Lunglei HPC Vice Chairman-in Govt JNM Model M/S a tlawh

Aizawl | July 10, 2024: Vawiin khan Lunglei High Powered Committee (HPC) Vice Chairman Pu V. Malsawmtluanga chuan Lunglei Electric Venga Government JNM Model Middle School chu tlawhin, an school dinhmun tlangpui a enpui.

HPC Vice Chairman Pu V. Malsawmtluanga hi Lunglei DIPRO Pu C. Lalhruaitluanga leh HPC-a thawktute'n ṭawiawmin, Govt JNM Model Middle School Headmaster Pu V. Lalrinkima hovin thawktute'n an lo dawngsawng a. HPC suma sikul building zauh hna thawh mek leh hmabakte thlir hovin, hma lak zui dan tur an sawi ho a ni.

Pu V. Malsawmtluanga chuan sawrkar sikulte chu sawrkarin mi rethei leh harsa zawkte a puih theihna pawimawh tak a nih avangin sawrkar sikulte thuam chak leh tihchangtlun a pawimawh thu sawiin, sawrkar sikula zirna tihhmasawn kawngah zirtirtute an pawimawhzia leh sawrkar hnuaia zirtirtute'n theih tawp an chhuah a ṭulzia a sawi a. Sawrkar sikul chhuan tlak leh naupang ngahte chu a theih chin chinah theih tawp chhuahpui a inhuam thu sawiin, Lungleia sawrkar sikul entawn tlak ber pawl Govt JNM Model Middle School a ngaihhlutzia lantir nan HPC Fund aṭangin an sikul building zauh leh thawm ṭhat hna te pawh thawk tura ruahmanna siam a nih thu a sawi.

Govt JNM Model Middle School hi kum 1969 January ni 16 khan mi ṭhahnem ngaite hma laknaa din a ni a. Kum 1979-ah Govt Aided-ah hlan kai niin, kum 1985-ah Govt Deficit-ah hlan kai a ni leh a. Kum 2003 September ni 1 aṭang khan sawrkar sikul puitlingah hlan kai (provincialised) niin, kum 2014 khan Model Middle School atan puan a ni a. Tun dinhmunah thawktu headmaster 1, teacher/instructor 16 leh IV Grade 1 awmin, zirlai naupang 137 an awm mek a. Middle School a nih angin class V - VIII thleng zirna awmin, Lunglei District chhunga sawrkar middle sikul zingah zirlai ngah ber an ni mek a ni.