YMA Rorelna sang ber dawttu CCC meeting nei

Aizawl | April 10, 2024: Vawiin ni 10.04.2024(Nilaini) khan Bawngkawn South YMA Hall-ah YMA rorelna sang ber dawttu, Central Coordination Committee (CCC) meeting vawi 99-na neih a ni a. Pu Lalhmachhuana, President , Central YMA in a kaihruai.

Prof. Malsawmliana, General Secretary, in palaite inhmelhriattirna leh CCC meeting hnuhnung ber ( 8.11.2023) leh vawiin inkarah Central YMA hmalakna hrang hrangte a sawi.

Meeting ah hian nikuma YMA Inkhawmpui Lian vawi 74-na, Biate a neih a rorel hrang hrang - YMA khawih 6 leh Sawrkar khawih 1 te bawhzui dan tarlan a nih bakah bawhzui zel dan turte sawiho a ni bawk.

Kum 2023-2025 chhunga YMA Kumpuan ‘Ram leh hnam humhalh’ bawhzui dan hrang hrangte tarlan a ni bawk.

Inkhawm kaihruaitu Pu Lalhmachhuana, President chuan palaite chu ruihhlo do kawnga theihtawp chhuaha tan la tur te, Mizorama hnamdang phalna nei lova sumdawngte leh hnamdang lirtheia sumdawng tam lutuk te enfiah kawnga hma la zel turte, tuihna humhalh kawnga mahni awmna theuha theihtawp chhuah tur te in a chah bawk.

Central Coordination Committee (CCC) ah hian Central YMA hruaitute bakah Sub- Hqrs YMA aiawh, Group YMA aiawh leh Aizawl City Branch aiawh mi 220 an kal.