MZP-in Mizoram chhunga Assam chetna enfiah!

Aizawl | July 31, 2024: MZP General Headquarters hruaitute chuan vawiin khan Assam leh Mizoram ramri, Mizoram chhunga Assam-in hmathar an lakna hmun Aitlang, Vairengte an tlawh a. Assam Police-in an camp panna kawng an laih avanga Mizoram chhunga kut thlakna thar nia lang chu a hmunah an tlawh a ni.

Vawiin chawhma dar 11:00 khan, Joint YMA Vairengte leh Joint VC hruaitute nen Joint meeting neiin, he inkawm khawmna ah hian MZP hruaitute chuan; ralkhat atanga thlir ringawt lo a khawtlang hruaitute atang ngei a thil chiang zawk hriat an tum vang a ni tih an sawi a. Vairengte khawtlang hruaitute chuan Mizoram Police camp panna kawng motor tlan theihna tura blacktop emaw block phah a nih ve loh thu leh awlsam taka kal zung zung theih ala nilo chu MZP hruaitute hnenah hian Sawrkar chak zawka nawr turin an lo ngen a ni.

MZP hruaitute chuan, tun hnaia social media a video rawn viral a, Assam Police in an camp panna kawng motor luh theih nana Pu Samuela huan bul an laih leh Pu Chhandama huan a Assam Police in a camp an rawn nei nia langte chu a hmun ngeiah kalin, an zuk enfiah nghal a ni.

Mizoram lam, 3rd Battalion MAP Camp awm mekna piah lama kawng an laih mek chu ruah a sur avanga an chawlh rih thu zawhfiah niin, MZP chuan Assam Police lam in a an kawng sial chu 9th August, 2024 hmaa Assam leh Mizoram sawrkar nen a inbiakna awm leh hma chu hnathawh hi ti tawp rih tura hmala turin thuneitute an ngen bawk.

He hunah hian, MZP hruaitute hi SDO (Civil) Victor Lalawmpuia leh SDPO H Lallunghnema te'n an tawiawm bawk.