Aizawl | April 10, 2024: Mizo Zirlai Pawl (MZP) General Headquarters, Aizawl chuan vawiin chawhma dar 11 khan Aizawl Press Club-ah thuthar thehdarhtute kawmin, Mizoram Public Service Commission (MPSC) Chairman chu tunkar chhung ngeia bang turin an phut.
MZP chuan, MPSC in combine exam a buatsaihah thil fel lo a awm ngei nia hriain MPSC chairman chu a mawhphurtuah ngaiin tunkar chhung ngeia bang turin an ti.
MZP chuan, tunkar chhunga a ban loh chuan, a ṭul anga hmalak an tum a ni.
*PRESS STATEMENT*
*MZP IN ZIRTAWPNI RAL HMA IN MPSC CHAIRMAN BANG TURIN AN PHUT*
1. MZP chuan Mizoram Public Service Commission (MPSC)-in February ni 1, 2024-a result a tihchhuah tak Combined Competitive Examinations kalpui danah thil fel tawklo leh chhui chian ngai thil a awm ngeiin a hria a. Hemi chungchang hi ni 27 March, 2024 khan thuchhuah siam a lo ni tawh a. Mizoram-a hna sang leh zahawm tak tak latu MPSC chhûngah hetiang thil hriat tur a awm hi MZP chuan pawi a ti takzet a ni.
2. Mizorama hna sang leh zahawm tak takte lak hna, MPSC-in a kalpui thin a. Thalai hna zawng mekte pawhin an ringtawk hle thin a ni. Chuvangin MZP pawhin eng emaw sawi a awm chang pawhin a hmingchhiat mai loh nan a thlawp tlat thin a.
3. Chutih laiin Combined Competitive Examinations kalpui hnuhnung berah thil dik tawkloa hmalakna a awm ngeiin MZP chuan a hria a, a ngai thutak hle a. Mains Exam paper thenkhatah correcting fluid-te hman niin, mark pek tawhsa thaichhiatna leh mark tihdanglamna hnuhma thahnem tak a awm a. Hei hi hmun hnih- khat mai ni lo hmun tam takah a awm a ni.
4. Tin, MPSC hian heng Answer paper-te hi tunhma zawnga RTI Act. hmanga dilchhuah an remtih thin laiin, kuminah chuan an remti ta lo thut a. A hnuah Certified copy pe chhuak lovin 'inspection without photograph' an phal leh a. Nawrna avangin a hnuah phone a thlalak an phal leh chauh a ni. MPSC hian an thil tih dik tawk loh avangin, hlauh an neih vang a ni ang em, tih zawhna a awm phah hial a ni.
5. MPSC hnuaiah hetiang sulhnu mak tak tak leh sawi neuh neuh a awm hi MZP chuan pawi a ti takzet a. Exam beitu mi thenkhatte chunga thil thleng ang hi midang chungah thleng tawh lo se MZP chuan a duh a. Exam beitu lungawi lohna neite an dawnsawn danah pawh an in enfiah a ngai hlein MZP chuan a hre bawk a ni.
6. MPSC-in heng thil diklo leh fello siamthat tuma hmalate hi, "tlin loh vanga rilru na thil tih" ang lekah a chhuah fo mai a. Dik lo thei lo, tisual ngai lo leh sawisel thiang lo anga an in chhal chunga, case an nei fote hi in enfiah se MZP chuan a duh bawk a ni.
7. MPSC hian an thil tih dik loh hi sawi mam tum leh Evaluator-te tihsualah puh reng loin, an mawhah la sela. MPSC zahawmna humhim a nih zel theih nan te, Zirlai hna zawng mekten an rinna an nghah zel theih nan MPSC Chairman chu tun kar chhung ngei hian bang se kan duh a. Heng kan ngennain awmzia a neih loh chuan, Chairman ban a nih ngei theih nan MZP chuan a tul angin hma a la zel dawn a ni.
8. MZP chuan tun hnaiah, NIT Mizoram Asst. Registrar leh AMC hnuaia hna lakah mimal duhsak zawngte thun an tum avangin hma a lo la tawh a. Hei pawh hi uluk taka enzui mek zel niin, bawhzui reng a ni. Chutih mek laiin MPSC-ah lehzêl thil diklo tak tihna remchang kawngka inhawng hi pawi a ti takzet a. Mizoram mipuite thlawpna MZP chuan a ngen a ni.
Issue by. MZP General Headquarters, Aizawl.
No. E-93/MZP-GHQ/2023-2025/49 Dated: Aizawl, the 10th April, 2024
• • • • • •
Scan Here to Donate!
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: