Inremna leh Hnam inpumkhatna chungchangah ZORO kaihhruainain inkawm

Aizawl | August 21, 2024: Vawiin ni 21, August 2024 chhun dar 12:00 khan Chin Brotherhood hruaitute, Interim Chin Nation Consultative Council (ICNCC) hruaitute leh ZO Re-Unification Organisation (ZORO) hruaitute chuan inremna chungchangah an inkawm.

Inkawmna hi ZORO Pisapui Treasury Square Aizawl-ah an nei a, meeting hi Pu Rohmingthanga Kawlni Vice President ZORO in a kaihruai a, Pu Moses Lalramchhana Vice President in hunserh hmangin, Chin Brotherhood hi Defence Secretary Pu Timmy Lalliana'n hovin, Interim Chin Nation Consultative Council (ICNCC) hi Pu Salai Lian Luai President ICNCC in a ho a ni.

Myanmar Chin State-ah hian Chinland Government/Chinland Council leh Chin Brotherhood/ICNCC te chuan inhmuhthiam lohna neiin Silai an lek hial a, hei hi ZORO chuan tha ti lovin pawi a ti hle a. Unau vek kan ni a, in hmu thiam lo tur kan ni lova inlungrual taka awm tur kan nih avangin an inkarah remna palai hna a thawk mek a ni.

Pu L. Ramdinliana Renthlei ZORO General Secretary chuan meeting koh chhan sawiin, "Unau kan ni a, inthen thei kan ni lo, indo thei pawh kan ni lo tihah hian kan chian a ngai hle a. Unau thlahkhat kan nih angin Pathianin engtika emaw chuan min la suihkhawm ang tih hi kan ring tlat a ni. Chuvangin unau indo hi a tha lova kan inrem a ngai a, Zofate chu lungrual taka awm hi kan duh a, kan pawl thil tum pawh a ni a, hei hi remna palai hna kan thawhchhan pawh a ni," a ti.

Pu Salai Lian Luai President ICNCC chuan, "Remna kawng zawha ZORO in hma in la hi tha kan ti hle a, keini ho hi thinlung takin remna min siamsak induh tih kan hria a, remna kan neih theih nan tan min laksak zel turin ka sawm che u a ni", a ti.

Pu Timmy Lalliana, Chin Brotherhood Defence Secretary chuan, "Vawiina remna chungchanga kan inhmukhawm hi a bul tanna nise, Zofate inkarah inlungrualna thleng zel se tih hi kan duh dan a ni. Keini chuan inlungrualna kan duh avangin min bei tute pawh tumah kan beilet ngai lo. Zofate zingah inpumkhatna a awm thei dawn tak tak a nih chuan kan nihna te thiah vek a, a bul atanga tan that leh pawh kan duh a ni."a ti.

ZORO chuan Chinland Government/Chinland Council leh Chin Brotherhood/ICNCC te inkara inhmuhthiam lohna awm chungchangah an inrem theih nan hma a la zel dawn a. Hun remchang hmasa berah an inrem theih nan a hu hova inbiakna Dawhkan kilpui a tum a ni.