Central YMA in Cyclone Remal avanga chhiatna tawkte tanpuina a sem

Aizawl | July 13, 2024: Vawiin ni 13.07.2024 (Inrinni) chawhma dar 11:00 ah khan Central YMA chuan Cyclone Remal avanga chhiatna tawkte tanpuina, hmun hrang hrang atanga a dawn khawm te semna hun Central YMA Hall ah a hmang. He hun hi Pu Fabian Lalfakawma, Assistant Secretary, Central YMA in a kaihruai. Upa Zochhuana CEC in hunserh a hmang a, Prof. Malsawmliana, General Secretary in chhiattawhna thlen dan hrang hrang leh tanpuina luh dan Report a pe bawk.

Prof. Lalnuntluanga, Vice President, CYMA in thu sawiin YMA chu tanpui ngaite tanpuitu pawl a nih angin lusun mangang, chhiattawkte tanpuitu pawl a nih thu a sawi a, YMA hi amah maia ropui a ni lova Mizo mipui, YMA memberte avanga innghahna tlak pawl a nih mai thu a sawi. Mizo te tana pawl ropui leh innghahna tlak, tanpui ngaite tanpuitu YMA ah hian i tui thar zel ang u a ti. Chhiattawk chhungkua te YMA in a tawrhpui thu leh tanpuina pe tu zawng zawngte chungah lawmthu a sawi bawk.

Pu MS Ralte, Finance Secretary kaihhruaina in chhiattawk te tanpuina sem chhunzawm a ni. Tanpuina sem chhuah zat hi Rs.56,54,000/- a ni.

Pu Roneihthanga, Treasurer in chhiattawk chhungte tawngtai sakna leh lawmthu sawina hun a hmang. He hunah hian chhiattawk chhungte thahnem tak an kal bawk a ni.

Vawiina tanpuina semna hunah hian hmun hla zawka awm te - Lunglei, Serchhip, Saitual, Mamit leh Khawzawl Sub- Hqrs hnuaia mi te chu tanpuina thawn an ni.