Aizawl FC home-ah Manipur Club pahnih lokal ngam lo: Match Called off a ni

 I-League 2023-2024 Season khelh mekah Aizawl FC chuan match hnih khelh tur an la neia; AIFF in Schedule a tihchhuah tawh angin April ni 9 ah  Trau FC leh ni 12 April Neroca FC te nen Rajiv Gandhi Stadium, Mualpuia khelh tur a tih ani a.

Amaherawhchu, Manipur Club pahnih te hian tunlai an ram buai chu chhuanlamin Aizawla inkhelh chu a  him lo palh thei tiin AIFF hnenah neutral ground a khelh an dil a. Hei hi Aizawl FC chuan pawm lo in Manipur state buai tantirh atanga vawiin ni thlengin Manipur buai avangin Mizoram ah buaina a awmloh thuin a chhangleta, an Home Ground RG stadium ah ngei khel tura fixture lo siam turin AIFF hnenah thu an thlen ve nghal.

A vawihnih nan AIFF chuan Aizawl FC chu duhthlan tur pahnih(2 options) pein neutral ground Kolkata, Shillong, emaw Guwahati ah match pahnih hi khel mai tur emaw  match pahnih hi khel lovin team pahnih ten point khat ve ve zela in sem mai nise ti in  Aizawl FC chu an rawn hrilh leh a. Aizawl FC chuan AIFF option pekte chu hnar fithlain March ni 26, 2024 a AIFF in schedule a lo tihchhuah tawh angin Aizawlah ngei an AFC Home match khelh an duh thu leh Mizoram chu India rama state ralmuang ber, Manipur buai avanga boruak ngaihmawhawm chhete pawh a thlenlohna a ni a; hetiang a ni chunga Manipur Club pahnih ten Aizawla khelh an theihloh chhana ’coach leh players ten an hlau’ tih chhuanlam an hmang chu intihmingchhiat tumna a an ngaih hial thuin AIFF ah thlen leh a. Dan dinglai anga Aizawla khelh ngei an phut tih an tichiang nawn leh bawk.

Tichuan AIFF chuan ni 9/4/2024 zan khan Aizawl FC leh Manipur club pahnih te Aizawla an inkhelh tur chu an titawp/thulh(called off) tih  hriattirna an tichhuak ta ringawt a, tun season atan AFC Home match a awm dawn tawh lo a ni. He thilah hian AFC chu an lungawi lo hle a, Club Neitu leh Hachhek Bial MLA ni bawk Pu Robert Romawia Royte chuan Manipur club pahnih Aizawla an lo zin duhlo chu a dem a, AIFF in a rawn tir theilo pawh mak a tih thu a sawi bawk. League Match pahnih ah hian points 3 ve ve min pelo anih chuan a tul angin hma kan la ang a, point 3 ve ve min pe anih pawhin kan lawm a kim chuang lo. Football nawmna chu ataka inkhelh a ni a, chu chu a thleng ta silo a ni a ti.

League match tihtawp anih thut takah chuan Club neitu Pu Robert Romawia Royte te chhungkua chuan an chenna in Chhinga Vengah AFC Players leh staff te pualin Season tawp zanriah an buatsaih a. He hunah hian tun seasonah kum dang anglo taka nasa taka harsatna club management in a tawh thu te puanchhuah a ni a, coach leh players te chungah lawmthu Club hotuten an sawi a ni.

Team aiawha thusawitu Club Sporting Director, Pu Hmingthana Zadeng chuan hlawkna pakhatmah beisei tur a awmlo tih hre saa 100% loss in kum 10 chuang mizo thalai te hma khua ngaiin Pu Robert Romawia te chhungkuain AFC an enkawl tawh a, he club zarzotu players hlawhtling tak tak tam tak an awm tawh a ni, a ti a. Football chhungkuain kan zahin kan ngaisang em em a ni a ti bawk.

Aizawl FC hian I-League 2023-24 season ah bul an tan tha lo chungin an insiam thaa, 1st phase chu top 4 a awm chungin an khar nghe nghe. 2nd phase ah players inhliam neuh neuh ten a tihbuai avangin an duhthusam ang leh beisei angin an khel thei lova, tun dinhmunah match hnih la khelh tur nei chungin table ah 9 na ah an awm mek a ni. Amaherawhchu, tarlan tak angin an match hnih khelh tur la neih te hi called off anih takah chuan engtinnge AIFF lamin thuthlukna an siam ang tih ala chiang lova. AIFF lam thuthlukna azirin an position hi tun aia sang hretah pawh an la awm thei a ni.