Mizoram Voleyball Lovers (MVL) buatsaih khuarel chhiatna tur te tanpuina tur chu July ni 13, 2024 (Inrinni) zanah R Dengtuama Indoor Stadium, Mualpuiah inkhel hmuhnawm entur a awm dawn bakah Zaithiam zai ngaihthlak tur a awm dawn bawk. LPS leh Zonet ten Live in an pechhuak dawn a ni.
Ticket lei tur te tan Rs 50 a ni dawn a, Dawr hrang hrang RAW Digital Zarkawt, VL Ralte Store Treasury Bus stand, PISGAH Automobile Bawngkawn lunglei Road, Unique Creation Salon & spa kulikawn-ah te lei theih a ni ang a, A hmunah lei tur a awm bawk ang.
Gate hi tlai dar 5:00-ah hawn a ni ang a, dar 5:30-ah Comedian / YouTuber leh Celebritise te an innuai nghal ang. Dar 6:00-ah tunlai zaithiam lar zai ngaihthlak tur a awm zui bawk dawn a ni. Dar 8:00-ah Main Event All Star leh North East Olympic Volleyball Champion te an innuai ang.
Mizoram Olympic Team vs All Star Team
Engvanga inkhel tur nge an nih?
Kan thuneihnain a huam phak loh leh kan thunun rual loh, leilunga chhiatna lo thleng, mihringin kan tuar ṭhin hi hi a run thlak ngawt mai. Lungawi a har a, a tuartu chhungkua te tân ngat phei chuan khawvel hi chen zui zel chakawm lo khawpa an chhe dawng a ni thei tlat a ni. Thina a thlena, piansualna leh dam chhung khawloh hlenna hial a thlen ṭhin si a. He leia in tawng leh ngai reng reng tawh lo turin chhungkaw tam tak an inṭhen phah a, in leh lo châna mangang taka awm kan ther fur ṭhin a nih hi! A pawi vawng vawnga, keini dan rual lah a ni hauh si lo.
Veng khata a thiam pawl nih hi thil harsa tak a ni a. State pakhat aiawh tur phei chuan mi bik nih a ngai ti ila, dawt kan sawi hauh lovang. Chung mi bik rual thlan khawm te leh, an aia nep chuang hauh lo, an zavaia thlan theih a nih si loh avanga hruai tak loh player ṭha rual awm khawm te inhmachhawn tur hi thil thlir chakawm, kar tluana en theiha awm atana duhthusam a ni.
An ti mai mai dawn lo.
Mizoram tana NE Games a Gold beng chhuaktu te hi an chhe thut dawn lova, an combination a buai thut dawn lo. Chutiang bawkin anmahni ang thova Volleyball vanga tlang hriat, All Star Team hming putu te hian Gold Medal beng chhuaktute hi hneh loh an tum dawn lo. An ti mai mai dawn lova, inkhel duhthusam, hmuhnawm leh mit ti tlai min hlui ngei ngei dawn.
Coach pahnih leh manager te hi han thlir la, an naute hi an theihna sang ber phochhuak turin a karin an kar chhuak ngei ang le. Aizawlah i awm a, Volleyball ka ngaina i ti a nih chuan maw, a hmunah ngei en rawh, i inchhir lovang. A hmunah i en lo a nih chuan volleyball ka ngaina ti vawi tam mahla, tuman an uksak peih lovang che! Mi mangang leh harsatna tawk, chhiat tawkte ṭanpuina tur ni mahse, game pui tak en turin in ring tawp mai rawh.
North East Games neih zawh taka Mizoram game kha in mitthla let thei em? 7sister zingah Valbuanga hup zo reng an awm lohzia kha i la theihnghilh hman ka ring lo. Langsar vût si lova Fabiana game hmuhnawmzia te kha nimin ang maiin mitthlaah a la cham asin. Lalmama hi Spiker te tana ball vawrh turin zirtir hran a ngai tawh lo. A ball vawrh te chu keini, pa sanṭha satliah pawhin net chunga dar lawr zawk khawpa zuangin, a lo dawngtu te hnap dawk zawkin kan vuak per thei ang chu mawle.
Khingpui spiker ṭha te ball vuak hup thla tura Zosangzuala te, Ṭpa te, Zodinga leh Nunfela te ho theihna zozai te kha ennawm ennin theih loh zuk ni ngawt a! Lawmman in a um emaw tih mai tur, Biakmuana nise, ani tluka duh thlan tur chuang an awm lo tih mai tur a ni a. Hriatpuia te lah ngaihtuahawm an ni si lo. A hmâah ball har a awm thei lova, ball a hlah thei lo emaw tih mai turin Rinngheta defence a hmuhnawm leh dawn. A che vel zangkhai hah reng mai Sadrak Fanai khel hi a ennawm ṭhin asin!
Mizoram Olympic Team te ṭhatzia hi inhrilh chiam a ngai lo. Mahse, anni ho lo do let tura All Star Team a rawn khel turte hi pal liam mai mai chi an ni hauh lo. PVL khelh zawh taka Best Spiker lawmman dawngtu, Khawhai tlangval Zomuansanga leh Khawbêl ruak hnawh khattu satliah a nih lohzia chetziaa pho langtu, Johan Vanneihsanga te turu zia hi sawizui chiam ngai a ni lo.
Anni tluka hmuhnawm, Saidingpuia Sailo a la awm cheu. Saitea zuan sanzia leh ball vuak thiamzia hi i la chian lo a nih chuan, July ni 13 zanah, R. Dengṭhuama hall pan mai rawh. Captain cool, Bawiha Sailo hoin, Thangmina te, Mapuia Ralte leh Vanlalmawia, Josepha te ho hian Arbawm an tah mai mai dawn lova. Engemaw ṭhial chap chap paha Hnehpuia chesual duh miah lk te, nula te star rawn, Ramhluna ball vuakna sanzia te hi lo ennawn rawh aw.
Libero sawi apianga tlar hmasa luahtu, Hmingsanga hi lehlam pawl tana a ngeiawm zia mitin kan hmu fo. Hmuh nawn leh a chakawm asin. Setter ṭha, duh thlang tur ni ila, ṭhum vawr mai ka duhna tur ṭhiau mai, Davida, C-Tea leh Kima te hian lû an ti hai. A ruala luhtir vek theih an ni dawn si lo. A hmunah ngei en a chi ang.
Post a Comment
He post chungchanga i ngaihdan lo sawi ve rawh: