THUAWIH HI HLIMNA THURUK A NI

_I Mamawh Tawpkhawk Pathianin a Pek Dan Che_

-  Rick Warren 

-  July 10, 2024

“Kan kawngte chu fiahin en ngun ila, Lalpa lam i hawi ang u.” (Ṭah Hla 3:40)

Hlimna hi hote a hloh theih a ni a, awlsam taka neih let theih a ni thung.

Hlimna chu i hloh tawh em? Pakhatnaah chuan, i hloh tawh a ni tih hi i pawm a ngai. Chumi hnuah engnge a chhan tih i zawn chhuah a ngai bawk. I nun thlir la, hei hi inzawt rawh, “Engvangin nge ka hlimna ka hloh? Engin nge ka hlimna chu min laksak?” 

Bible chuan kan nun hi kan enfiah fo tur a ni a ti. Ṭah Hla 3:4 chuan, “Kan kawngte chu fiahin en ngun ila, Lalpa lam i hawi ang u,” a ti.  

Hlimna min laksaktu thil tam tak a awm, chung zingah chuan thil pahnih langsar deuh a awm a; hun hman dan mumal lo leh talent hman chhuah loh hi a ni. Hnathawh leh chawlh hahdam leh, lak luh leh hmanchhuah inmil deuh i neih a ngai a ni. Pathianin talent danglam bik a pek che pawh i hmanchhuah a ngai, a nih loh chuan i chau tawngkhawng takngial dawn.

Chumi awmzia chu i talent zawng zawng hman chhuahna tur hna i zawng tur tihna a ni hran lo. I hnathawhnaah i hman loh zawng chu rawngbawlnaah i hmang thei ang. (I talent zaa 25 chu I hnathawhnaah i hmang lo a nih chuan, hna dang i lanchhuah theihna tur zawng rawh) 

Thil dang zawng aia i hlimna laksaktu che thil pakhat a awm. Chu chu i hria em? Thil tha tih tur hriaa i tih loh hi a ni. Bible chuan Jakoba 4:17 ah, “Tu pawh thil tha tih tur hriaa ti si lo chu a tan sual a ni,” a ti.

Hei hi i hlimna i hloh chhan a nih chuan, i nuna thil dik lo chu siam tha rawh le.

Hei hi ka zawt ang che: I tih ngai loh te ti turin engnge i hriat ngai? Pathianin tih tur a hrilh che i la tih loh engnge ni?

Hlimna duhawm, hlimna luang chhuak neihna chu thuawihna hi a ni.  Pathianin ti tura a tih che tih hi a ni bawk. Pathianin ti tura a tih apiang che i tih zel chuan i nun chu hlimnain a lo khat ang.

I nunah thil tha i ngaihtuah a nih chuan hlimnain i khat bawk ang. Davida chuan Sam 126:3 ah chuan, “Lalpan thil ropui takte min tihsak a, kan lawm hle a ni,” a ti. Pathianin a tihsak che i ngaihtuah tam hian, i nunah hlimna i nei telh telh ang. Engvang nge? Pathian hnen atanga chhuak chuan hlimna min pe a ni. Hlimna nun neite hi khawvela mihring rilru hrisel ber an ni. 

Hlimna chu neih leh i duh a nih chuan, a hmasaberah chuan i hloh tawh a ni tih pawm ang che, chumi hnuah a chhan zawng la, tichuan a dik lo lai siamtha la, hlimna nun chu nei ang che.

 

Ngaihtuah zui atan

* I nuna hun inbuk tawk lo chuan i hlimna an ruksak che avangin engvangin nge hun inbuktawk i neih a tul?

* Pathianin ti tura a tih che i la tih loh engnge ni?

* Vawiina i lawmna hi sawichhuak turin Pathian thilthlawnpek engnge i mamawh le?

[Lettu : Sangpuia]