LBS Suzuki Youth Icon-ah mi 453 tel, 272-in audition round paltlang

Aizawl | August 29, 2024: Mizoram chhung leh pawn atangin LBS Suzuki Youth Icon Audition Round pal tlang mi 270 chuang an awm a, September 10-ah round hmasa ber intihsiak ṭan a ni ang.

Audition Round-ah mi 453 telin, Telegram leh WhatsApp kal tlangin Mizoram chhung aṭangin mi 440 bakah

Tripura, Manipur, Mumbai (Maharashtra) leh ram dang Myanmar leh Oman atangin 13-in an zai video an theh lut.

Heng zing aṭang hian mi 272 thlang chhuakin Mizoram chhunga district hrang 11 aṭangin tling an awm vek a; Aizawlin ngah berin 139, Mamit 26, Serchhip 25, Saitual 19, Champhai 16, Kolasib 15, Lunglei 10, Lawngtlai 8, Siaha 4, Hnahthial leh Khawzawl district aṭangin 3 ve ve an tlin bakah Mizoram pawn aṭangin mi 4-in audition round an pal tlang bawk.

September 10 khian LPS Studio, Zarkawtah round khatna inzaisiak ṭan a ni dawn a, September 21, Inrinni zanah round hmasa ber result puan hman tum a ni.

Top 10 inelna, October 5 aṭanga Grand Finale, October 19 zan thlengin LPS Arena, Falkland-ah mipui chhim theih turin an inzaisiak zui ang.

Youth Icon vawi sarihna hi a hmasa ber 2006 hnuah, tel an la tam ber ṭum a nih thu a buatsaihtuten an sawi a; a hnuhnung ber 2019 ang bawkin LBS Suzuki (Bawngkawn) thawhpuiin title sponsor an ni leh a, Hõm Furniture (Bawngkawn) leh Sailo Agencies Home Appliances (Ramhlun South)-in sponsor bawkin, lawmman pawisa fai Rs nuai 4,40,000 sem chhuah a ni ang.

Mizorama reality television show hmasa ber hi 2006 aṭangin vawi ruk buatsaih a ni tawh a, Youth Icon hmasa ber Zoramchhani hnuah 2007 khan Malsawmtluangi, 2009-ah R Lalhmangaiha, 2012-ah H Lalrempuia, 2016-ah K Lalthlamuankimi leh 2019-ah Zothanpuii thlan an ni.