FIGHT NIGHT : Johnkenty Vana leh National Games silver medalist Mala an inhnek dawn

 

Mizoramah Johnkenty-a hi hneh loh nei lovin a vawklallen deuh niin ka hria a. Chuvangin ani nena intawn hi ka duh : Mala

Bosch Home Appliances LPS Fight Night-ah HC Johnkenty Vanhlimpuia leh R Malsawmtluanga an inlan dawn a, sipai boxer pahnih hi an incho a, inhnek turin thutlukna an siam fel.

LPS Promotion chuan Mizo mipui hmuh chak inhnek chhawpchhuak turin hma a la a, eng emaw chen boxer pahnih a dawr hnuah Aizawla an rawn kirna tur leh an haw lehna tur bakah an lawmman tur chungchang sawiin inrinni zan khan an inrem thei.

Pro Fight-a a bitum hneh vek leh vawi nga (2014-2019) champion thei Johnkenty Vana hi Indian Navy niin Delhi atangin Fight Night-a tel turin a rawn chhuak dawn a; ritchawi chak Jeremy Lalrinnunga te nen Indian Army Sports Institute, Pune-a awm mek Mala'n Mizo leilunga inhnek a chak tawh hle a ni.

Lightheavyweight huangah round li inhnek tura tih an ni a, 2022 National Games silver medal latu Mala chuan : "Johnkenty-a hi Mizoramah hneh loh nei lo ang a nih avangin a vawklallen riauin ka hria a; chuvangin ani nena inhnek hi ka duh a, a phurawm tawh hlein ka hria," a ti.

2019 Pro Fight champion a nih hnuah a tum tawk leh a hmaa ding tur zawn hmuh a harsat tel bawk avangin Mizoramah mumal takin Tuipui boxer Johnkenty Vana a inhnek zui lo va, Fight Night hmanga hun tha a nei thei tur chu a tan chona thar pawimawh takah a ngai.

Electric Veng, Lunglei chhuarvawr Mala tan inhnek pawimawh leh Mizo mipui nawlpui hmuh theih tura a inlan vawi khatna a ni ve thung dawn a. Kum hnih kal ta khan National Games-ah Mizo boxer zinga che tha ber niin middleweight final a lut a, hriat erawh a la hlawh tawk lo tih a inpawm.

Anni pahnih bakah hian Pro Fight champion lai pathum an inlan dawn a, inhnek pui berah Pro Fight title fight-a hmuhnawm taka inhmachhawn tawh bantamweight champion Laldinsanga leh Ramdinthara an innuai leh dawn a, round ruk inhnek tura tih an ni.

Middleweight champion C Lalhruaitluanga leh F Lalthanliana Junior an intawng nawn leh dawn bawk a, welterweight champion Lalruatzela Hauzel chuan Lalmuanpuia a bitum ve thung ang.

July 26, zirtawp zanah LPS Arena-ah inhnek vawi sarih a awm dawn a. Naupang beiseiawm tan hmun siamsak telin Khelo India State Centres of Excellence hnuaia inzir lai L Joseph Buihringpachha (Siaha) leh H Zomuanpuia (Kolasib) an inhnek ang.

BOSCH HOME APPLIANCES LPS FIGHT NIGHT

FIGHT CARD - Bout 7

BANTAMWEIGHT - Round 6

Laldinsanga (Ramthar, Lunglei) v Ramdinthara (Pangzawl)

LIGHT HEAVYWEIGHT - Round 4

HC Johnkenty Vanhlimpuia (Tuipui) v R Malsawmtluanga (Electric Veng, Lunglei)

MIDDLEWEIGHT - Round 4

C Lalhruaitluanga (Chawngtlai) v F Lalthanliana Junior (Electric Veng, Lunglei)

WELTERWEIGHT - Round 4

Lalruatzela Hauzel (Mission Veng) v Lalmuanpuia (Luangmual, Lunglei)

SUPER FLYWEIGHT - Round 4

Vanlalenkawltira (Dinthar, Champhai) v Lalrinngheta (Tuipui)

LIGHT FLYWEIGHT - Round 3

Emmanuel Vanlalthlengliana (Melthum) v Benjamin Lalrindika (Chhinga Veng)

EXHIBITION BOUT - Round 3

L Joseph Buihringpachha (KISCE, Siaha) v H Zomuanpuia (KISCE, (Kolasib)