Car Rental-in TBC Lalvenchhunga ban an phut!

Aizawl | April 4, 2024: All Mizoram Car Rental Association (AMCRA) chuan zanin ni 4th April 2024 (Ningani) hian Hotel Regency-ah  Assembly kan nei a. Tun MP (Lok Sabha) inthlan lo awm tur a, Election Official-te tana Rental Car hman chungchangah thil fel lo leh, mimal thuneihna hman sual a awm ngei nia an hriat avangin a hnuai ami ang hian Resolution an siam.

AMCRA chuan, "ZPM Sorkar hnuaiah MLA ni tlakah kan ngai lova, ZPM sorkar hian a Ministry timualphotu TBC Lalvenchhunga hi ban a nih theih nan chak takin hma la nghal rawh se." an ti bawk.

ALL MIZORAM CAR RENTAL ASSOCIATION  (AMCRA)

PRESS RELEASE

Dated Aizawl The 4th April 2024: All Mizoram Car Rental Association (AMCRA) chuan zanin ni 4th April 2024 (Ningani) hian Hotel Regency-ah  Assembly kan nei a. Tun MP (Lok Sabha) inthlan lo awm tur a, Election Official-te tana Rental Car hman chungchangah thil fel lo leh, mimal thuneihna hman sual a awm ngei nia kan hriat avangin a hnuai ami ang hian Resolution kan siam.

RESOLUTION

1. Mizorama sorkar kan hrawn tawh zingah Election Official te tana Car Rental hman chungchangah thil fel lo tunhmain a la awm ngai lo. Tun ṭuma heti tak maia buaina kan tawk hi a pawi kan ti tak zet a. He kan buaina tawh hi a rang thei ang bera chin fel nise kan duh hle a ni.

Tun ṭum MP (Lok Sabha) inthlana Election Official duty-te tana Car Rental hman a nih chungchangah hian AMCRA kaltlangin Motor hi hman (Demand) a ni lova, All Mizoram Car Rental Association (AMCRA) member pawh ni duh lo TBC Car Rental te chauh koh an ni hi kan hrethiam thei lova. Hetah hian TBC Car Rental neitu (Operator) Pu TBC Lalthatluanga hian a unaupa Adviser to Chief Minister Pu TBC Lalvenchhunga MLA thuneihna dik lo takin ama mimal hamthat nana a hmang tangkai duh hi pawi kan ti tak zet a. He thil  hi a rang thei ang bera tih tawp ni rawh se.

2. He thil thlengah hian sorkar hnathawk Officer hun rei tak chhung (A term pawh hun rei tak chhung pawh sei sak tawh) Protocol a awm ṭhin tuna SCERT Deputy Director a sawn tak Pi Florence Lalrinpuii chu a inrawlh ngei niin kan hre bawk a. Hetiang a mahni hamthat nana thuneihna hman sual hreh lo Sorkar hnathawk hi Mizoram Sorkar tichhetu a nih avangin Sorkar hnathawk tlak niin kan hre lova, A hna atang hian ban ni rawh se.

3. Hetiang buaina hi Mizoram Sokar hnuaiah kan vawikhat hriatna leh tawnna a ni a. Kalphung thar mipui sorkar din duh a hmala mek ZPM Sorkarna hnuaia an MLA, Adviser to Chief Minister ngeiin ama mimal vua leh vang te vulh nana a thuneihna dik lo taka a hmang sual duh hi kan dem tak zet a. ZPM Sorkar hnuaiah MLA ni tlakah kan ngai lova, ZPM sorkar hian a Ministry timualphotu TBC Lalvenchhunga hi ban a nih theih nan chak takin hma la nghal rawh se.

4. Tun MP (lok Sabha) inthlan atana Election Official tana Rental Car an hman te hi TBC Car Rental vek an ni a. Hei hi thil dik lo tak a nih avangin leh AMCRA Member pawh ni duh lo, mimal Firm anih avangin District hrang hrang a DC ten Election kaihhnawiha mimal Motor an hman zawng zawng leh tuna TBC Car Rental motor an hman zawng zawng hi titawp (Call Off) sak sela, All Mizoram Car Rental Association (AMCRA) kaltlangin motor hi hman ni rawh se.

5. Rental Car Permit pe chhuaktu STA thu zawm duh lova, All Mizoram Car Rental Association Member pawh ni duhlotu TBC Car Rental neitu (Operator) TBC Lalthatluanga hi STA duh dan a zah loh avang leh, a pawisak loh avangin Car Rental Permit Holder ni tlakah kan ngai lo. Chuvangin, Mizoram Sorkar (State Transport Authority) hian a permit hi Cancel sak nghal rawh se.

                                                                                                                                                                     Heng kan Resolution hi Chief Minister zahawm tak leh Transport Minister hnenah ziaka thlen a ni a. Sorkar thuneitute hian kan ngenna hi 10th April 2024 ral hma ngeia min tihhlawhtlin sak turin kan ngen a. Min tihhlawhtlin sak lo a nih chuan a tul angina hma kan la zel dawn a ni.

Sd/

(C.ZARZOLIANA)

President

Sd/

(K.LALRINCHHANA) 

General secretary 

ALL MIZORAM CAR RENTAL ASSOCIATION