PATHIAN CHUAN A ṬHAT EM AVANGIN MIN NGAIDAM

_Ni 40 Chhung Tawngtaina_

-  Rick Warren 

-  Sep 17, 2024

“Kan sualnate angin kan chungah a ti lo va, kan khawlohnate angin min thungrul hek lo. Chhak leh thlang a inhlat ang hian, kan bawhchhiatnate chu kan hnen ata a dahsawn ta daih a” (Sam 103:10, 12)

Pathian chuan i phu ang ni lo vin, i mamawh a pe thin che.

“Kan sualnate angin kan chungah a ti lo va, kan khawlohnate angin min thungrul hek lo. Chhak leh thlang a inhlat ang hian, kan bawhchhiatnate chu kan hnen ata a dahsawn ta daih a” (Sam 103:10, 12)

Chhak leh thlang hian tawpna a nei lo. Chutiang chiah chuan i sualna zawng zawngte chu Pathianin a hru reh vek a ni. 

Lal Davida kha Bible-ah khan a uire a, chumi khuh nan chuan Bethsebi pasal kha a la thahtir zui a, Davida chu ngaihdam tlak niin i hria em? Ni lo. Davida kha zahngaihna a lantir em? Lantir lo. Nimahsela Davida chuan Pathian chu Pathian tha tak nia a hriat avangin, zahngaihna a dil a ni: “Aw Pathian i ngilneih em avangin mi khawngaih la: I lainatna nasat avangin ka bawhchhiatnate hi thai bo vang che. Ka khawlohnate hi mi silfaisak var la, ka sual hi mi tlenfaisak ang che.” (Sam 51:1-2)  

Thil sual i tih chuan, a chunga mi ang khian i tawngtai ve thei ang. Mahni inringtawk takin i tawngtai thei ang a chhan chu i thiltih sual emaw i nihna avang ni lo vin, Pathian a nihna avangin zawkin i au dawn a ni.

Pathianin a ngaidam che, i that vang ni lo vin, a that em vangin a ngaidam che a ni. Mi tha famkim nih tum kher pawh a tul lo. I tha famkim thei dawn si lo va! Chu chu Pathian khawngaihna mak tak chu a ni zawk.

Pathian hnenah ngaihdam i dil a nih chuan, rang tak leh famkim takin a ngaidam che. Chu chu thil ropui tak a ni. Engpawh lo tisual la, i sualna avang khan Pathianin a hnawl lo che. Rilru inhawng takin hmangaihna ban nen a lo lawm zawk che a ni.

Hei hi a makna chu a ni, mihringte chuan hetiang lo hlir hian kan che thin si a. Mi chunga i sualin, an lo lawm leh duh thin che em? Lawm duh lo. Nangmah hlata awm an duh zawk a ni. Lo lawm viau che pawh an duh tawh lo - a chhan chu i tihnat tawh vang a ni.

Nimahsela Pathian chu hmangaihna leh thatnaa khat a ni. Hmangaihna chu a nunzia a ni tlat. A hmangaihna leh a thatna chu i phu tawk ni lo, i mamawh i dawn theihna chhan pawh a ni. 

Khawngaihna leh ngaihdamna hi i phu lo - tuman kan phu lo. Pathianin kan vaiin min pe hi a va lawmawm em! 

   

Ngaihtuah zui atan

* Pathianin a ngaidam tawh che tih hrereng chung siin engvangin nge Pathian hnenah chuan ngaihdam dil chu a la ngaih fo?

* I thiltih sual tawh hnua Pathianin a lo lawmna che hi Pathian tan engnge awmzia a neih? Engtin nge i lo tawnhriat ve tawh le?

* Isuan chuti khawp chuan zahngaihna a lantir chuan, engtin nge mi dang i ngaihdam ve ang? 

*Pathianin a ṭhatna chu Fapa Isua Krista kaltlangin a tilang.*

Pathianin a thatna chu Fapa, Isua Krista kaltlangin a tilang tawh a. Bible chuan, “Pathianin khawvel a hmangaih em em a: Chutichuan a Fapa mal neihchhun a pe a, amah chu tupawh a ring apiang an boral lohva chatuana nunna an neih zawkna turin” a ti. Johana 3:16

Chatuana in nun theih nana Pathian thutiam chu ring turin i inpeih em? I inpeih a nih chuan, hetiang hian tawngtai rawh: “Ka sualnate ka puang a, ka Lalpa leh Chhandamtu atan Isua hi ka pawm e. I hnung zuia, i rawngbawl ka duh e. Ka nun tlawm tak hi ka hlan che a, i ang chhunga min pawma min chhandam ve turin Isua hmingin ka dil a che. Amen”

Hetianga i tawngtai a nih chuan, Rick@PastorRick.com ah hian email min lo thawn la. Isua nena zinkawng i zawh tanna atana pawimawh te a thlawnin ka lo thawn ang che.

*[Lettu : Sangpuia]*