Chawngte Joint NGO thu thlen sorkarin la tihhlawhtlinsak lo!

Aizawl | July 13, 2024: Joint NGO Chawngte chuan vawiin khan meeting neiin, May 8 & 9, 2024 a Health Minister, PWD Minister leh Home Minister hnena Chawngte khawtlang harsatna leh mamawh an thlen te, thla hnih hnuah pawh chhanna an la hmuhloh avangin hmalak zel dan tur an rel.

He Meeting hi Lawngtlai District Students’ Association (LDSA) chuan kaihruaiin, meeting ah hian May 8, 2024 ah Health Minister hnena Chawngte CHC a MBBS pakhat leh X-Ray Technician awmlo chungchang leh, hriselna kawnga chawngte khawtlang hmasawnna tura thawktu dang indaih lohna te thlen anih thu sawi a ni a. Health Minister hnena thu an thlen hnu ah pawh Health Department hnuaiah Doctor 35 appointment pek thar an awm thu leh Chawngte CHC a MBBS lak thar dah an ni velo chu a pawi an ti a, tin, MBBS chauh ni lo thawktu dang leh hmanrua leh lirthei mamawh an thlen te pawh pakhat mah pek an nilo tih an sawi a ni.

May 9, 2024 ah Joint NGO Chawngte hian PWD Minister leh Home Minister hmu leh nghalin, PWD Minister hnenah hian Chawngte khawchhung kawngsiam mek chungchang an thlen a, a bikin Chawngte C khawchhung kawng vawiin thlenga siam that ala nilo chu a pawi an tih thu sawiin, Chawngte C leh Chawngte L khawchhung kawng la siam zawhloh te chu a hma thei ang bera siam zawh anih theih nan a hmalak zel dan tur meeting ah hian an sawi bawk a ni.

May 9, 2024 ah vek hian Joint NGO Chawngte hian Home Minsiter hnenah Chawngte Police Station a thawktu indaihlohna an thlen tawh thu meeting ah hian sawi ni in, thawktu dahbelh aia, constable awmchhun June 25, 2024 a Mizoram sorkar in a sawnchhuak chu apawi an tih thu sawiin, Chawngte khawtlang zahlohna ah an ngai tih meeting ah hian an sawi bawk.

Joint NGO Chawngte hian Minister pathum hnena an thu thlen te bawhzui leh tihhlawhtlin sak an nihloh avangin, July 18, 2024 Thursday hian Press conference neih a, an resolution puanchhuah an tum a ni.

Joint NGO Chawngte Meeting ah hian YMA Chawngte Group, YLA Sub Headquarters Chawngte, MHIP Chawngte ‘P’ Branch bakah Chawngte P Thalai Pawl, Mizoram Chakma Students’ Union (Central), Central Chakma Mahila Samiti, Central Young Chakma Association leh Lawngtlai District Students’ Association (LDSA) aiawhte an tel a ni.