LPS Fight Night: Johnkenty Vana'n inhnek hmuhnawm lantir a duh

Mala'n cho tur dang a hre lo a, a tum tawk ve pangngai turah ka ngai : Johnkenty

Aizawl | July 13, 2024: HC Johnkenty Vanhlimpuia'n amah chotu R Malsawmtluanga chungchang hriatthiam har a ti a, Bosch Home Appliances LPS Fight Night-ah inhnek hmuhnawm an lantir theih erawh a beisei.

August 26, zirtawpni zan khian LPS Arena, Falkland-ah round li chhung inhnek tura tih an ni a, Mipui ngaihven Vana'n 2019 LPS Pro Fight lightheavyweight a lak hnuah Mizorama a inhnek leh hmasak ber tur a ni.

Kum 27 mi Tuipui boxer chuan : "Mala nen kan vawi khat intawnna tur a ni a, eng nge thleng ang tih ka hrethiam lo. Cho tur dang a hre lo a, min cho ta mai niin ka hria," a ti.

Nikum November khan India ram puma sipai inelna Inter Services Championship lightheavyweight-ah Vana a champion a, Indian Navy boxer chhuanvawr niin zing, chhun, tlaiah ngawrh taka a inbuatsaih reng avangin a inringtawk.

Indian Army Sports Institute, Pune-ah sipai boxer ve bawk Mala a inkulh ve thung a, Mizoramah hneh theih loh ang maia Vana a vawklallen avangin hmachhawn ngei a duh.

Electric Veng, Lunglei boxer hian 2022 National Games middleweight-ah Mizoram tan silver medal a hnek chhuak tawh a, Mizo mipui hriat hlawh leh zual turin a theihna pho chhuah ngei a tum a ni.

Feet 5 leh inchi 11-a sang Vana chuan : "Tum tham tak ni turah ka ngai a, thil thleng tur a hriat loh. Inhnek hmuhnawm tak lantir thei ila a tha ngawt ang," a ti.

2014 khan kum 17 mi a nih laiin a vawi khat nan LPS Pro Fight middleweight-ah telin a champion nghal a, a hnuah lightheavy-ah insawnin 2019 thlengin Pro Fight-ah a inlan a, a bitum hneh vekin vawi nga a zawnin a champion.

Fight Night-ah inhnek vawi ruk a awm dawn a, bantamweight-ah round ruk awh turin Laldinsanga leh Ramdinthara, round li turin welter-ah Lalruatzela Hauzel leh Lalmuanpuia, super fly-ah Vanlalenkawltira leh Lalrinngheta an innuai ang.

Round thum turin light fly-ah Emmanuel Vanlalthlengliana leh Benjamin Lalrindika bakah Khelo India State Centres of Excellence hnuaia inzir lai L Joseph Buihringpachha leh H Zomuanpuia an inhnek dawn bawk.

Fight Night leh inhnek tur thlir lawkna July 13, inrinni zan dar 8-ah LPS 1-ah tihchhuah a ni dawn a, chawlhni zan dar 8-ah thlir lawkna dang tihchhuah chhunzawm a ni bawk ang.