Inter District Wrestling Sub Junior-ah Serchhip an chungnung; Rinchhana'n Palian title fight a hnaih!

Aizawl | August 29, 2024: Inter District Wrestling Championship vawi sarihna ni hmasa berah sub-junior inelna zawh fel a ni a, gold panga nen medal pakua lain Serchhip an sang ber.

Inelna dang ngaihven hlawhah Mizo palian inchai champion Lalsangliana cho tur zawn a ni. Mi pali tel tura beisei an nih laiin pathum ziah luh an ni a, North Vanlaiphai inchai chak Lalrinchhana Sailo chuan Zokhawthar tlangval Laldinthara a bawhbet.

Nilaini chhunah LPS Arena, Falkland-ah hawn a ni a, zanah chhunzawmin kum 15 hnuai lam inelna zovin gold medal 10 an sem chhuak. District pasarih telin Serchhipin gold awm chanve panga bakah silver leh bronze pahnih ve ve an la a ni.

Kolasibin dawtin gold pathum leh brinze pakhat an dawng a; pathumnaah championship thlengtu Aizawl an awm a, medal 15 dawng mah se gold pahnih chauh telin silver pasarih leh bronze paruk an hlawh chhuak.

Zanah Mizo inchai title chuh tur zawnna buatsaih ṭanin thawh thum zel an inbei. Palian inchai hmasa berah thawh hnihna a tawp thlengin point a awm lo va, thawh hnung berah Rinchhana'n vawi 10 chhiar thlengin Dinthara a bawhbet a, chiang takin a chak.

A vawi khat nan title chuh thei turin Rinchhana'n hmabak a nei tam tawh lo. Lunglei tlangval Lalremtluanga nen an innuai leh dawn a, a chak a nih chuan a tlang ang. Kum 33 mi Sangliana hmaa ding tur zawnnaa tel palian pathum an inchai kual vek dawn a ni.

Palaihawl title chuh tumin mi panga an tel ve thung a, Saitual inchai chak Ngursangzuala'n harsa lo takin Ramropuia (Mamit) a hneh a, 10-1-in a hneh. Semifinal-ah Ngura'n Vanlallawma (Muallungthu) a hmachhawn dawn a, lehlamah RB Lalthansanga (Muallungthu) leh Jeho Zonunsanga Ralte (Ailawng) an inchai ang.

Patê title chuh tumin mi pariat an tel ve thung a; eng emaw chen title kawl tawh Lalchhanhima'n mi thar Nazareth Lalṭhazuala lakah inlehthalna a pumpelh hram a, 4-3-in a chak.

Saitual chhuanvawr Chhanhima hian thawh khatnaah thiamna a neih chhawrin point li a hmu nghal a. Combat sports hrang hrang khel kual nasa tak Zemabawk tlangvalin nawr letin thahrui a nei a, thawh thumna thlengin a fei a, mahse, tawn hriat a tlachham a, point thum bak a hmu ve hman ta lo.

Republic Veng inchai chak Lalhmangaihzuala'n 6-4-in amah aia tawn hriat nei Lalhruaitluanga (Kolasib) a hneh ve thung a, a tir lamah hniam zawk mah se thahrui nei leh chau har zawk a nihna chhawrin a ṭuan a ṭha zawk bawk a. Semifinal-ah Chhanhima nen an inhmachhawn dawn a ni.

Champion tawh Bulfekzawl inchai chak Lalawmpuia'n title lak kir a tumna a puitling zo lo nghal teuh hle a, Jacob Lalrinliana (Venghlui) nen thawh thum an inchai zawh thlengin 4-4-in an inhnehtawk. Inbanphawi hmangin chak zawk an zawng a, Awmpuia a tlang hram.

Saitual tlangval Johny Lallawmkima'n harsatna lian tawk lovin John Lalremmawia (Kolasib) a hneh ve thung a, 6-0-in a chak. Semifinal-ah Lawmkima'n ani aia hnuhma nei ṭha Awmpuia a hmachhawn a ṭul dawn a ni.

Ningani chaw hma dar 11 aṭangin inter district junior leh senior inelna neih a ni ve leh ang a, zan dar 8-ah thawh hnihna chhunzawmin Mizo inchai title chuh tur zawnna a awm leh dawn a; inchai hi LPS 10 leh LPS youtube channel-ah live-a pek chhuah a ni.