(Christianity & Corruption)
- Rev Dr Zaichhawna Hlawndo
.jpg)
Corruption chungchângah article pahnih – (1) Party Politics leh Corruption (2) Sawrkar Hna leh Corruption) tihte ka ziak tawh a. Tun ṭumah hian ‘Kristianna leh Corruption’ tih thupui hmangin kan ziak ve dawn a. Mizoram Kohhran pawl hrang hrangte hian eirûkna hi kan duhlo êm êm a, a reh nan kan ṭawngṭai a, a dotu tur ber pawh kan nih angin hma kan la tawh a, kan la mek a, lak zel pawh kan tum a, a lawmawmin a thlamuan thlak hle. Chutih rual chuan ‘Mi mita hmawlhte hmu fiah viau hian mahni mita khanchhuk awm hmuh hmaih’ palhte pawh thil awm thei a nih avangin eirukna ah Zofa Kristian te kan fihlim theih nâna kan fimkhurna tûrte kan zirho dawn a ni.
A hmasa berah chuan ‘ Kohhran miten hun kan eiru em’? tih hi ngaihtuah hmasak atan ka han târlang duh a. Biak ina inkhawmah te, Kohhran committee leh Kohhran thiltihna dangah hian hun kan vawng dik tlangpui. Amaherawhchu Kohhran thiltih a hun hmang dik, sawrkar hna leh kan eizawnna hrang hrangah hun eiru hi kan awm niin a lang. Khawthlang ram(Western country) ah chuan an hna thawh hlawh hi darkar bi a chhût a nih tlangpui a, darkar bi tuk hun kha eirûk a thianglo tluk a ni. Kohhran mite hian kan eizawnna tlan sanin rawngbâwlna hrang hrangah kan in hmang ṭhin a. Kan in phalna leh inpekna avangin rawngbawlna pawh a chakin kohhran pawh a ropui phah a ni. Chutih rual chuan Kohhran thiltih a nih chuan ti a, chawlh (leave) pawh la mûmal mang lova mahni hna kal san mai ṭhin te kan awm em? Chuvangin chawlh pawh la mumal lova Kohhran thiltihna a kan tel hian Pathian tan thil ṭha tak ti a in hriain Pathian hmingin thil ṭhalo tak ti palhin kan lo eiru reng thei a ni tihte hi kan ngaihtuah a ṭûlin ka hria.
A pahnihna ah chuan Kohhran thila kan chetvelna ah hian mi tha hmanga a thlawn veka thil ti tura Kohhran member kan beiseina hi mi tha leh thiamna eirûkna a ni thei angem? Zofate chu a huhova khawsa kan ni a, chu chu Kohhran chakna leh ngelnghehna hnam dang ten a an tih theihloh kan tih theihna chhan a ni. Chutih rual chuan mite inpe tura kan beisei dan hi in enlet deuh a ngai ta em? Kohhranah chuan hlawh neia hna thawk, Kohhran office a thawk te, Pastor leh Biakin enkawltu (chowkider) kan tihte kan nei a. Kohhran chetvelna rêng rêng hi mihring tha leh sum ngai vek a ni a, hlawh nei lova thawk kha 90% chunglam kan ni .
Khawvel ṭhang zelah mitin mai hi kan buai êm êm vek tawh a. Hnathawh lai neite an hna aṭanga kan lak pen khan an tihloh tur ti a, an awmlohna tura awm tirtu kan ni thei. Chuvang chuan a chhawrtu Kohhran te kha a mawhphurtute kan ni lêt daih thei. Entirnan, tuemaw hlawhfa hna thawk lai mek kha rawngbawlna thilah tiin hna thawk turin lo pawtpeng daih ila, a dik lovang. A ruaitûin hlawh pawh pelo se a thiamlohna a awm lovang. Chuvang chuan hlawh nei lova in chhawr vek tumna te, hna thawh lâi nei lo pawh pên danah pawh hian Kohhran ten inenlêtna tur kan nei em tih te pawh hi ngaihtuah a ngai hle. Khawvel hmasawn zelah mite tha leh hun eirukna a kan fihlim nan fimkhur a ṭul. Kohhran tana hun leh tha sengte tana sum sen hrehloh te pawh kan zir a ngái ṭan ta niin a lang.
A pathumna ah chuan Mizoram Kohhran hoten kan ṭhahnemngaih lutukna lamah sum ngainatna sualah kan tlulut palh thei tih kan hriat a ngai. A rawng kan bawl Pathian aiin sum kan lo dah lian palh thei a ni. Kohhran pâwl hrang hrang ten Inkhawmpui nana kohhran sum leh thawhkhawm bak a sawrkar zem zen tumna te kan nei ta em? Sawrkâr sum emaw bungrua hmang a inkhawmpui neih tum tlatna rilru awm palh theih lakah kan fimkhur a ngaiin ka hria. Inkhâwmpui denchhen a, politician te, sawrkar hnathawk leh sawrkar thil hman ṭangkâina tur an awm chuan thil lawmawm tak a nih rualin, kan kûang lo thleng thleng kan lo dai palh loh nan leh corruption lakah kan fihlîm nana kan fîmkhur te pawh a ṭul viauin a lang.
A palina ah chuan Kohhran thawhlawm thawhna tur siam tam lutukte hi mite neih bâk, theih bâk leh phal bâk phurrit insiamna a ni palh thei angem? Pathian tana thahnemngaih piahlam deuh a lo chet palh awmthei lakah kohhran ho kan fimkhur vete pawh a ngai a ni. Sum tellovin rawng a bawl theihloh kan tih rual hian sum ngainat hi sual tinrêng bul a ni tih kha hriat telve reng a ngâi. Thawhlawm thawh chungchangah hi chuan hnam thil phal kan ni a, keini aia mahni phak tawka thawhlawm thawh tha hi chu khawvêlah an tam lovang. A thawh phal leh thawh thei kan awm lai khan thawh tur neih ve mangloh vanga kohhran ho zinga tel ṭha ngamlo, mi inthla hrúng leh inkiltawih kan siam palh ang tih pawh a hlauhawm khawp mai. Kohhran hote hian sum neih tam lam aiin nun tam neih lam, thlarau lam chaw hi kan buaipui nasat leh ngaihpawimawh ber tur chu a ni tih kan hriat a tulin ka hria.
A pangana ah chuan Kohhran hote chu Pathian tana ding leh thawktûte kan nih avangin eirûkna te kan duhlo va, kan do kan tih rual hian Pathian tana sum thawh kan hman dan hi a corrupt thei tih kan hriatel a ngâi. Chu sum hman dan thianghlim lo chuan Kohhran a ti thianghlimlo thei tihte pawh hi hriat a ṭûl. Kohhran chêt vêlna sum kan hman dan te, inkhawmpui TA/DA kan in pek leh hman danah te hian Lalpa tana sum hman ral dan tur dik a ni em? tihte ṭawngtaina nen fimkhur taka kan kalpui zel loh chuan kan chan leh dawn loh tur dawngin kan lo eiru palh thei tihte ngaihtuah a ngai.
A tawp berah chuan Lalpa tana sum kan hlan te hi sum thiangjlim a ni tur a ni. Sum hlan tur uluk a ṭul thu hi Kohhran mipute kan in hrilh hriat a, sum thianghlimlo chu Lalpa inah lakluh loh tur tihte pawh kan in zirtir tam a ngai. Bible chuan “Fîmkhur ula, awhna rêng rêng lakah chuan invêng rawh u,” a ti (Luka 12:15) tih kan hmu. Mizoram Kohhran ten eirukna kan do tak tak dawn a, chuvang chuan keimahni lam kan in chinfel hmasak ve kha kan tihmâkmawh a ni tih hriain - kan khawnvâr kan hal ang a, hrai hnuaiah dah lovin a dahna ah kan dah ang, tichuan a chhûnga chêng Zofate a en vek thei dawn a ni.
• • • • • •
Scan Here to Donate!
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: