MZP-in zirlai hruaitu degree nei tharte lawmpui

Aizawl | August 6, 2024: Vawiin ni 6 July, 2024 (Thawhlehni) chawhnu dar 1 khan MZP General Headquarters chuan MZP chhungkua hrang hrang: Hnampual zirlai pawl, College Students' Union leaders, MZU Students' Council (SC) leh Students' Bar Council (SBC) hruaitu Degree nei tharte lawmpuina hun MZP Conference Hall-ah a hmang a. He hun hi Pu C. Lalremruata MZP Vice President in a kaihruai.

MZP President Pu H. Lalthianghlima chuan thu sawiin, Institution hrang hrang leh hnampual zirlai pawlah nasa taka inhmang chung a, mahni zirlai ṭha taka an zo thei chu a fak a. MZP in zirlaite tana thawk chunga result tha tak an nei chu a lawmpui em avangin hetiang hun an puala buatsaih an ni tih a sawi.

MZP President chuan, an thiamna leh finnate hmang ṭangkai turin leh an tawnhriatte chu hna zawnna piah lamah, ram leh hnam tana hmang turin a fuih a. "Zofate chu khawi hmunah pawh awm ila, hnam anga kan dinchhuah na tur chuan inpumkhatna a pawimawh ber a, in enhrang tur kan awm lo. Chu chu zirlai hruaitu hrang hrangte hian i chhawm nung tlat ang u" a ti.

MZP President chuan, Mizoram-in Airport kan neih chhun Lengpui Airport hi midang kuta hlan a him lova, eng dinhmunah pawh ding ila kan Sawrkar kuta a awm hi a ṭha ber a ni a ti bawk.

MZP chuan MZP chhungkua hrang hrang– hnampual, Students' Union, MZU Students' Council leh Students' Bar Council hruaitu degree nei thar mi 88 hnenah lawmpuina thuziak (citation) a hlan a ni.