ICT Minister-in NIELIT Aizawl Mobile IT Lab hawng

Aizawl | August 1, 2024: Vawiin khan Information and Communication Technology (ICT) Minister Dr Vanlalthlana chuan NIELIT Aizawl-in an neih thar, Mobile IT Laboratory a hawng.

He Mobile IT Lab hawnna inkhawm, NIELIT Aizawl Zuangtui-a neihah hian Minister chuan a tlangzarh zawhah thu sawiin, khawvel thang zelah Information Technology huangchhungah Artificial Intelligence (AI) nen a mihring te inel tawhna khawvelah zirlaite leh zirtirtute theih tawp chhuah turin leh, thil thar hmuhchhuahna kawngah hma la zel ngam turin a chah a. Amah ngei pawh ICT lama a mikhual loh thu leh, hun rei tak atanga IT lam a ei lo zawng thin a nih thu te, tun hnuah AI a hman tangkai thu te, thusawi tur leh MOU sign tur te pawh a siamtir theih vek thu te, heng bakah hian hman tangkaina tam tak a awm thu a sawi a. NIELIT Aizawl chu hmalam hun atan duhsakna a hlan.

Minister hian Mobile IT Lab hi a hmanna hmasa ber ni turin a vailiam a, he Mobile IT Lab hmang a training buatsaih, Zuangtui High School-a ‘One Day Training on Artificial Intelligence’ a hawng nghal bawk.

He Inkhawmah hian Dr. T.Gunendra Singh, Director NIELIT Aizawl chuan lawmna thu a sawi a. Pu Vanlalhmangaiha Khiangte, Scientist-D in Mobile IT Lab chungchang a sawifiahna a ni. Higher & Technical Education Department atangin Prof. Benjamin Lalrinsanga, State Nodal Officer (NEP) leh Dr. C.Zarzoliana, ASDP (RUSA) te he hunah hian an tel bawk.

Mobile IT Lab hi NECB 2.0 Project (Capacity Building in IECT including training in Digital Skills Set and Current Industry Demanding Technologies for various sections of society in the NE Project) hnuaiah project component pakhat niin thingtlang leh hmun hrang hranga computer ban phak ve lo te tana zirna hmanrua a ni.

He Mobile IT Lab hi Nuai 27 man niin, Computer System 16 awm theiin, Internet wifi, Projector, Portable Generator, Air Conditioner, CCTV, HD DVR, Lighting leh a dangte a thuam a ni.

Awareness program hrang hrang (Mobile Applications for Digital Payment, eGovernance Services, IT applications, Cyber security & Emerging technologies, Basics of Computers & Office Automation, Artificial Intelligence for Education, Web development) leh NSQF course hrang hrang he mobile IT Lab hmang hian zirtir tum a ni.