- Rev.Dr. Zaichhawna Hlawndo
.jpg)
Kan rama kan buaipui ber eirukna (corruption) zung chu party politics a ni tih hi ka ziak tawh a. Engtiang chiahin nge chu party politics system ah chuan eirukna (corruption) in a luhchillh dan leh chu Party Politics System chu ‘ Thatheihmiahlohna Bawm’ a nih dan tlangpui kan ziak dawn a ni. He party politics system hi kan ram leh hnam siam ṭhat kan tumna hmanrua ber chu a ni bawk si. Kan in ṭhat siakna leh fel kan tumna ber chu ‘Ṭhattheihmiahloha Bawm’ a nih si chuan engtinnge kan ṭhat theih tak ang? Engtin nge ram leh hnam damna tur chuan kan beih tak ang? tih chu zawhna pawimawh tak pawh a ni. Kan politician ṭhenkhatte chuan ‘Manifesto chu kan in siam ṭhat siak mai mai alawm’ an ti tihte pawh hriattur a awm. Kan ram rorelna kal tawh, kal mek leh lo la kal zel dan tur han thlir pawh hian Party politics hmang hi chuan engtikahmah kan ṭha thei dawn lo niin a lang. chuuti a nih si chuan party politics system chu inbumna bawm, thatheihmiahlohna bawm a ni tih chu a ti chiang hle a ni.
Kum 1947 India rorelna hnuaia kan luh aṭanga party politics system hmanga kan lo kal tawh dan leh chu party politics system chuan kan thlarau, rilru leh taksa a ei chhiat dan te, kan hnam, ram leh kohhran a eichhiat dan te pawh a tlangpui kan sawi ang.
A hmasa berah chuan kan thlarau nun a eichhiat dan hi han sawi hmasa ila. Party politics chu lal leh thuneih inchuhna a ni a, chu lal leh thuneih inchuhna chu Bible in kan buan te, kan hmelma a tih chu a ni. Ephesi 6:12 ‘'Kan buante hi tisa leh thisen an ni si lo, lalnate leh, thuneihnate leh, he thim chunga khawvêl rorêltute leh, vân hmunahte thlarau sualho awmte an ni zâwk e’ tih kan hmu. Chu lal leh thuneih inchuhna chuan thil mawi leh mawilo pawh a ngaihtuah tawh lova, lal leh thuneihna an chan theihna a nih dawn phawt chuan eng hmanrua pawh hman hrehlohna a awm a. Chuvang tak chuan tuna party politics hmanga mawilo taka lal leh thuneih inchuhna chu Pathian nung ringtute’n kan tihve atana mawilo Bible zirtirna nena inkalh a ni. Kan thlarau nun tichhetu bul a ni kan ti thei ang.
A pahnihna ah chuan Bible Thianghlim Phillipi 2:3 ah chuan “ Elrel leh inngaihhlut avânga eng mah ti lovin, mi tinin inngaitlâwm takin mahni aiin mi dang ṭha zâwkah ruat ṭheuh rawh se; tiin min zirtir a. Rom 13:8 ah chuan ‘ In hmangaih tawnna chauh lo chu tuma engmah ba suh u’, mahni mihringpui hmangaihtu chuan dan chu a zawh famkim tawh si a; tih kan hmu bawk. Party politics system chuan mahni aia midangte sual zawk, ṭhalo zawk, fello zawka ruat dan min zirtir thung. Party politics system chuan in hmangaih tawnna min zirtir lova, indo dan min zirtir a, remloh lenna hmun a nih avangin remna leh felna leh thlarau thianghlimin hmun a chang theilo a ni. Chu party politics system chu thlarau lam thil nilovin tisa thil a ni. Thlarau leh tisa thil chu thil kal rem theilo leh indo tlat a ni. Chuvang chuan Kristian te tan chuan tuna he party politics system hmanga rorelna siam a, lal leh thuneihna kan inchuh dan hi kan tihloh tur a ni. Kan duh vang reng pawh nilovin he Party politics hian thil tha titheilovin in hmangaih thei lovin min siam a, that duh leh Pathian thuawih duhte kha Pathian thuawih theilovin min siam a ni tih hi hai rual a ni lo.
A pathumna ah chuan party politics system chu zonun zemawi ṭhiattu a ni. Kan pi leh pute hunah chuan khawtinin lal neiin a kaiza vengtu khawnbawl upate nen ro fel takin an rel a. Ṭhalaite enkawltu atan Val Upa an awm leh mai a. Rorelna fel tak neiin ‘ sem sem dam dam, eibil thi thi’ tih leh ‘ Thih leh ruam khatah dam leh tlang khatah, tiin an lo khawsa ho ṭhin. Tuna rorelna kan neih mek party politics hmanga rorelna hi chu thleibik nei a rorelna a ni lo theilo. Party MLA ngah ber khan sawrkarna an siam a, sawrkar chu an mahni ta, an party ta bik angin an kalpui a. Rorelna khawlah pawh chuan an mahni party nivelo te chu an mahni eptu pawl (opposition) an ni. Democracy chu mipuite siam, mipuite ta tiin sawi ṭhin mahse a tak takah chuan party siam party ta anga kalpui a ni. Party chhunga mihirng awm ta te kha an sual ta tihna a ni kher lo. Amaherawhchu a kal phung (system) kha a dik loh tlat avangin party system rorelna chuan Ṭha thei miahlovin a siam zawk a ni. Zonun Zemawi chuan duhsak bik neih te, thelibik neihte a do tlat laiin, Pary politics ah chuan duhsak bik neih te, thlei bik neihte chu kalphung tur renga ngaih tluk hial a ni. Chuvang chuan tuna kan rorelna khawl siam dan leh rorelna kalpui dan Party politics system hi ‘Thattheihmiahlohna Bawm’ a ni tih chu phat rual a nilo. Chuti a nih si chuan chu ‘aṬhatheihmiahlohna Bawm chu engtin nge kan siam ṭhat ang? Engin nge kan thlak tak ang? Chutiang tur chuan engtin nge hma kan lak ang tihte kan la sawi zel ang.
• • • • • •
Scan Here to Donate!
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: