HLIMNA AIIN THIANGHLIMNA THLANG ZAWK RAWH

_Hunbi Hrang Hranga Ṭhan Dan_

-  Rick Warren 

-  Sep 3, 2024

“M tin mahni chaknaa hruai bo leh hipa an awm chuan thlemna an tawk a ni zawk e. Tin, châkna chuan no a pai a, sual a hring thin a; tin, sual chuan a lo puitlinin thihna a hring thin.” (Jakoba1:14-15)

Tunlai khawvel kan thlir chuan mahni mawhphurhna pawh hlenchhuak thei lo hi kan ni fur tawh hlawm a, mi tlemte chauhin harsatna an tawhte chu anmahni tih dikl ohah an pawm thei a. Tu te pawh mai hian kan tuar a ni. A tlangpui thuin, harsatna an tawh te hi an tihsualah an ngai thei lo va; mi dang an puh hlauh thung a ni.

Mi dang kan puh daih a. Sawrkar leh media kan puh a. Kan nu leh pa leh min                                                 thlahtute kan puh a ni. Kan sikul leh a chhehvel boruak kan puh a - nimahsela engkim hi keimahni vang a  ni zawk.   

Thudik chu hei hi a ni, harsatna tam zawk chu keimahni insiam a ni. Mi dang kan mawhpuhna hi ti tawh lo ila, mawh kan phur a ni tih i pawm ang. Englai pawhin mi dang kan puh a, keimahni hi a harsatna chu kan ni tih kan inpawm thin lo a ni.

Tunah khan thlemna tawk ta la, i harsatna chu mawhpuh tur zawn i bansan lova, a chinfel dan i ngaihtuah ṭan loh chuan engtikah mah i zalen thei lo vang. Mi dang mawhpuh bansan rawh! Mi dangin an tihnat che pawhin, a nihna takah chuan i chhan letna avang khan harsatna i insiam a ni zawk.

Mak ka tih deuh chu thenkhat phei chuan an harsatna tawh avangin Pathian an mawhpuh ti tih der nia.

Sualna tam tak lo awmchhan, chhuanlam tha lo deuh hmanga an insawifiah fona thin chu hei hi a ni, “Pathianin hlim turin min duh a, hei hian min tihlim dawn.”

Nimahsela Pathian chuan a Thu chu a kalh ngai lo. Bible-a ‘ti suh’ a tih chu, i rilruah khan ‘ti rawh’ a rawn ti ngai lo vang. I rilrua a lan dan chu a pawimawh ber lo - Pathian Thu aia i rilrua thu awm chu i ngaih pawimawh zawk chuan, thangah i awk ṭep tihna a ni.

Pathian chuan i hlim ai chuan i thianghlim hi a duh zawk a ni. A thu awih turin a duh che a ni. Hei hi thudik tak a ni, Pathian duhzawng i ngaihthah a nih chuan i hlim tak tak thei dawn lo tih hi. Chutianga i tih lek phei chuan chhiat lam i pan tihna a ni. Bible-a tih tur min pek te hi kan nun atana tha lo tur engmah a awm lo. Kan tana tha tur vek an ni.

Khawvela mi hlim berte chu an rilru lo lang thin ai chuan, Pathian duhzawng ngai pawimawh zawka, chutianga khawsa thin te chu an ni.

Ngaihtuah zui atan

* Mi dang mawhpuh tur i zawng a nih chuan nangmahah eng nge nghawng tha lo awm ang?

* Pathian chuan hlimna ai chuan thianghlimna ngai pawimawh zawk turin min duha, chu chu engnge a hlawkna tur?

* Thutlukna pawimawh tak siam hunah engtik lai khan nge i rilrua lo awm khan a hneh zawk che? Chu i duhthlanna chuan engtin nge i nunah nghawng a neih? 

*[Lettu : Sangpuia]*