I HLIMNA KHA NEI LEH RAWH

_I Mamawh Tawpkhawk Pathianin a Pek Dan Che_

— Rick Warren 

— July 9, 2024

“Pathian ram chu ei leh in lam thu a ni si lo va, felna te, remna te, Thlarau Thianghlima lawmna te a ni zawk e.” Rom 14:17

I tan eng thil nge hloh awlsam ber? I tarmit nge? I chabi nge? I rilru?

Khing thil zawng zawng khi hloh a awlsam vek a, hlimna hloh hi hengte ai hian a awlsam ber a ni. Phone-a inbiakna emaw email emaw, lehkhathawn emaw titina aṭang ringawt pawh hian a hloh theih a ni. Sumdawnna lama fakna i en aṭang ringawt pawhin i hloh thei a. Hlimna hi thil hloh awlsam tak a ni.

Hlimna i hloh chu a ṭha lo satliah a ni lo va — Pathian fate an hlim loh chuan, Pathian hmel pawh an tibâl thei a ni. Kristian herh te chu thuhretu ṭha lo tak anni. Vinegar hmanga baptisma chang ang mai an ni, hlim hmel an pu ngai lo. Chu chuan Pathian hmel a tibal a ni.

Pathianin a fate chu an hlim hmel thlengin thuhretu an nihnaah langchhuak se a ti a ni. Thufingte 15:13 chuan, “Thinlung hlimin hmêl hlim a siam,” a ti bawk a ni.

Bible chuan Kristian nun chu kawng thumin: ṭhatna, thlamuanna leh hlimna hian a khaikhawm a ti. Rom 14:17 ah kan hmu a, “Pathian ram chu ei leh in lam thu a ni si lo va, felna te, remna te, Thlarau Thianghlima lawmna te a ni zawk e.”

Hlimna chu Kristian nun hruaitu a ni kan tih rual hian, awlsamtein i hloh thei a, kawng hrang hrangin i hloh thei si a ni. Mi tam takin i hlimna an laksak dawn che a, Pathian zawlnei, Jeremia meuh pawh khan hetiang hian a sawi a ni. Ṭah Hla 5:15: “Kan thinlung hlimna a chuai ta.”

Tun dinhmunah hian khawiah nge i awm ka hre lo. Tunhmaa Pathian nena inpawh tak ang khan awm tawh lo vin, hlimna pawh hloh tawhin i inhre mai thei. Thil tam tak i paltlang pawh a ni mai thei a ni. Hei erawh hi chu i hriat a ṭul, hlimna chu hloh a awlsam tlukzetin neih let leh pawh a awlsam thung a ni.

Engtin nge hlimna chu i neih let tak ang? A hmasa berah chuan i hloh tawh tih hi inpawm rawh.

Hlimna chu i hloh leh hloh loh i inhrechiang lo a nih chuan hetiang hian han ti chhin teh. I nunhlui kha chhui kir la, zawhna inzawt teh: Tun aia Pathian hnaih zual deuh hunlai kha neiin i inhria em? Tun aia nasaa Pathian hnena hlimna i neih hun a awm em?

Aw tia i chhan chuan, hlimna chu i hloh der tawh tihna a ni. Tun hi hlimna neih let hun chu a ni.

Davidan Sam 51:12 ah engtin nge a sawi. Hlimna chu hloh tawh ngeiin a inhria a, Pathian chauh chu pe let theitu niin a inhria a, hetiang hian a ṭawngṭai a ni, “I mi chhandam hlimna chu mi pe leh la: Thlarau tihnuamin mi chelh reng ang che.”

Pathianin Davida chu hlimna a pe leh ta, chutiang chiah chuan nang pawh hlimna pe let tur chein a inpeih reng a ni. Tute pawhin kan tih tur chu dil hi a ni. Chu chu hlimna i neih let theihna tura rahbi hmasa a ni.

Ngaihtuah zui atan

* Pathian hnena hlimna i neih san lai ber kha han ngaihtuah teh. Fianrial hun hman leh thlarau pawla i kalna chu engnge danglamna?

* I hlimna laksaktute chu engte nge? Pathian chungchangah engnge thlak danglam an neih? 

* Amah i hmangaihna leh i rinna chu an ti danglam thei em?

*[Lettu: Sangpuia]*