PATHIAN THU CHU VUAN TLAT RAWH

_Hunbi Hrang Hranga Than Dan_

-  Rick Warren 

-  Sep 11, 2024

“Tunah hian Pathian leh a khawngaihna thu-ah ka kawltir a che u, chu chuan a siam lian thei che u a, mi rilru thianghlimte zingah ro chan a neihtir thei bawk a che u.” (Tirhkohte 20:32)

Bible hi i thlarau chaw a ni a. Pathian Thua i chawm chuan i thang ang. Chaw dang ral mai mai i ei reng chuan i taksa a tha thei lo vang. Chutiang chiah chuan Pathian Thu thutak hmanga i inchawm reng loh chuan thlarauvah i thang thei lo vang.

Pathianin malsawmna pek a tiam zawng zawngte kha chan i duh angem? I duh ngei ang! Kei pawhin ka duhsak che a ni.  

Chung malsawmna te chu khawi atanga neih tur nge ni ang? Chungte chu thlarau lama puitlinna rah lo awm tur a ni. Bible chuan, “Tunah hian Pathian leh a khawngaihna thu-ah ka kawltir a che u, chu chuan a siam lian thei che u a, mi rilru thianghlimte zingah ro chan a neihtir thei bawk a che u,” a ti. (Tirhkohte 20:32)

  

Pathian khawngaihna thu chuan a siam lian thei che tih hi eng nge awmzia? A awmzia chu, thlarau kawngah puitling lamtluang i zawh a nih chuan, Pathianin a malsawmna zawng zawngte a pe thei che a ni. An la puitlin tawk loh avanga naupang hnena i pek theih loh tur thil a awm. Chutiang zel chuan, Pathian pawhin pek che a tum a, nimahsela i puitlin huna a pek turin a nghak zawk che a ni. 

Thlarau lama i than theihnan Bible i zirnaah i kut kha i hmang tangkai thei ang. Pathian Thu chu kawng rukin i inchawm thei ang. Pathian Thu i hria - i kut zingte hmangin. I chhiar a - chu chu zungte u in. I zir a - i zung lai hmangin. I vawng a - i kut zungchal hmangin. Tichuan, ngaihtuahna i seng ta vang vanga - i kut zungpui hmangin. I kut phah chuan Pathian Thu chu i hmang chhuak a ni tih a entir.

Khing thil parukte khi Pathian Thu hmanga i inchawmnaah an pawimawh theuh a ni. 

Hetiang zawng hian ngaihtuah teh: Thlarau lam chawmna Pathian Thu i hriat chu biak in a i ngaihthlak chauh a nih chuan a nghet lo vang. I kut zungte chauh chuan engmah i vuan nghet thei lo ang hi a ni. A zir chiangte sawi dan phei chuan darkar 72 chhunga kan hriat zawng zawng zaa 95 hi chu kan theihnghiljh leh nghal an ti a ni. Pathian Thu i hriat chu biak in ah chauh anih phei chuan, i hlimna chu awltein Setanan a laksak ang che.     

Amaherawhchu nitin Pathian Thu i ngaihthlak a i chhiar baw chuan, i vuan nghet deuh ang a. Setanan awlsam takin min laksak thei lo vang. Chuvangin i ngaihthlak a, i chhiar a, i zir bawk phei chuan, i vuan nghet lehzua ang.  

Heng kawng ruk - ngaihthlak, chhiar, zir, vawn, ngaihtuah leh hmanchhuah te hi i tih vek theih chuan - Pathian Thu chu i vuan nghet thei ang a. Tuman an lak sak thei lo vang che. Tichuan thlarau lamah i thang ang a, thlarau malsawmna pawh i dawng thei ang.   

Ngaihtuah zui atan

* Thang tur chuan nitin Pathian Thu i chhiar a ngai. Kar ruk chhung nitin a hun zat leh a hun pangngai ah zel Bible zir tum ang che. (Ni khatah minute nga lek pawh a pawi lo!). Ziakin dah la tichuan i thiante nagmah pui thei tur che zawng bawk ang che.

* Nitin Bible i zirna tur engin nge dal che? Chungte chu thlarau lamah than nan an pawimawh zawk em?

* Pathian Thu ngaihtuah (meditate) chu eng nge awmzia nia i hriat? 

*[Lettu : Sangpuia]*