CHHANNA I HMUH HMA PAWHIN PATHIAN HNENAH LAWMTHU SAWI RAWH

_I Nun Thiltum Puanchhuahna_

-  Rick Warren 

-  April 10, 2024

“Kei erawh chuan lawm thu sawina aw nen i hnenah inthawina ka hlan ang a, thu ka tiam chu ka hlen ang. Chhandamna chu Lalpa ta a ni.” (Jona 2:9)

Beiseina reng i neih loh chuan, Pathian hnena lawmthu sawi te hi a har em em thin a. Harsatna i tawh pawhin engvangin nge lawmthu i sawi theih ang?

Jona hi i zawt ang hmiang. Nghapui kawchhunga a awm laia a tawp lama a tawngtaina chu, Pathianin a chhanchhuah hma pawhin, Pathian hnena chhanna kan hmuh hma pawha lawmthu sawi dan min zirtir a ni: “Kei erawh chuan lawm thu sawina aw nen i hnenah inthawina ka hlan ang a, thu ka tiam chu ka hlen ang. Chhandamna chu Lalpa ta a ni.” (Jona 2:9)

A hma leh a hnu lama lawm chu eng nge a danglamna? Pathian hnena lawmthu sawi tura a chhanna ka nghak anih chuan, chu chu lawmna a ni. Nimahsela, a chhanna ka dawn hma pawha Pathian hnena lawmthu ka sawi chuan, chu chu rinna a ni. Kan tawngtai min chhan chuan lawmthu sawi kan chak fo thin, nimahsela a chhanna kan hmuh hmaa lawmthu kan sawi chuan rinna kan lantir tihna a ni.

Engtin nge Pathian hnenah lawmthu chu i sawi lawk ang? Jonan kawng thum min kawhhmuh a:

*Jonan fak chungin Pathian hnenah lawmthu a sawi.* Hebrai 13:15 ah chuan, “Tichuan, ama zarah chuan faka inthawina hi Pathian hnenah i hlan fo vang u, chu chu a hming tanna hmuite rah chu a ni.”

*Jona chu a mission-ah a kirleh theih avangin Pathian hnenah lawmthu a sawi.* Jona chuan a talbuai a ni tih a inhriaa. Keini pawh chutiang tho chu kan ni, nimahsela Pathian mission chu nangmahah a la tawp chuang lo. Jona mission pawh a la ngai reng. I lo tal buai deuh anih pawhin, i nun mission chu ala ngai reng tho a ni.

*Jona chuan Pathianin hlawhtling tura a rinna avangin lawmthu a sawi.* Thufingte 3:5-6 chuan hei hi min zirtir, “I thinlung zawng zawngin Lalpa ring la, nangma hriatnaah innghat suh.”

Jona bung 1 ah khan a tlanbona kan hmu a. Jona bung 2 ah chuan Jona chu Pathian ah leh a khawngaihnaah a tlanlut ta zawk a ni. Bung dawt lehah chuan, Jona Pathian nena an tlanna kan hmu thung ang.

 Pathian thu i zawmlo a nih pawhin, a kalsan ngai lo vang che. Chuvang chuan a chhanna i hmuh hma pawhin lawmthu i hrilh thei a ni. 

Ngaihtuah zui atan

* Pathian hnena lawmthu lo sawi lawkna chuan i tawngtai dan engtin nge a lantir? 

* Engtikah khan nge Pathianin hun remchang vawi hnihna a siamsak che? Chu tawnhriat chuan engtin nge nangmahah a nghawng? 

* Lawmthu lo sawi lawk leh a hnua lawmthu sawi chu a danglamna han hrilhfiah teh?

*[Lettu: Sangpuia]*