'kan CM hi a rawn thleng tawh em?' tih te'n kan inzawt he hu hlawm mai a, a mak ang reng hle - 'hei chu sawi loh atan a tha mang e' tih te a zu sawi leh nual

Aizawl | September 13, 2024: Congress Party chuan vawiin khan Congress Bhavan-ah ‘Friday Political Session’ an hmang a. MPCC President Lalthanzara'n C Lalpeksanga MCS (Rtd) a lawm lut.

He hunah hian MPCC President chuan thu sawiin, "Kan hriat angin kan CM zahawm tak chu khawvela ram ropui ber USA ah a kal a. White House atang ten chawimawina a dawng ni awmin a lang a. Lengpui Airport a rawn tum hunah chuan an va hmuak ropui dawn em Zonu an tih te khan kan ti a. Mahse 'kan Chief Minister hi a rawn thleng tawh em?' tih te'n kan inzawt he hu hlawm mai a, a mak ang reng hlein ka hria. A zin chhungin thu tam tak a zu sawi a, 'hei chu sawi loh atan a tha mang e' tih te a zu sawi leh nual bawk a." a ti a.

Lal Thanzara chuan, "ZPM hi an kal dan tur an sawi ang zawm chuang lo sawrkar leh party an ni hi mipuiten an rinna a tlahniam sawt hle a ni." a ti.

"Mi thenkhatin a lehpekah chuan Congress in ni tawh ang min tih thinna chhan pawh hi, Congress party hian kan hun kal tawhah Pathian hruaina kan chang a, mipuite hnena kan tiam leh kan ti ang kan tih chu tihlawhtling thina miin min ngaih vang a ni a, a lawmawm takzet a ni.

"Tukin zing chanchinbuah khan ZPM mawng kha kan thalai ten an hlim sang deuh nge ni, ZPM thalai khan, 'Vai party zia dik tak a rawn lang chho tan e' tiin kan thalai te kha an dem thu an sawi a, Pu Lalthanhawla'n a lo sawi tawh thin angin Vai party zawng zawngah vai party tha ber Congress kan ni hi kan inchhuang.

"Vawiin ni ah hian ZPM ten a ruka an zawm, an sawrkar theihna chhan hi mipui ten hria se chuan an tawngtaisak nasa ngawt in ka ring. Vawiin ni a puanhnuaia ZPM ten an zawm party ai chuan langsar taka kan zawm Congress party hi India ram tan leh Mizoram tan hian an tha thlawt a ni.

"Kar hmasa a MNF te nena kan thawkho tawh dawnlo ti a ka sawi chu ZPM ten lo la vawngin Lai Autonomous District Council ah pawh kan thawk ho tawh dawnlo niin an sawi a, ka sawi zawk chu Sinlung Hills Development Council inthlanah kan thawkho dawnlo tih ka sawina a ni. Mizo takin Lai Autonomous District Council ah chuan tluang takin kan thawkho zel dawn a ni.

"Vawiin ni ah Pu C. Lalpeksanga te ang mi thiam, mi hmingtha in min zawm duh hi kan lawm a. Congress a zawm duh chhan a awm ngei anga, kan lakah beisena a nei hi kan lawm a, kan hmalam hun a eng hle a ni. Kan party ah a thiamna te tangkai taka hmang tur in duhsakna ka hlan a ni." a ti.

Pu C Lalpeksanga MCS(Rtd) pawhin thu sawi in, "Central a Congress sawrkar lai khan kan sakhua min humhalh sak a, BJP kum 2014 a an rawn sawrkar hnu hian kan sakhaw zalena leh hnam inhumhimna chu CAB hmangin min tihbuai an tum ta a ni. Kan MP hmasa pawh khan CAB chu a thlawp anih kha. Congress party hian Constitution hmangin kan dinhmun min lo humhalh sak a, Pu Nehru a te khan India rama hnam hrang hrangte hi enhrang miah lova, angkhatin min en vek a ni. Congress hian hnam tenau te hi min hmngaih ber a, min enkawl tha em em a ni. Hnam hrang hrang leh Sakhaw hrang hrang te zalenna hi Congress min pek a ni.

Tunah hian Rahula hovin Central an tho chhuak mek a, Congress hmalam hun hi a eng em em a ni. Mizoramah pawh hian ZPM hian an insawi anga thil an tih loh avang hian rei an daih a rinawm loh a ni." a ti.

He Friday Political Session ah hian Pu C. Vanlalhruaia, Secretary, MPCC te, Pu Hmingthanthuama, General Secretary, ADCC leh Pi Lalnilawmi, Secretary, MPCC ten report an pe a, lawmna thu sawina Pu Ngurdingpuia Pachuau, Sr Vice President, MPYCC chuan a nei bawk a ni.