-Rev.Dr. Zaichhâwna Hlàwndo
.jpg)
Tun September 24, 2024 ah Village Council Inthlanna (by election) kan nei dâwn a. Nakumah Village Council/ Local Council inthlanpui kan neih leh dáwn. Zofâte khawtláng rorelna VC/LC kan kalpui dan hi mut mawh hnar mawh a hun réi tak ka lo neih tawh a ni. He VC/LC kalpui dan hi ṭhiah a, a thar hman mai theih tûr rûahmanna te pawh ka ziak tawh a, mahse chu chu tun ṭumah chuan ka rawn tar lang rih lovang. Tun ṭumah chûan he VC/LC kan inthlan dân leh kalpui dan ṭhalo hi eirûkna bul a nih dan te, kan khawtlang nun leh Kristianna ti chhetû a nih dan te kan ziak dâwn a ni.
• Zofate zingah hian ram leh hnam hmangaih lo, siam ṭhat duhlo chu kan awm lo ang tih mai tûr a ni . Amaherawhchu engtiang chiahin ngê kan siam ṭhat ang? Khawi aṭang hian nge bul ṭan tûr? tih hi kan buaina chu a ni. Chemtâtrâwta thawnthu ang mai hian kan in puh tawn kûal vêl vek a, a ngâiah kan kûal kan kûal mai chu a ni. Chemtatrâwta kha Kaikûang cheh mai mai theihloh khan in veng ṭha se chuan thubûai leh hlabûai a awm lo mai tûr a ni. Chuvang chuan ram leh hnam heti taka a chhiat hma hian lo in vêng ila ṭha tûr tih mai pawh a awl ta a nih hi. Article dangah ka ziah tawh ang khan ram leh hnam siam ṭha tur chuan PARTY POLITICS system ṭhalo ‘Thatheihmiahlohna Bâwm’ hi kan ṭhiah hmasak phawt a ngai a ni.
A hmasa berah chuan VC/LC kan thlan leh siam dân hi khawtlâng lungrûallohna thlentu bul a ni tih hi ka sawi duh chu a ni. Tuna VC/LC roreltû tûr siam kan tum dan aṭangin indonain bul kan ṭan nghal a. Party tinin an party candidate tûr an buaipûi a, khawchhûngah indopûi an rawn siam ṭhin a ni ber mai. Party hrûaitute’n candidate tûr miṭha mipuite vote duh tûr an zawng ang. Khawtlâng ah mi hming ṭha an thlan chhuahte chu party politics ah an hnûk lût a, an duh emaw duh lo emaw party politics indona chhûngah an zûang luhve kha a ngai. Nihna thar an in bel a ngai a, an hmelma ni ngai miahlo te pawh hmelma leh eptû anga do a lo ngai ta ṭhin a ni. He VC/LC inthlan hi party hrûaitûten an party sawhngheh nân party politics bawlhhlawh a tel duh ngailote thlêmna leh hnuhluhna hmanrûa ah an hmang ṭhin.
A pahnihna ah chûan VC/LC siam dan leh hnathawh dan hi eirûkna (corruption) bul in ṭanna a ni. Khawtláng rorelna hna hautak tak thawk tûra kan thlan leh siam te hian an tha leh zung, hun púm deuhthaw an hman a ngái. Chutih rual chuan sawrkar aṭangin hlawh mumal chhûngkaw chawmna tham hlawh an nei lo. Chûvang chûan khawtláng tana hnathawh tûr, sum lo kal aṭang te khan hlawkna lo in siam duhnate a lo piang a. An tân chûan eirûkna tûr thlêmna hautak tak hmachhawn chunga rorelna kalpúi a ngai ta ṭhin a ni. VC/LC mifel tak tak deuh vek, khawtlang, ram leh hnam tana mi rinawm tak tak kan neih laiin VC/LC nih avanga hausa ta thûr thûr pawh kan awm ta mêk zel chu a nih hi.
A pathumna ah chuan VC/LC thlan leh kalpui dan ṭhalo hi Zo nun mâwi tichhetû a ni. Tun hma chuan khawtin mai hi an in luangrual êm êm a, in ṭhenawm khawven chungchângah pawh a thlum a al eiza in an nung ṭhin. Sa an kah te pawhin ṭhenawm khawvêng te an pe ve a, thlai thar te pawh an in pe lîam lîam a, chawhmehte pawh an in suah ṭhin. Tunah chuan chúngte chu thawnthu hlúi an lo chang zo tâ a ni ber mai. Khawtlâng rorêlna chu party politics aṭanga siam a nih tlat avangin khawte ber thlengin party indona chuan chim loh khûa a neilo a ni ber mai. Chu party politics indona chuan chhûngkûa min ṭhendarh a, khawtlang mipuite ṭûl lovah kan indo a, kan nihna ni miahlo party politics in min pek- MNF, Congress, ZPM, PC, AAP leh BJP nihna te kan in bel a. Sawpa saw MNF pâ a nih saw, saw nu saw Congress nû a nih sawi ! ti a in elsen nân chu party hming chu kan hmang ta ṭhin a. Chu party politics chuan thingtlang khûa leh khawpui veng hráng hráng inpumkhatna, zo nun mâwi leh nuam tak kha a ṭhiat zo ta a ni ber mai.
Chutiang taka VC/LC kan siam dan a ṭhalo tih kan hriat reng chu a siam ṭhat dân a awm em? Engtinnge VC/LC in thlana party politics chu kan tih bo ang? Party tel lovin VC/LC candidate chu a siam theih loh em ni tihte kan ngaihtuah ngâi ta hlê a ni. Kan ram leh hnam hi kan hmangaih tak tak a, eirûkna (corruption) hi kan do tak tak dâwn a nih chûan Phêngphehlepa khûa a tlai hma a kan chet chhuah a ngai ta a ni.
Mizoram mipuite hian VC/LC hi party politics candidate hmanga siam tûr ti hi danah a awm hran lo tih kan hriat a ngai. He party system tih dan leh kal phung ṭhalo awm chhan chu induhsak bîk duhna vang a ni. Sawkar dinglai party thlawploh VC/LC neih hlauhna vang te pawh a ni. Tuna kan sawrkar dinglaiin an thupui chu mipúi sawrkar siam a ni. Mipui sawrkar siam tur chuan VC/LC ah party sawrkar siam loh hi hna hmasa ber tûr chu a ni ang. Party ruihchilh duhlo khua leh veng ṭhenkhatah independent candidate in VC/LC siam te pawh kan nei tawh ṭhin. Kan khawtlang leh vêng kan hmangaih a, inpumkhatna kan duh a, rorelna thianghlim neih kan duh chûan VC/LC a party sawrkar siam loh kha a pawimawh hmasa chu a ni. In thlan pawh ngailovin chuhtû awm lo pawhin VC/LC te hi kan duh chuan kan siam thei. A nih loh pawhin tlawmngâia independent candidate tûr kha mi engemaw zah kan sawm ang a, chûngmite zinga mi chu kan thlang mai ang.
VC/LC thlang tur hian campaign chiam chiam pawh a ngai lo. Khawtin leh veng tin hian kan veng mi leh sa chu kan in hre vek a, khaw dang leh veng dang a mite kha in candidate ve theih pawh a ni bawk lo. Zofate chu thil ṭha intihhmuh hnam kan ni a, tûn by election aṭang hian in tihhmuh sup sup ila, corruption kan do hlawhtling nghâl a ni mai dawn lawm ni? Kohhran pâwl hrang hrangte pawhin eirûkna (corruption) hi kan vei tlang vek a, kan do tlâng mek a ni. He eirûkna lo awmna bul VC/LC a party politics hmanga kan kalpui hi ṭhiat ngam ila kan hlawhtling a ni mai. Kohhran hote’n kan ṭawngṭaina hi a taka kan umzui chuan siloh chûan hmelma pa hnathawh hi kan tirêm tak tak lovang.
Kan ram leh hnam damna kan duh tak tak a, inpumkhatna kan duh a, eirûkna kan do dawn a nih chûan VC/LC inthlan a party politics kal phung ṭhalo hi i do ngam ang u. Hebrai 12:4 ah chuan ‘sual dovin thisen chhuak khawpin ṭan in la lo’ tih pawh kan hmu a. Thisen chhuah pawh ngailovin, thil diklo leh ṭhalo kan hmuh leh hriat VC/LC party system a kalpui hi ṭhiat ngam ila, do ngam ila hmelma pa chuan tihngaihna a hre dawn lo a ni mai. Sawi sawi lam a ni lo, a tih a tih, a chêt a kan chêt chhuah chuan VC/LC thlan dan kalphung thar chu a piang mai dawn a ni.
• • • • • •
Scan Here to Donate!
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: