Aizawl | July 10, 2024: MPCC-in CBI general consent pe tha leh turin an ngen a, an phut bawk
He thu hi vawiin chhun dar 12 khan Aizawl Press Club-ah thuthar thehdarhtute kawmin Mizoram Pradesh Congress Committee (MPCC) Vigilance cell chuan an tarlang.
MPCC Vigilance cell chuan, "Vawiin July 10, 2024 (Nilaini) hian ZPM sorkarin CBI hnena general consent a pek, tunhnaia a hnuh kir leh chungchangah Mizoram Chief Minister hnenah ngenna kan thehlut a, inthlan hma a an intiam ang ngei a general consent pe tha leh turin kan ngen a, kan phut bawk a ni." an ti a.
"Kan Chief Minister hian Mizorama corruption a nasat thu leh chumi dona tura CBI an koh luh tur thu mipuite hmaah vawi duai lo a lo sawi tawh a. Tin, Hon’ble Governor thusawi, December 14, 2023 a Assembly House a sawihona-ah pawh "..kan Sawrkar kalta ah khan Lokayukta-in CBI hnena pek a rawt pathum lai kan sawrkara theh luh kan sawrkarin a lo dang chat a, pek a phal lo kha a ni a. Keini erawh chuan general consent kan pe dawn a. Engmah phalna min dil min dil a ngai dawn lo. An kuta thu lut chu an investigate mai dawn a ni" tiin a sawi a ni. He a thusawi a case pathum a sawi hi Mizoram sorkar hnuaia Public Servant-te chungchang a nih avangin he a thusawiah hian Central sawrkar hnuaia hnathawkte chungchang ni lovin Mizoram sawrkar hnuaia hnathawkte chhui chungchang ngei a sawi tih phat rual a ni lo." an ti bawk.
"Chief Minister, Minister leh State Sawrkar hnuaia mi pawimawhte laka complaint lut huai tak leh thlei bik nei lo a chhui hi an thuhnuaia awm Mizoram Police leh ACB-te tan thil theih loh tluk a ni a, chuvangin, heng VVIP-te leh an hnaivaite chhui tur chuan an thuhnuaia awm lo, Mizoram Lokayukta leh CBI angte hi a mah Pu Lalduhawma, CM ngei pawh hian a ring zawk a ni tih a chiang hle. " an ti a.
MPCC Vigilance Cell chairman Lalnunmawia Chuaungo chuan, "December 14, 2023 a Assembly House a CM thusawi bawhzuina ni ngei turin, ZPM sorkar hlim khan Gazette Notification No C.31016/I/2020-VIG, the 28th December, 2023 chhuahin CBI-in Mizoram chhunga investigation an tih theih nan phalna (general consent) chu pek a ni ta a. He Notification, Section 6 of the Delhi Special Police Establishment Act, 1946 behchhana chhuahah hian Central leh State sawrkar hnathawkte thliar lovin chhui phalna (general consent) pek a ni a. Mizoram chhungah State sawrkar phalna a hrana lak ngai lovin Central leh State sawrkar hnuaia hnathawk, public servant-te chhui phalna, power leh jurisdiction chu CBI pek a ni ta tihna a ni. Hei hi December 14, 2023 a Assembly House a CM thusawi nen pawh a in mil thlap a ni." a ti a.
"Amaherawh chu, CBI Director lehkha Do No. 507/24/12/2022/PD (General Consent) dated 20th June, 2024 chu chhuanlama hmangin, CBI Director-in State hrang hrang Chief Secretary-te hnena generic draft consent notification a rawn thawn chu a ngai ngai a hmangin, Gazette Notification thar, July 1, 2024-ah tih chhuah a ni leh ta a, a hma December 28, 2023 a Notification chu awmze nei lovah an rawn siam leh ta si a ni." a ti.
Sawi chhunzawmin, "Hetianga hun rei lote chhunga ZPM sorkarin thu an rawn zuk leh tak chungchangah hian chhan pahnih chauh awm theiin kan hria a. Pakhatna-ah chuan Pu Lalduhoma kaihhruai ZPM sawrkar hian ngaihtuahna fim hmang lo leh mipui hma an thu tiam te, Assembly House a December 14, 2023 a CM thusawite kalhin CBI Director-in State tin Chief Secretary-te hnena generic draft consent notification a rawn thawn hi a ngai ngaiin an lo pawm ringawt mai a ni. Pahnihna-ah chuan Pu Lalduhoma kaihhruai ZPM sawrkar hi corruption lakah a fihlim lo a ni tih vantlang hriata sawi a nasat tak em avangin CBI chhui nih hlauh vangin CBI Director lehkha hi chhuanlamah an hmang a, CBI tana general consent pek tawh hi an tan thil him lo leh hlauhawm ni a an hmuh tak vang a ni thei bawk. Heng kan rawn sawite hi a dik lo a nih chuan tihdikna a rang thei ang bera siam turin kan phutin kan ngen a ni." a ti.
"CBI hian State chhungah thuneihna nei lo mahse, Section 6 of the Delhi Special Police Establishment Act, 1946 hnuaiah State Sawrkar-in thuneihna a pe thei a. Tuna Central sawrkar hnuaia thawkte chauh chhui thei tura CBI hnena consent pek hian Mizoram mipuite tuihalna a ti reh lova, ZPM-in inthlan hma a an thutiam pawh a ti hlawhtling bawk hek lo. Chuvangin Gazette Notification thar chhuah a, Central Sawrkar hnuaia thawk public servant te bakah Mizoram Lokayukta in rawtna a siam a nih phawt chuan Mizoram Sawrkar hnuaia thawk public servant te, Mizoram sawrkar phalna a hranpa a lak kher ngai lova chhui thei tura CBI hnena general consent pekna Gazette Notification chhuah turin CM Pu Lalduhoma leh a kaihhruai sorkar hi kan phutin kan ngen a. Draft Gazette notification pawh kan thehlut nghal a ni." tiin hemi chungchanga an hmalal dan a sawi bawk.
• • • • • •
Scan Here to Donate!
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: