngai dawn a, chutih laiin theih ang anga repair erawh an tum tur thu a sawi a, lei (bridge) thar dawhna tur bungrua pawh Mizoram chhung rawn luhpui tawh niin March 2026-ah chuan siam zawh hman a beisei thu a sawi bawk a ni. NH 302 kawng siam hna hi kum 2025 December-ah chuan zawhfel hman a nih tur thu a tarlang bawk a ni.
• • • • • •
Scan Here to Donate!
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: