I RIN LEH NGAIHTUAH AIIN PATHIAN CHU A AWM HNAI

_Min Ti Danglam Ta

-  Rick Warren 

-  Aug 7, 2024

“Lalpa chuan a kotu zawng zawngte chu a hnaih thin a. Tihtak zeta amah kotu zawng zawngte chu.” (Sam 145:18)

Arsi hla ber awmna anga hlaah Pathian chu a awm lo. I lungphu anga hnaiah a awm zawk a ni. Engtiklai pawhin i kiangah a awm a ni. Bible-in Tirhkohte 17:27 ah a sawi a, “Pathian an zawna, an dap an dapa, an hmuh mial theih nan; nimahsela, ani chuan min hlat lo theuh si a.”

Pathian chu mel tam tak a hlaa awm angin i ngai a. Nimahsela i ngaihtuahna leh a tak chu a inang lo fo - chu chu a dik tih kan hre theuh a ni. Thudik chu hei hi a ni, Pathianin tunah pawh khan a awmpui che.

A chhan chu kan kianga awm kan Pa a ni.

*I tan hun nei lo va buai Pathian a ni lo.* Chutiang khawpa hnaiah chuan a awm a ni. Chutiang hmangaihna chu kan chungah a nei a ni. Sam 145:18 ah chuan,“Lalpa chuan a kotu zawng zawngte chu a hnaih thin a.” Pathian biak i tumnaah chuan harsatna i tawk lo vang! I ngaihtuah ai khan a ngaihtuah nasa zawk che a ni. I pian hma atang khan a ngaihtuah tawh che a. Nitinin engtiklai pawhin a ngaihtuah che a ni. Dik tak chuan Pathian be hman lo vin keimahni hi kan buai zawk a. Nimahsela a ni chu keimahni tan hun a insiam reng zawk a ni. 

*I mamawh i neih theih nan Pathianin a hmangaihna che a lantir.* A mite a itsik ngai lo va. A fate a ngaihsaka, an mamawh tih an hriat loh pawh a pe thin a ni. Matthaia 7:11 ah chuan, “Nangni mi sual mahin in fate thil tha pek nachang in hriat chuan, in Pa vana mi chuan a diltute chu thil tha a pe zawk em em dawn lo vem ni?” A dik tak chuan Pathianin thil tha pek che hi a duh em em zawk a ni.

*Pathianin i natnaah a tuarpui che.* Thenkhat chuan tunkar chhung hian harsatna namenlo in paltlang a, chu vang chuan hei chang hi i mamawh a ni: “Lalpa chuan thinlunga lungchhiate chu a hnaih thin a, rilrua inchhir apiangte chu a chhandam thin,” Sam 34:18. Nangmah uai rittu harsatna zawng zawngte chu Pathian hnenah thlen la, amah chu phurhtir ang che. Nangmah thlamuan tur leh tanpui tur chein a awm reng a ni.

Pathian chu i kiangah a awm a, a hrethiam che a ni. A hnen lam hawi la, titipui la, tun huna i mamawh tinrengah amah chu ring ang che. 

Ngaihtuah zui atan

* Vawiin hian eng thilah nge Pathian i mamawh?

* Pathian chuan a hnaih che a ni tih engtin nge i hriat theih ang?

* Pathian tan buai ti reng lo va hun i insiam theihna turin eng thil nge thlak danglam i mamawh?

*Vawiinah hian Isua i zui ang em?*

Pathianin a thatna chu Fapa, Isua Krista kaltlangin a tilang tawh a. Bible chuan, “Pathianin khawvel a hmangaih em em a: Chutichuan a Fapa mal neihchhun a pe a, amah chu tupawh a ring apiang an boral lohva chatuana nunna an neih zawkna turin” a ti. Johana 3:16

Chatuana in nun theih nana Pathian thutiam chu ring turin i inpeih em? I inpeih a nih chuan, hetiang hian tawngtai rawh: “Ka sualnate ka puang a, ka Lalpa leh Chhandamtu atan Isua hi ka pawm e. I hnung zuia, i rawngbawl ka duh e. Ka nun tlawm tak hi ka hlan che a, i angchhunga min pawma min chhandam ve turin Isua hmingin ka dil a che. Amen”

Hetianga i tawngtai a nih chuan, Rick@PastorRick.com ah hian email min lo thawn la. Isua nena zinkawng i zawhtanna atana pawimawh te a thlawnin ka lo thawn ang che.

[Lettu : Sangpuia]